Read gen Bàruk 5 Bible Online

Bàruk 5 - gen bible

Bàruk 5

¹Yeruzàlɛm, ɖè àpo vevesèse ku gbèsìvuɛ̃ be sayà a ɖɛ eye sɔ Mawu be gogo be àcɔwu zãtã a kpla èkɔ̀ sɔ yì tɛ̀gbɛ̀.

²Sɔ jɔ̀jɔɛnyinyia be èjiwu vlàyà, kè sona Mawu gbɔa, butu ɖokoe wò, eye sɔ Mawu be gogoa be fìɔkukua, cɔ̃ èta;

³ɖo Mawu la ɖè àpo fɛwu wɔ̀wɔ fiɔ ànyigbã blibo kè lè jiŋùkusi gɔ̃mè a,

⁴eye e la na wò nyikɔ kèa sɔ na tɛ̀gbɛ̀a be: 'Jɔ̀jɔɛnyinyi be ŋutifafa ku Ŋuzĩzĩkuku be kàfù kafu'.

⁵Sitè, Yeruzàlɛm, sɔ ɖokoe wò ɖotè lè kɔ̀kɔ̀ɛpea ji eye sã ŋùku kpɔ èwèzɛ̃pe lɔ̀ge ɖoɖa: Kpɔ èvi wòwo ɖa: àmè kèwo Kɔ̀kɔ̀ɛtɔa be ènyà bɔ̀ so èwèɖoxɔ̀pe kaka yì èwèzɛ̃pe; wo le kpɔ jìjɔɛ ɖo Mawu ɖo ŋùku woa ji;

⁶àfɔ̀ ye wo zɔ̃ to àpo àgbowo nu gà kè mè kɛ̃tɔwo le tùtù wo jo, vɔ̀a Mawu le trɔ wo kplɔ̀ va gbɔ wò, wo dro wo gogo-tɔ̀ sìgbè fìɔzìkpe ɖe nène.

⁷Ɖo Mawu ɖè ègbè be woa ɖiɖi èto yì ji ɖekpekpe ku èkpo màɖo vɔ̀vɔnuawo nèneake; eye e na wo tu bàlìwo ne ànyigbã bèa zìɔ̃ eye Izràɛl la teŋu zɔ̃ dèdè ɖe, lè Mawu be gogoa mè.

⁸Lè yebe ègbè ɖèɖe mèa, àvewo cã ku àti le huɛ̃ gbli gbli gbliawo jrà woabe vɔ̃vɔ̃lì ɖo na Izràɛl.

⁹Ɖoa Mawu la kplɔ̀ Izràɛl, lè jìjɔɛ mè, lè yebe gogoa be kɛ̃klɛ̃ mè, lè èdunɔ̀nɔ ku ŋuzĩzĩkuku na àmè ku jɔ̀jɔɛnyinyi kèwo nyi ye tɔ̀awo mè.