Read gen Ezekìɛl 1 Bible Online

Ezekìɛl 1 - gen bible

Ezekìɛl 1

¹Lè èpè ègbãgɔ̃a mè, lè wètri ènègɔ̃a be ŋùkèkè àtɔ̃gɔ̃a gbèa, mù nɔ̀ àmè kèwo wo kplɔ̀ yì gàtɔnugbea dòmè lè Kebà be ètɔ̀a to. Jiŋùkusi hũ eye mù kpɔ Mawu be àvìmènuwo.

²Lè wètria be ŋùkèkè àtɔ̃gɔ̃a gbè, e gbà le nyi èfìɔ Yòakim be lele yì èdù bu mè be èpè àtɔ̃gɔ̃a.

³Mawu be ènyà va na Ezekìɛl, hũbonɔ Buzì be èvi lè Kaldea nyigbã ji, gogo Kebàr be ètɔ̀a to. Tɔhonɔ̀ be ŋusɛ̃a lè ji nyè.

⁴Kè mù le kpɔ ènua, kpɔɖa èvègo be àya sɛ̃sɛ̃ɖe pò, va kudo lilikpo gã ɖe gbàkudo èzò babla kɔ̀tɔ̀. Kɛ̃klɛ̃ ɖe le klɛ̃ lè e ŋuti gòdò; yebe dòdò mèa lè sìgbè ènu kɛ̃klɛ̃ ɖe kè le to so èzò mèa nène.

⁵Lè dòdò mè ŋua kea, ènu ɖe kè ɖì ènu àgbèagbe ènèawo, lè. Woabe ŋùkumè lè sìgbè àgbètɔ tɔ̀ nène.

⁶Ɖe sia ɖe lè woa dòmè ɖo ŋùkumè ènè kudo àwàda ènè.

⁷Woabe àtawo lè jɔ̀jɔɛ, eye woabe àfɔ̀wo lè sìgbè ènyì-su-vi be àfɔ̀ɖoànyi nène. Wo le dàzò sìgbè gàjɛ̃ kè ŋuti wo jràɖo a nène.

⁸Àgbètɔ be àlɔ̀ lè woabe àwàdawo gɔ̃mè; àlɔ̀ kèawo hũ ɖoɖa ŋùkumè kudo àwàda ènèawo be ɖoɖo nu.

⁹Woabe àwàdawo le tɔ woa nɔ̀nɔwo. Ɖe sia ɖe zɔ̃nà yì ŋùkɔ̀ tututu, mà trɔ gbɔ̀xue la kpɔ àfi ɖe ò.

¹⁰Woabe ŋùkumèwo dòmètɔ ɖèka lè sìgbè àgbètɔ tɔ̀ nène; woa kpata ɖo jãŋùta be ŋùkumè lè ɖùsi mè, ènyì-su be ŋùkumè lè èmìɔ̃ mè kudo èhɔ̃ be ŋùkumè.

¹¹Wo vlũ woabe àwàda èvè ɖo ji sɔ tɔ woa nɔ̀nɔwo. Àwàda èvè kpɔ̀tɛawo cɔ̃ woabe àmètia.

¹²Ɖe sia ɖe zɔ̃nà tututu yì ŋùkɔ̀. Wo yìnà fikè wo ji la yìa, mà trɔ gbɔ̀xue la kpɔ àfi ɖe ò.

¹³Lè ènu àgbèagbeawo dòmèa, ènu ɖe ɖì àkazo bìbi hɛ̀hɛ̀ lè èzò mè. E lè sìgbè èzòti kè mu lè nɔ̀ tèpe ɖèka òa nène. Èzòa le bì eye e le klɛ̃zò màtɔtè.

¹⁴Ènu àgbèagbeawo le yì le gbɔ̀ kaba kaba sìgbè èjikè èzò be bìɖàwo nène.

¹⁵Eye kè mù kpɔ̀tɔ̀ le kpɔ ènu àgbèagbe ènèawoa, mù kpɔ be, lè woabe àhàda mè ɖèka-ɖèkaa, àfɔ̀ku ɖe kè tɔ ànyigbã a.

¹⁶Àfɔ̀kuawo le dàzò sìgbè èkpe xɔ̀asì ɖe nène. Wo ɖo nɔ̀nɔmè ɖèka eye wo lè sìgbè be èɖe ɖo èbu mè nène.

¹⁷Lè woabe yìyimèa, wo teŋu sɔna èmɔ̃ ènè kèwo ye ènu àgbèagbeawo sɔa, eye wo yìnà kè wo mu glɔ̃na èmɔ̃ òa.

¹⁸Woabe èji yìyi mè ɖo vɔ̃vɔ̃ ŋutɔ eye ŋùkuviwo sɔ̃ŋu ye lè woabe àfɔ̀wo ŋuti gòdòo.

¹⁹Ne ènu àgbèagbeawo le zɔ̃a, àfɔ̀kuawo cã zɔ̃nà lè àhàdamè na wo; eye ne wo le yì èjia, àfɔ̀kuawo cã yìnà èji nèneake.

²⁰Wo yìnà fikè wo jro la yìa eye àfɔ̀kuawo cã zɔ̃nà ku wo lè ɖoɖo ŋua ke mè, ɖo ènu àgbèagbeawo be gbɔ̃gbɔ̃ lè àfɔ̀kuawo mè.

²¹Nène a, wàlɛbɛ kè ne ènu àgbèagbeawo le zɔ̃ àlo nɔ̀tè, àlo le yì èjia, àfɔ̀kuawo cã wɔ̀nà nènea pɛpɛpɛ. Ɖo ènu àgbèagbeawo be gbɔ̃gbɔ̃wo ye le kplɔ̀ woa cã.

²²Lè ènu àgbèagbeawo be ètawo ji lè àya mèa, ènu ɖe lè sìgbè ènucɔ̃nu, ɖo vɔ̃vɔ̃ ɖe kè le klɛ̃ sìgbè Kristalò nène.

²³Lè ènucɔ̃nu kèa be gɔ̃mèa, woabe àwàda èvè-èvèwo lè vũvlũ, èɖe yì tɔ èbu, eye èvè kpɔ̀tɛawo cɔ̃ woabe àmètia.

²⁴Mù sè zigìdi kè woabe àwàdawo le wɔ̀ wàlɛbɛ kè wo le zɔ̃a. Zigìdi kèa ɖì àpù be ègbè ɖèɖe, èji be ègbè ɖèɖe, ŋusɛ̃kpatatɔ be ègbè àlo àhùakɔ̃ sùgbɔ ɖe tɔ̀. Ne ènu àgbèagbe kèawo nɔ̀tèa, wo trɔ lena woabe àwàdawo ɖo ŋuti.

²⁵Lè ènucɔ̃nu kè lè woabe èta jia be ètamèa, zigìdi le ɖì lè funua cã.

²⁶Eye ènu ɖe lè sìgbè Sàfirò kpe be fìɔzìkpe nène lè ènucɔ̃nua be ètamè. Ènu ɖe kè ɖo àmè be nɔ̀nɔmèa nɔ̀ ànyi ɖo èfìɔzìkpe kèa ji.

²⁷Mù kpɔ nɔ̀nɔmè kèa le klɛ̃ sìgbè gàkpo kè wo tutu nyuɛ̃ ɖe eye èzò trɔ do a nène. Lè yebe àlìmè sɔ yì ji kudo yebe àlìmè sɔ va gɔ̃mèa, mù kpɔ ènu ɖe sìgbè èzò nène, kè le kɔ̀ tèpewo kpata.

²⁸Kɛ̃klɛ̃ kè kɔ̀ trɔ do a, lè sìgbè ànyiɖohùɛɖo kè zena lè lilikpowo mè ne èji le jàa nène. Ekèa ɖì Tɔhonɔ̀ be gogo. Ekè mù kpɔ ɛ̀a, mù jèklò sɔ ŋùmè cɔ̃ ànyi eye mù sè ègbè ɖe le pò nupo.