Read gen Ezekìɛl 10 Bible Online

Ezekìɛl 10 - gen bible

Ezekìɛl 10

¹Kpɔɖa lè Kèrubimwo be èta mèa, mù kpɔ ènu gbàjà ɖe. Ènu ɖe kè ɖì Sàfirò be èkpea; e ɖo èfìɔzìkpe ɖe be nɔ̀nɔmè.

²Mawu gblɔ̃ na àmè kè do àlɛ̃ŋudà be àwùa be: “Yì ɖo àfɔ̀kuawo dòmè ne wòa lɔ èzòkawo lè funu eye wòa yì kɔ̀ èzòka kèawo ɖo èdùa ji.” Eye mù kpɔ ŋusùa jè èmɔ̃ yì.

³Wàlɛbɛ ŋua, Kèrubimwo lè mawuxɔa be ɖùsi mè, eye àzìzɔ be lilikpo ɖe ɖɔ àxuea mè kpataa.

⁴Tɔhonɔ̀ be gogoa ze lè Kèrubimwo ji, eye e zɔ̃ tùtà mawuxɔa be mɔnu. Lilikpoa ɖɔ mawuxɔa wàlɛbɛ kè Tɔhonɔ̀ be gogoa le klɛ̃ lè xixea nu kpataa.

⁵Kèrubimwo be àwàdawo be zigìdi a le ɖì va kaka àgboa ji. Ègbèɖèɖe kèa ɖì sìgbè lekè ye Mawu Ŋusɛ̃kpatatɔa nana èji ɖènà ègbèa nène.

⁶Ŋusù kè lè àlɛ̃ŋudà be àwù mèa, yì nɔ̀tè ɖo àfɔ̀kuawo dòmètɔ ɖèka gbɔ. E yì nɔ̀tè lè funu kaka kè Mawu gblɔ̃ na ɛ̀ be, yì lɔ èzòkawo lè àfɔ̀kuawo dòmèa.

⁷Kèrubimwo dòmètɔ ɖèka vlũ yebe àlɔ̀ ɖoɖa èzò kè gogo èa gbɔ. E lɔ èzòkawo eye e lɔ wo kɔ̀ ɖo àlɔ̀mè na ŋusùa. Eye ŋusùa to kudo èzòkaawo.

⁸Àmè be àlɔ̀wo be nɔ̀nɔmè va ze lè Kèrubimwo be àwàdawo gɔ̃mè.

⁹Mù le ŋùku ɖo àfɔ̀ku ènè buwo cã ŋuti, wo lè Kèrubimwo gbɔ ɖèka-ɖèka. Àfɔ̀ku kèawo le ɖè èkpe xɔ̀asì ɖe be nɔ̀nɔmè kɛ̃klɛ̃ le fiɔ.

¹⁰Àfɔ̀ku ènèawo ɖì woa nɔ̀nɔwo eye wo lè sìgbè èɖe ɖo nɔ̀via mè nène.

¹¹Wo la teŋu zɔ̃ yì àgowo kpata kè wo mu la trɔ òa. Wo yìnà fikè Kèrubimwo be ètatrɔ ɖoɖa, màtrɔ lè tèpe ɖèka.

¹²Kèrubimwo be àmèti, ŋùgbedòmè, àlɔ̀wo kudo àwàdawo ɖɔ kudo ènu kɛ̃klɛ̃wo, kaka jè àfɔ̀ku ènèawo ji.

¹³Mù sè ègbè ɖe le yɔ àfɔ̀ku kèawo be: “Àya kè so le troa”.

¹⁴Kèrubim ɖe sia ɖe ɖo ŋùkumè ènè: cucugbã tɔ̀a ɖo Kèrubim be ŋùmè, èvègɔ̃a ɖo àmè be ŋùkumè, ètɔ̃gɔ̃a ɖo jãŋùta be ŋùmè eye ènègɔ̃a ɖo èhɔ̃ be ŋùmè.

¹⁵Kèrubimawo le zrò yì àya mè: wo lè pɛpɛ sìgbè ènu kèwo mù kpɔ lè Kebàr be ètɔ̀a to va yìa nène.

¹⁶Ne wo le yìa, àfɔ̀kuawo cã kplɔ̀nà wo do; ne wo kè woabe àwàdawo la zròa, àfɔ̀kuawo cã kplɔ̀nà wo do.

¹⁷Ne wo nɔ̀tèa, àfɔ̀kuawo cã nɔ̀nàtè; ne wo le zrò lè àya mèa, àfɔ̀kuawo cã zrònà kudo wo, ɖo ènu àgbèagbeawo be èjro ye le kplɔ̀ àfɔ̀kuawo.

¹⁸Tɔhonɔ̀ be gogo ɖìnyia zɔ̃ yì mawuxɔa be èmɔ̃nu eye e yì nɔ̀ Kèrubimwo ji.

¹⁹Wo vlũ woabe àwàdawo ne woa sɔ zrò. Eye mù kpɔ wo so lè ànyigbã a ji, woa kudo àfɔ̀kuawo ɖodu. Wo yì nɔ̀tè lè mawuxɔa be èwèzɛ̃pe eye Izràɛl be Mawu a be gogo ɖìnyia le klɛ̃ lè ètamè na wo.

²⁰Lè Kebàr be àgowo jia, mù kpɔ ènu àgbè àgbè kèawo nɔ̀ Izràɛl be Mawu a gɔ̃mè. Eye mù sè e gɔ̃mè be Kèrubimwo ye.

²¹Ɖe sia ɖe ɖo ŋùmè ènè eye ènu ɖì àlɔ̀wo lè woabe àwàdawo gɔ̃mè.

²²Woabe ŋùmè nɔ̀ sìgbè ènu àgbèagbe kèwo mù kpɔ sãa lè Kebàr be àgowo jia nène. Kèrubimawo zɔ̃nà tututu màtrɔ kpɔ àfiɖe.