Read gen Ezekìɛl 11 Bible Online

Ezekìɛl 11 - gen bible

Ezekìɛl 11

¹Tɔhonɔ̀ be gbɔ̃gbɔ̃a kɔ mù yì mawuxɔa be àgbo kè lè èwèzɛ̃pea nu. Mù kpɔ ŋusù èwì vɔ àtɔ̃ kèwo dòmè dùkɔ̃a be èga èvè lèa. Wo nyi Azùr be èvi Yàzanìa kudo Bènayà be èvi Pèlatìa.

²Gbɔ̃gbɔ̃ a gblɔ̃ na mù be: “Èwò àgbètɔ be èvi, kpɔ àmè kèwo le wɔ̀ ènu gbegble kudo ètopòɖo vuɛ̃wo nana lè Yèruzàlɛm ɖa.

³Wo gblɔ̃ be: “Va na gà ɖe mèa, wo mu la gbà tù àxuewo ɖo tèpe kèa ò! Èdùa lè sìgbè ènuɖàze nène eye miawo ye nyi èlã kèwo lè e mèa.”

⁴Eŋuãtia, èwò àgbètɔ be èvi, ɖè wo sia sìgbè gblɔ̃ɖɛtɔ nène.”

⁵Nène a ye Tɔhonɔ̀ be gbɔ̃gbɔ̃a va ji nyè eye e ɖè èmɔ̃ na mù be ma pò nupo gblɔ̃ be: “Kpɔ ènu kè Tɔhonɔ̀ gblɔ̃a ye kè: Mù nya ènu kè mì le gblɔ̃a, mìa Izràɛlviwo, eye mù nya susu kèwo le va èta mè na mìa!

⁶Mì dãhlɔ̃ sùgbɔ lè èdù kèa mè kaka be èmɔ̃wo ɖɔ kudo àmèkpòtiwo.

⁷Ekèa ŋuti ye ènyè Tɔhonɔ̀ Mawu, mù le gblɔ̃ be: Èdùa lè sìgbè ènuɖàze nène, vɔ̀a èlã ye le nyi àmè kèwo mì wù lè emèa. Lè mìa tɔ̀ gomèa, mù la nyà mì to lè èdùa mè.

⁸Mì le vɔ̃ na àhùaa? E nyɔ, mù la dɔ̃ àhùa ɖoɖa mìa ji; ènyè Tɔhonɔ̀ Mawu ye le gblɔ̃ ɛ̀.

⁹Mù la nyà mì lè èdùa mè eye mù la sɔ mì do àmèjrowo be ŋusɛ̃ gɔ̃mè. Nène ye mù la wɔ̀ ɖo kòjosòso nyèa ji.

¹⁰Mù la ɖè jɔ̀jɔɛsòso nyèa fiɔ lè Izràɛl be èdùawo mè kaka yì yebe lipòawo ji, sɔ ɖè mì do àsi na èku. Mì la nya ɛ̀ be ènyè ye nyi Tɔhonɔ̀a.

¹¹Èdù kèa mu la nyi ènuɖàze na mì ò eye mì mu la nyi èlã kèwo lè emè ò. Vɔ̀a mì la ɖɔ jɔ̀jɔɛsòso nyèa kpɔ lè Izràɛl be lipòwo dòmè.

¹²Eye mì la do è jèsi be mù nyi Tɔhonɔ̀, àmè kè be ɖoɖo kudo èsewo ji mì mu wɔ̀ ɖo òa. Ɖo mì kplɔ̀ dùkɔ̃ kèwo trɔ do mìa be kɔ̀nuwo do.”

¹³Wàlɛbɛ kè mù le gblɔ̃ ènyà ɖɛ lè Mawu be nyikɔ mèa, Pèlatìa, Bènayà be èvia ku. Mù jèklò, sɔ ŋùmè cɔ̃ ànyi eye mù do àpa sɛ̃sɛ̃ gblɔ̃ be: “Oò, Tɔhonɔ̀ Mawu, wò la wù Izràɛlvi kèwo kpɔ̀tòa?”

¹⁴Tɔhonɔ̀ be ènyà va na mù. E gblɔ̃ be:

¹⁵“Àgbètɔ be èvi, Yèruzàlɛmviwo le gblɔ̃ na nɔ̀vi wòwo, àpo xòmètɔwo kudo Izràɛlviwo kpata be: “Mì nɔ̀ àzɔ̀ge boo na Tɔhonɔ̀, ɖo miawo ye be sɔ ècrɔ̃ nyigbã kèa na.”

¹⁶Eŋuã, sɔ ènyà kè ènyè Tɔhonɔ̀ Mawu, mù le gblɔ̃a na nɔ̀vi wò àhùalewo be: “Mù nyà mì ɖoɖa ànyigbã mà-sɔɛwo ji, lè àmèjro dùkɔ̃wo dòmè. Vɔ̀a mù kpɔ̀tɔ̀ nɔ̀ mìa dòmè sìgbè àlekè mù wɔ̀ ɛ̀ lè kɔ̀kɔ̀ɛpea mè nène.”

¹⁷Sɔ ènyà kè ènyè Tɔhonɔ̀ Mawu, mù gblɔ̃ na wò kèa yì na wo be: “Mù la bɔ̀ mì so dùkɔ̃ kèwo mè mù kãkã mì ɖoa, eye mù la trɔ sɔ Izràɛl be ànyigbã a na mì yeye.

¹⁸Ne mì va yì ɖoa, mì la crɔ̃ vòdu sùmɔ̀sumɔ ku ènugbegble be àgbè nɔ̀nɔ lè mìa dòmè.

¹⁹Mù la na woa kpata èjì ɖèka ŋùkumè, eye mù la sɔ gbɔ̃gbɔ̃ yeye do woa mè. Mù la ɖè èkpe be èjìa lè woa mè eye mù la na wo èlãwɔ be èjì.

²⁰Nène a, wo la kpɔ ɖoɖo nyèwo ji, wo la nyi èse nyèa ji kpɔtɔwo. Eye wo la nyi àpe dùkɔ̃ eye mù la nyi woabe Mawu.

²¹Vɔ̀a, àmè kèwo kpɔ̀tɔ̀ le sɛ̃ vòduwo eye wo le wɔ̀ ènu dakà zɔ̃ ɖo woabe èjrowo jia, wo la xɔ̀ woabe ètodɔ̃wo.” Ènyè Tɔhonɔ̀ Mawu ye gblɔ̃ ɛ̀.”

²²Kèrubim kèwo lè kudo àfɔ̀kuawo vlũ woabe àwàdawo eye wo ɖèzɔ̃do ɖodu; Izràɛl be Mawu a be gogo gãa le klɛ̃ lè woabe ètamè.

²³E yomè a, gogoa zrò yì èdùa be dòdòmè eye e yì nɔ̀tè lè èto kè lè Yèruzàlɛm be èwèzɛ̃pea ji.

²⁴Gbɔ̃gbɔ̃ ŋua gbà kɔ mù yì Babɛ̀l be àhùaleawo gbɔ. Eye èdrɔ̃ kè mù le kua nɔ̀tè lè funu.

²⁵Eye mù gblɔ̃ ènu kèwo kpata Tɔhonɔ̀ sɔ fiɔ mù a na àhùaleawo.