Read gen Ezekìɛl 12 Bible Online

Ezekìɛl 12 - gen bible

Ezekìɛl 12

¹Tɔhonɔ̀ sɔ ènyàa gblɔ̃ na mù be:

²“Èwò àgbètɔ be èvi, wò lè dùkɔ̃ jèagla dòmè. Àmè kèwo ɖo ŋùku kpɔnuwo vɔ̀a, wo mu le kpɔ ènu ɖekpe ò. Wo ɖo èto sènuwo vɔ̀a, wo mu le sè ènu ɖekpe ò, ɖo wo nyi dùkɔ̃ jèagla.

³Èwò àgbètɔ be èvi, bla àgbã ne wòa zɔ̃ èmɔ̃. So jè èmɔ̃ dɔ̃ŋùkusu jàse lè woabe ŋùkumè! So jè èmɔ̃ yì sò ci ànyigbã bu ji lè woabe ŋùkumè. Tamu nyɔ òa, wo la kpɔ ɛ̀ do jèsi be yèwo nyi dùkɔ̃ jèagla nyàwo.

⁴Wò la to kudo àpo àgbãwo ŋùkèkè, lè woabe ŋùkuwo mè eye lè wètrɔ mèa, wò la so jè èmɔ̃ sìgbè àmè si àhùawo nène.

⁵Lè woabe ŋùkuwo mèa, wò la ŋɔ èglìa; eye wò la lɔ àgbã wòa to funu.

⁶Lè woabe ŋùkuwo mè ye wò la fɔ̀ ènuwo ɖo àbɔta. Wò la ɖè e to lè vìvìti mè, wò la sɔ ènu cɔ̃ ŋùkumè eye wò mu la kpɔ ànyigbã ò, ɖo mù ji be wòa nyi dosia na Izràɛl be àxuea.”

⁷Mù wɔ̀ ènu kè Tɔhonɔ̀ do àsi na mù a: lè ŋùkèkè mèa, mù ɖè ènu kèwo hiãa, eye lè wètrɔ mèa, mù ɖè èmɔ̃ ɖo èglìa mè. Àmèwo kpɔ mù le èmɔ̃ le yì lè vìvìtia mè kudo àgbã lè àbɔta.

⁸Kè èŋù kè ŋùdekɛ̃nyɛ̃a, Tɔhonɔ̀ be ègbèa ɖì na mù:

⁹“Èwò àgbètɔ be èvi, Izràɛlvi èkãsĩtɔwo mu biɔ wò sè be nukɛ ye wò le wɔ̀ lekèa ò?

¹⁰Ɖoeŋuti na wo be: “Tɔhonɔ̀ Mawu le gblɔ̃ na mì be ekèa nyi àŋɛ̀dodo na èfìɔvi kè le ɖùfìɔ lè Yèruzàlɛm kudo Izràɛlvi kèwo lè èdùa mèa kpata.”

¹¹Gblɔ̃ na wo be wò wɔ̀ ekèa ɖo e nyi àfɔ̀ ɖo àfɔ̀ ji be ènyà, ɖo wo la kplɔ̀ wo àhùale yì gàtɔnugbe.

¹²Èfìɔvi kè le kplɔ̀ woa, la dro yebe àgbãwo ɖo àbɔta lè vìvìti mè eye be la jo lè èdùa mè. Wo la ɖè èmɔ̃ ɖo èglìa mè ne bèa teŋu sɔ si jo. E la sɔ ènu cɔ̃ ŋùmè ne mu gbà nya fikè e tùtàa ò.

¹³Eye mù la tre èmɔ̃ nyèa na ɛ̀ sɔ le è. Mù la kplɔ̀ ɛ̀ yì Babɛ̀l be ànyigbã kèwo mu la kpɔ òa ji, vɔ̀ e la yì ku ci funu.

¹⁴Mù la kãkã yebe ŋutimewo kpata, gbãdãgbãwo ku jikpɔtɔawo, ɖo xixea be koŋù ènèawo mè. Eye mù la tĩ woa yomè kudo èwui.

¹⁵Ne mù kãkã wo ɖo dùkɔ̃wo ku àmèjro be èdùawo mè vɔ̀a, wo la kpɔ ɛ̀ kpò be ènyè ye nyi Tɔhonɔ̀.

¹⁶Wàlɛbɛ ŋua, mù la ɖè àsi lè ŋusù ɖewo ŋuti ne woa ci àgbè lè àhùa nu, àdɔ̀wùàmè kudo èdɔ̀vuɛ̃ nu. Wo la teŋu pò nupo so ènu kè jɔ̀ a ŋuti na àmè kèwo gbɔ wo yì sò cia. Leke woabe wɔ̀nà zũ èvlodonu ɖoa eye woa cã, wo la nya ɛ̀ be mù nyi Tɔhonɔ̀.”

¹⁷Tɔhonɔ̀ be ènyàa ɖì na mù be:

¹⁸“Èwò àgbètɔ be èvi, wò la ɖùnu lè gbledo mè eye wò la nù lè vɔ̃vɔ̃ ku tìtɔ̀ titɔ mè.

¹⁹E yomè a, wò la do àŋɛ̀ kèa na dùkɔ̃a kpata be: Tɔhonɔ̀ Mawu gblɔ̃ be Yèruzàlɛmvi kèwo ci Izràɛl nyigbã jia, la ɖù gbà nù lè vɔ̃vɔ̃ ku tìtɔ̀ titɔ mè. Nyàwoa, wo la gbã woabe èdùa ɖo wo wɔ̀ èhlɔ̃dãnuwo.

²⁰Èdùawo la gbã eye àgblètawo la trɔ zũ zògbè. Nène a ye mì la nya ɛ̀ be mù nyi Tɔhonɔ̀.”

²¹Tɔhonɔ̀ gbà gblɔ̃ na mù be:

²²“Èwò àgbètɔ be èvi, gblɔ̃ ènu kè ŋuti wo le do èlo kèa so Izràɛl nyigbã ŋuti ɖoa na mù be: “Gàmèa va le yì, co ŋùtègã ɖekpe mu le jɔ̀ ò”.

²³Eye gblɔ̃ na Izràɛlviwo be ènyè Tɔhonɔ̀ Mawu gblɔ̃ be nyè mu la gbà sè èlododo kèa ɖe ò. Wo mu la gbà gblɔ̃ ɛ̀ gbèɖe lè Izràɛl ò. Gblɔ̃ na wo bòhũ be: “Gàmè kè ye ŋùtègãwo kpata la va e mèa lili.”

²⁴Wo mu la gbà gblɔ̃ àjè be ŋùtègã ɖe àlo àjè be ènyà ɖe na Izràɛlviwo ò.

²⁵Ɖoa, ènyè Tɔhonɔ̀ ye le pò nupo eye ènu kè mù le gblɔ̃a la va e mè sɔ̀sɔɛɖe. Ɛ̀ɛ, lè mìabe àgbè mè ye mù la wɔ̀ ɖo ènu kè mù gblɔ̃, ɖo dùkɔ̃ trìtoa ŋutia ji. Ènyè Tɔhonɔ̀ Mawu ye gblɔ̃ ɛ̀”

²⁶E gbà gblɔ̃ ènyà na mù ke be:

²⁷“Èwò àgbètɔ be èvi, Izràɛlviwo le gblɔ̃ be àpo ŋùtègãwo mu la va e mè fifì ò, wò gblɔ̃ ènyà ɖɛ ɖo hùenu dìdìwo ŋuti.

²⁸Ekèa ŋutia, gblɔ̃ na wo be: Nène a ye Tɔhonɔ̀ Mawu gblɔ̃ be: “Ènyà ɖekpekpe kè mù la gblɔ̃a, la va e mè sɔ̀sɔɛɖe. Ènyè ye gblɔ̃ ɛ̀.”