Read gen Ezekìɛl 13 Bible Online

Ezekìɛl 13 - gen bible

Ezekìɛl 13

¹Tɔhonɔ̀ be ènyà gbà ɖì na mù be:

²“Èwò àgbètɔ be èvi, gblɔ̃ ènyà ɖɛ so Izràɛl be àmè kèwo sɔ woa ɖokoe wɔ̀ gblɔ̃ɖɛtɔwoa ŋuti. Gblɔ̃ àpe ènyà na wo ne woa sè.

³Ènu kè ènyè Tɔhonɔ̀ Mawu mù gblɔ̃a ye nyi be: Gbledo ke ye la jè gblɔ̃ɖɛtɔ màɖè sùsu kèawo ji! Wo kplɔ̀ woa ŋutɔwo be sùsuwo do, mà kpɔ ŋùtègã ɖekpe ò.

⁴Izràɛlviwo, mìabe gblɔ̃ɖɛtɔwo lè sìgbè wɛ̀tɛ̀klɛ̀wo nène lè èglìkpowo dòmè.

⁵Mì mu yì jrà èglìkpoawo ɖo ò eye mì mu trɔtù èglìkpa bu sɔ xɔ̀ na mìa ɖokoe lè Tɔhonɔ̀ be ŋùkèkèa gbè ò.

⁶Woabe àvìmènu ku ènyàgblɔ̃ɖɛwo nyi mìa ŋutɔ be susu ɖèɖe ku àjè. Àmè kèwo gblɔ̃nà be: “Tɔhonɔ̀ ye gblɔ̃ be”, vɔ̀ nyè mu do ègbè ɖekpe àsi na wo gbɔ̀xue ò. Wo kpɔna àsi nyè nu be mù la ɖo èkpe woabe ènyàa ji mà a!

⁷Co mù le gblɔ̃ be: “Mìabe àvìmènu mu nyi mìa ŋutɔwo be susu ɖèɖe eye mìabe ènyàgblɔ̃ɖɛwo cã mu nyi àjè gbaloa? Mì gblɔ̃nà be 'Tɔhonɔ̀ ye gblɔ̃ ɛ̀', co nyè mu gblɔ̃ ènyà ɖekpe ò.

⁸Ɛ̃ɛ ènyè Tɔhonɔ̀ Mawu, mù le gblɔ̃ ɛ̀ na mì be: Kè e nyi be mì le gblɔ̃ àjè ɖàɖa be ènyà ku àmè bèblea, mù la sitè ɖo mìa ŋuti.” Tɔhonɔ̀ Mawu ye gblɔ̃ ɛ̀!

⁹“Mù la ɖè ŋusɛ̃ nyèa fiɔ gblɔ̃ɖɛtɔ kèwo le gblɔ̃ ènyà zɔ̃ ɖo woabe susu ɖèɖewo ji eye wo le ɖà àjèa. Wo mu la kpɔ nɔ̀pe lè dùkɔ̃ nyèa mè ò. Woabe nyikɔwo mu la nɔ̀ Izràɛlviwo dòmè ò. Nène a ye mì la nya ɛ̀ be mù nyi Tɔhonɔ̀ Mawu.

¹⁰Gblɔ̃ɖɛtɔwo le blè dùkɔ̃ nyèa be ènuwo le zɔ̃ nyuɛ̃ ɖe wàlɛbɛ kè ye ènuwo le gblea. Wàlɛbɛ kè dùkɔ̃a le hlɔ̃ sɔ tù èglìa, woa ya, wo le sì àkalo na èglìa.

¹¹Eŋuã, gblɔ̃ na àkalosìtɔ kèawo be: Mìabe èglìa la mù wàlɛbɛ kè àya sɛ̃sɛ̃ la pò do èa eye èji sɛ̃ŋu kudo èsìkpe la xlɛ̃ vaa.

¹²Wàlɛbɛ kè èglìa la mù a, wo la biɔ mì sè be nukɛ àkalo kè mì sìa la gbà wɔ̀ fifì ò?

¹³Ènyà kè tutu ye ènyè Tɔhonɔ̀ Mawu mù le gblɔ̃a yeŋu. Àpe àdɔ̀mèzea la ɖè ègà àpe àya gblenua eye àdãwɔ̀wɔ nyèa la na èji jàja ku àya sɛ̃ŋuwo. Ekèa la wɔ̀ àtãŋu na mù ye mù la dɔ̃ èsìkpe jàja ɖoɖa sɔ crɔ̃ wo.

¹⁴Mù la gbã èglì kè mì sì àkalo na a gblò, yebe dodoewo la ci àma. E la mù cɔ̃ mìa ji eye mì la ku ci funu. Eye mì la nya ɛ̀ be mù nyi Tɔhonɔ̀.

¹⁵Mù la na jìbidã nyè ɖo èglì kèa ŋuti la wɔ̀dɔ kaka yì vɔ̀vɔnu. Wo la gblɔ̃ na mì be: “Èglìa mù gblò! E vɔ̀vɔ̀ na àkalosìtɔawo cã,

¹⁶e vɔ̀vɔ̀ na gblɔ̃ɖɛtɔ kèwo le gblɔ̃ ènyà ɖo Yèruzàlɛm be èsɔ̀ ŋuti ku kãkãɖoji, vɔ̀ ènu ɖekpe mu le zɔ̃ òa!” Ènyè Tɔhonɔ̀ Mawu ye le gblɔ̃ ɛ̀.

¹⁷Na èwò àgbètɔ be èvia, pò nupo na Izràɛl be nyɔ̃nù kèwo le gblɔ̃ ènyà ɖɛ lè woa ɖokoe sinu, eye ɖè wo sia lè àpe nyikɔ mè.

¹⁸Gblɔ̃ na wo be: Nène a ye Tɔhonɔ̀ Mawu gblɔ̃ be: Bàbà na àmè kèwo blana àvɔvi ɖo àlɔ̀tinu eye wo wɔ̀nà àvɔnu ɖèɖewo sɔ bla èta na àmèwo, ne woa teŋu dogà woabe àgbè! Mì la teŋu yì dogà dùkɔ̃mèvi nyèwo be àgbè ne mìabe àgbèa bèa kpɔ̀tɔ̀ nɔ̀ gãgã ɖe a?

¹⁹Mì le ɖìgbɔ mù lè dùkɔ̃ nyèa be ŋùkɔ̀, na èlù ku ènuɖùɖu viɖe kpò. Mì le hɛ̃ èku va àmè kèwo mu ɖo la ku òa ji eye mì le na àgbè àmè kèwo ɖo la ku lè dùkɔ̃ nyèa mè to mìabe àjèɖàɖaa ji.

²⁰Ekèa ŋuti ènyè Tɔhonɔ̀ Mawu, mù le gblɔ̃ na mì be mù la sitè ɖo mìabe àvɔvi kè mì sɔ le bla àmè buwo be àgbèa. Mù la sò wo lè àlɔ̀tinu na wo eye mù la tu èkà àmè kèwo mì blaa.

²¹Mù la zɛ̃ mìabe àvɔnu ɖèɖewo eye mù la tu sì na dùkɔ̃ nyèa to mìabe àlɔ̀wo mè. Mu la gbà jè mìabe èmɔ̃ tetrewo mè ke ò eye mì la nya ɛ̀ be ènyè ye nyi Tɔhonɔ̀.

²²Ɖo mì gbɔjɔna àmè jɔ̀jɔ̀ɛ a to àjèɖàɖawo ji, wàlɛbɛ kè nyè ŋutɔ nyè mu wɔ̀ ènu bàɖà ɖe ku ì ò a. Nène a mì dona ŋusɛ̃ àmè bàɖà ne mu gbà trɔ lè yebe ènu dakà a be wɔ̀wɔ mè, ne bè a nɔ̀ àgbè ò.

²³Eŋuã mì mu gbà ɖo àmè bèble be àvìmènu kudo àjèɖànya ɖe la gblɔ̃ ò. Mù xɔ̀ dùkɔ̃ nyè lè mìabe ŋusɛ̃ gɔ̃mè. Nène a ye mì la nya ɛ̀ be mù nyi Tɔhonɔ̀.”