Read gen Ezekìɛl 14 Bible Online

Ezekìɛl 14 - gen bible

Ezekìɛl 14

¹Gbè ɖèkaa Izràɛl be àmèsĩsĩwo va gbɔ nyè eye wo nɔ̀ ànyi sɔ kù ènu mè.

²Eye Tɔhonɔ̀ be ègbèa ɖì na mù. E gblɔ̃ be:

³“Èwò àgbètɔ be èvi, ɖo èto! Vòdu sɛ̃sɛ̃ xɔ̀ àmè kèawo be èjì do èse. Wo mu le ji la ɖè àgɔ̀jènua lè woabe ŋùku ta ò. Wo susu be mù la na èmɔ̃ ne woa sè ènyà ɖe so gbɔ nyèa?

⁴Gblɔ̃ ènyà kè ènyè Tɔhonɔ̀ Mawu, mù do àsi na wòa na wo be: Ne Izràɛlvi ɖe, na èmɔ̃ vòdu ɖù yebe èjìa ji eye yebe àgɔ̀jènua kpɔ̀tɔ̀ lè ŋùku ta na ɛ̀, vɔ̀ e va ji be yèa va xɔ̀ ènyà lè gblɔ̃ɖɛtɔa gbɔa, ènyè Tɔhonɔ̀ ŋutɔ ye la na ɛ̀ ɖoŋutia. Mù la wɔ̀ ekèa zɔ̃ ɖo vòdu gbogbo kèwo be le sɛ̃a ji.

⁵Ènyà kè mù gblɔ̃a, tɔ èjì na wo eye wo jo gble mù ɖɛ, ɖo lɔ̃lɔ̃ kè wo ɖo na woabe àjè vòduwoa ŋuti.

⁶Ekèa ŋuti, wò la gblɔ̃ na Izràɛlviwo be: “Tɔhonɔ̀ Mawu le biɔ so mìa si be: Mì ɖɔ̀lì èdɛ̃, mì trɔ lè mìabe vòduwo yomè. Mì ɖè àsi lè mìabe ènudrãwo wɔ̀wɔ ŋuti.”

⁷Ne Izràɛlvi ɖe àlo àmèjrovi ɖe, kè ɖo nɔ̀pe ɖo Izràɛl nyigbã jia, gble mù ɖɛ, ne e na vòduwo ɖù yebe èjì ji, le yebe àgɔ̀jènua ɖo ye ɖokoe ŋuti, eye e va la biɔ ènu kè mù le ji so e gbɔa lè gblɔ̃ɖɛtɔa sia, ènyè Tɔhonɔ̀ ŋutɔ ye la na ɛ̀ ɖoŋuti kè jè a.

⁸Mù la sitè ɖo ŋusù kèa ŋuti, mù la sɔ yebe kpɔwɔɛ̀a wɔ̀ àlòbalò be ènyà. Mù la ɖè è to lè dùkɔ̃ nyèa dòmè eye mì la kè ɖo ŋuti be mù nyi Tɔhonɔ̀.

⁹Ne gblɔ̃ɖɛtɔ ɖe ŋlɔ̀be ye ɖokoe eye be le ɖo ènyà ŋuti lè ye ɖokoe sinua, ènyè Tɔhonɔ̀ ŋutɔ ye la na be la gbà bu kpe è. Mù la sitè ɖo e ŋuti eye mù la ɖè è to lè Izràɛl, dùkɔ̃ nyèa mè.

¹⁰Gblɔ̃ɖɛtɔ kèa kudo àmè kè la yì kù ènu gɔ̃mè lè ye gbɔa, woa kpata nyi àgɔ̀jètɔ eye ètodɔ̃ ɖèka ŋua ye la jè woa ji godo.

¹¹Àleke be Izràɛlviwo mu gbà trã èmɔ̃ boo lè gbɔ nyè ò. Wo mu gbà wɔ̀ woa ɖokoe mà-kɔ̀ mà-kɔ ɖo woabe àgɔ̀jèje gbogboawo ŋuti ò. Vɔ̀a, woa nyi àpe dùkɔ̃ eye ma nyi woabe Mawu. Ènyè Tɔhonɔ̀ Mawu ye gblɔ̃ ɛ̀.”

¹²Tɔhonɔ̀ be ègbèa ɖì na mù:

¹³“Èwò àgbètɔ be èvi, mi sɔ ɛ̀ be dùkɔ̃ ɖe jè àgɔ̀ do mù, ɖo mu wɔ̀ ànùkua ò. Mù la ɖè ɖokoe nyè fiɔ ɛ̀. Mù la xɔ̀ ènuɖùɖu lè e si, la ɖo àdɔ̀toto ɖoɖa ɛ̀. Mù la crɔ̃ yebe àmèwo kudo èlãwo lè ànyigbã a ji. E

¹⁴Ne àmè ètɔ̃ sìgbè Nɔà, Dànèl kudo Yɔb[3] lè dùkɔ̃a mè cã a, woa ŋutɔ woa ɖokoe kpò wo la hlùɛ̃. Ènyè Tɔhonɔ̀ Mawu ye gblɔ̃ ɛ̀.

¹⁵Àlo mù la ɖo èlã wɔ̀adã ɖe ɖo èdùa mè ne bèa vũvũ àmèwo kpataa. Èdù kèa la trɔ zògbè. Àmè ɖe mu la gbà yì to funua ò, ɖo èlã kèa ŋuti.

¹⁶Ne ŋusù ètɔ̃ kèwo mù yɔ jè ŋùkɔ̀a, kpò ye lè dùkɔ̃a mèa, woawo kpò ye la ci àgbè. Ènyè Tɔhonɔ̀ Mawu àgbèagbea ye gblɔ̃ ɛ̀. Wo mu la teŋu hlùɛ̃ woabe èviwo ŋutɔ cã ò, eye ànyigbã la trɔ zògbè.

¹⁷Àlo mù la sɔ èwui ɖo dùkɔ̃a ŋuti. Mù la gblɔ̃ be: “Èwui ne gblenu to dùkɔ̃a mè!” Ne bèa crɔ̃ àmèwo kudo èlãwo.

¹⁸Ne ŋusù ètɔ̃ kèwo mù yɔ sãa, lè dùkɔ̃a mèa, woawo kpò ye la ci àgbè. Wo mu la teŋu hlùɛ̃ woabe èvi ŋusù àlo nyɔ̃nù ò. Ènyè Tɔhonɔ̀ Mawu ye gblɔ̃ ɛ̀.

¹⁹Àlo mù la gbà dɔ̃ èdɔ̀vuɛ̃ ɖoɖa dùkɔ̃ kèa. Mù la ɖè àdɔ̀mèze nyèa ɖo woa ji to gbledo gã kèa mè eye mù la crɔ̃ àmèwo kudo èlãwo lè ànyigbã a ji.

²⁰Ne e tɔ̀ be Nɔà, Dànèl ku Yɔb lè dùkɔ̃ kèa mè ŋutɔ cã a, kaka kè ènyè Tɔhonɔ̀ Mawu mù kpɔ̀tɔ̀ lè àgbèa, wo mu la teŋu hlùɛ̃ woabe èviwo ŋutɔ cã ò.”

²¹Ɛ̃ɛ, Tɔhonɔ̀ Mawu gblɔ̃ nènea be: “To e gbɔ be mù sɔ kòjoɖoɖo ènè jiŋɔ kèawo: èwui, àdɔ̀wùàmè, èlã wɔ̀adãwo kudo èdɔ̀vuɛ̃ ɖo Yèruzàlɛm ŋuti, sɔ crɔ̃ àgbètɔwo kudo èlãwo cã a,

²²àmè ɖewo la kpɔ̀tɔ̀ ci àgbè lè ŋusùwo ku nyɔ̃nùwo dòmè. Wo la va mìa gbɔ eye mì la kpɔ woabe àgbènɔ̀nɔ ku wɔ̀nawo. Funu ye mì la trɔ mìabe susu lè gbledo kè mù sɔ pò Yèruzàlɛm be dùkɔ̃a ŋuti.

²³Wo la ɖo àsi àkɔ na mì. Ne mì kpɔ woabe jìjɔɛ kudo wɔ̀naa, mì la nya ɛ̀ be mu nyi gbalo ye mù wɔ̀ ènu kèa ɖo ò. Tɔhonɔ̀ Mawu ye gblɔ̃ ɛ̀.”