Read gen Ezekìɛl 16 Bible Online

Ezekìɛl 16 - gen bible

Ezekìɛl 16

²“Èwò àgbètɔ, ɖè Yèruzàlɛm be wɔ̀na nyànyrãawo fiɔ ɛ̀.

³Gblɔ̃ ènyà kè ènyè Tɔhonɔ̀ Mawu mù gblɔ̃ na ɛ̀ be: Kanàn nyi tɔgbe wòwo be ànyigbã, fikè wo jì wò lèa. Ètɔ wòa nyi Amɔrìtɔ eye ènɔ̀ wò nyi Hitìvi.

⁴Eye wàlɛbɛ kè wo jì wòa, wo mu sò àhɔ̃kã na wò kaka la va lè èsì na wò ò. Wo sɔ èjè sɔ lìlì ŋuti na wò eye wo mu xasa àvɔ ɖo ŋuti na wò ò.

⁵Àmè ɖekpe be ŋuzĩzĩ be ŋùku mu kpɔ wò kaka ne bèa wɔ̀ ènu kèawo dòmètɔ ɖèka tètè na wò ò. Gbɔ vuɛ̃ tɔ̀a, wò wɔ̀ àtãŋu na wo eye wo sɔ wò dãŋùgbe àma-àma ɖo ànyigbã lè àpo jìjigbè.

⁶Mù to àkpa ɖèka na wò eye mù kpɔ be wò le blìbɔ̀ lè èhũ mè. Eye to e gbɔ be èhũ gbã ble wò cã a, mù gblɔ̃ na wò be “nɔ̀ àgbè!”

⁷Mù na wò sĩ sìgbè ègbemè be àti nène. Wò sĩ yìji eye wò vlũ lè ɖokoe wò sinu va zũ tùgbɛ̀jɛvi àgbòjãjã. Àpo ànɔwo ze eye èfuawo cã to nyuɛ̃ ɖe, vɔ̀a, wò kpɔ̀tɔ̀ lè àma-àma.

⁸Mù gbà va to àkpa ɖèka na wò ɖe, eye mù kpɔ be wò ɖo àmè lɔ̃lɔ̃ be èpè mè. Nène a ye mù kèkè àwà gã nyèa sɔ cɔ̃ àpo àma. Mù kã àtãŋu na wò be mù la wɔ̀ ànùkua eye mù ɖùzò kudo wò. Nène a, wò nyi tɔ̀ nyè. Ènyè Tɔhonɔ̀ Mawu ye gblɔ̃ ɛ̀.

⁹Mù sɔ èsì sɔ klɔ èhũ kè lè ŋuti na wòa eye mù sì àmì huɛ̃ titi na wò.

¹⁰Mù sɔ àvɔ kè ŋuti wo lɔ̃ èkà vòvòwo ɖoa be àwù sɔ cɔ̃ na wò, do ènyɔ-gbàze be àfɔ̀kpa, àlɛ̃ŋudà be àvɔ kudo sedà ɖèɖe.

¹¹Mù ɖo àcɔ na wò ku àcɔɖonu vòvòwo; àlɔ̀tinu gawo kudo èkɔ̀gawo.

¹²Mù do gàvi ɖo ŋɔ̀ti na wò, do gàviwo ɖo àpo ètowo eye mù sɔ jègbà nyuɛ̃ ɖe ɖo èta na wò.

¹³Wò do sìka ku klòsalò kplìnyàa, àpo àwùwo nyi àlɛ̃ŋudà, sedà kudo àvɔ kèwo ŋuti wo tɔ̃ èkà nyuɛ̃wo ɖoa. Ènuɖùɖu wòa nyi èwɔ meme, ànyisì kudo àmì. Àpo kpɔkpɔmè gbà nyakpɔ ŋutɔ kaka be wò jè na èfìɔsrɔ̃ nyinyi.

¹⁴Àpo nyiɖìɖia gbã ɖo dùkɔ̃wo kpata mè, sɔ kù ɖo àpo tùgbɛ̀jɛ jèje tɔ̀xɛa ŋuti. Ɖo mù ɖo àcɔ na wò àkòŋùka. Ènyè Tɔhonɔ̀ Mawu ye gblɔ̃ ɛ̀.”

¹⁵“Vɔ̀a, wò dojì ɖo tùgbɛ̀jɛ jèje wòa ŋuti, wò to nyiɖìɖi wòa ji sɔ wɔ̀ àhasì eye wò yì dɔ̃ kudo ŋusù ɖekpekpe kè va le yìa. Nène a ye wò trɔ zũ woabe ènuzãzã.

¹⁶Wò sɔ àpo àvɔ xɔ̀asì be ɖewo yì jrà tèpe xɔ̀asìwo ɖo eye wò wɔ̀ àhasì lè funu. Ènu kèa mu jɔ̀ kpɔ ò eye mu la gbà jɔ̀ gbèɖe ke ò.

¹⁷Wò sɔ sìka ku klòsalò be àcɔɖonu kèwo mù na wòa, sɔ yì jɔ̀ bocɔɛ ŋusùtɔ̀. Eye wò wɔ̀ àhasì kudo wo.

¹⁸Wò sɔ àpo àwù kèwo ŋuti wo tɔ̃ èkà nyuɛ̃wo ɖoa, sɔ do na wo. Wò na wo àmì kudo lifi nyè.

¹⁹Ne wòa jè ŋùmè na woa, wò sɔ ènuɖùɖu kèwo mù na wòa, sɔ wɔ̀ vɔsa na wo: èwɔ meme, ànyisì kudo àmì. Ènyè Tɔhonɔ̀ Mawu ye gblɔ̃ ɛ̀.

²⁰Wò sɔ èvi wò ŋusùwo ku nyɔ̃nù kèwo wò jì na mù a, wɔ̀ vɔsa na wo. Àpo àhasìa mu kpɔ sù hàɖe òa?

²¹E va hiã cã be wòa wù èvi nyè ŋusùwo na àpo legbawo!

²²Lè èhlɔ̃dãnu kudo àhasì wɔ̀wɔ kèawo mèa, Yèruzàlɛm, wò mu ɖoŋùku àpo tùgbɛ̀jɛ mè, wàlɛbɛ kè wò nɔ̀ àma-àma eye wò le blìbɔ̀ lè èhũ wòa mè ò.

²³Kpɔ àɖìkunu kèa hɛ̃ gbledo va ɖokoe wò ji ɖo ènu bàɖà kèwo wò wɔ̀a ŋuti. Ènyè Tɔhonɔ̀ Mawu ye gblɔ̃ ɛ̀.

²⁴Co wò yì tù àhasìwɔ̀pe, wò wɔ̀ legbaviwo cã na vɔsa wɔ̀wɔ.

²⁵Lè èmɔ̃wo kpata toa, wò wɔ̀ legbavi ɖɛ. Eye lè funua, wò zã tùgbɛ̀jɛ jèje wòa na bùsunu. Wò sɔ ɖokoe wò na àmèwo gbãŋùjo, eye àhasì wòa gbà dri ɖoji.

²⁶Eye wò wɔ̀ àhasì kudo Ejiptèvi[5], kèwo nyi àmè trì àgbàa, wò gbà wɔ̀ ɛ̀ sùsuiɖe sɔ fɔ̃ àdɔ̀mèze nyèa.

²⁷Nène a ye mù ɖè àbɔ nyèa be ŋusɛ̃ ɖo ji wò. Mù xe nuɖùɖu be mɔnu na wò, sɔ wò do àsi na kɛ̃tɔ wò nyɔ̃nùwo lè Filistì nyigbã ji. Àpo àzɔ̃lì gbegblea, wɔ̀ àtãŋu na àmè kèawo.

²⁸Kè e tɔ̀ be mu sù wò òa, wò yì wɔ̀ àhasì kudo Àsirìaviwo, co gãke mu kpɔ sù na wò ò.

²⁹Wò gbà yì àhasì wɔ̀wɔ wòa ji kudo Kanàn, lè Kaldea nyigbã ji, co mu kpɔ sù na wò ò.

³⁰Oò ègbɔɖìamè be ènu kɛ ye kèa! Lè ekèa mèa, wò wɔ̀ kpò sìgbè àhasìtɔ nène. Ènyè Tɔhonɔ̀ Mawu ye gblɔ̃ ɛ̀.

³¹Wò tù àhasìwɔ̀pe ɖo èmɔ̃ ɖe sia ɖe nu eye wò jrà legbaviwo ɖo tèpewo kpata. Co wò mu biɔna àhasì wɔ̀wɔ be àjɔ̀ cã ò.

³²Nyɔ̃nù àhasìtɔa xɔ̀nà àmèjrowo ɖo èsrɔ̃a tèpe.

³³Àhasìtɔwo kpata xɔ̀nà èfɛ̃tu. Vɔ̀ èwò ya, wò nana ènu àzìãvi wòwo fàa: Ɖo, to ekèa be wɔ̀wɔ mè ye wo trɔ zũ àzìãviwo na wò lè àhasì wɔ̀wɔ mè.

³⁴Wò wɔ̀ nyɔ̃nù àhasìtɔwo be ènua be àkpa sãgãa. Wo mu jina wò kaka la va na wò àjɔ̀ ò, vɔ̀ èwò ŋutɔ ye sɔna ɖokoe wò na gbãŋùjo. Nène a ye wò trɔ ɖoɖoawo.

³⁵Ye ŋutia Yèruzàlɛm, àhasìtɔ sè Tɔhonɔ̀ be ègbè!

³⁶Kpɔɖa, ènyà kè ènyè Tɔhonɔ̀ Mawu mù gblɔ̃a ye nyi ekèa be: Kè e nyi be wò ɖo ɖokoe wò àma, eye wò gble ŋùkpɛ̃ tèpeawo ɖo gàglàgbè, na àzìãvi ku legbavi wòawo, kaka gbà kɔ̀ èvi wòwo be èhũ ɖo ànyi na wo.

³⁷Eŋuã ŋuti ye mù la bɔ̀ àpo àzìãvi kèwo kpata wò do èxa kudoa, àmè kèwo wò lɔ̃ ku kèwo wò crìa; mù la bɔ̀ wo ɖo ŋuti wò. Mù la na eye wo la kpɔ àpo àma mè.

³⁸Mù la dɔ̃ èto na wò sìgbè lekè wo wɔ̀nà na nyɔ̃nù àhasìtɔ kudo àmè kè dãhlɔ̃a nène. Mù la na wò la ci èhũ mè to àdɔ̀mèze kudo èhlɔ̃biɔbiɔ nyèa ji.

³⁹Mù la ɖè wò do àsi na àzìãvi wòawo. Wo la gbã àhasìwɔ̀pe wòa. Wo la hlà àpo ènuwo ku sìkanuwo eye wo la gble wò ɖɛ àma-àma.

⁴⁰E yomè a, wo la ɖè wò do àsi na àmèha eye wo la pò èkpe wò, wo la flì wò lè èwui nu.

⁴¹Wo la ɖè èzò ɖo àxue wòawo mè. Nène a ye wo la wɔ̀ ɖo èkufiɔ kè wo sò na wòa ji lè nyɔ̃nù gbogbowo be ŋùkɔ̀. Mù la nɔ̀tè àhasìwɔ̀wɔ wòa eye wò mu la gbà tufɛ̃ na àpo àzìãviwo ke ò.

⁴²Mù la dɔ̃ èto na wò kaka yì vɔ̀vɔnu, eye ne àdɔ̀mèze nyèa ɖiɖia, mù la nɔ̀ kpoo.

⁴³Wò ŋlɔ̀be ènu kè mù nyi na wò lè vifɛ̃mèa. Wò fɔ̃ àdɔ̀mèze nyèa to àpo wɔ̀na mè. Nyè cã mù la na wò la tu yebe èfɛ̃a kpata. Tɔhonɔ̀ Mawu ye gblɔ̃ ɛ̀. Nyàwoa, wò nɔ̀ àgbè bàɖà lè èhadodo ku vòduwo mè.”

⁴⁴“Yèruzàlɛm, èlodotɔwo la gblɔ̃ so ŋuti wò be: “Àlekè ènɔ̀ wò lèa ke èwò èvia nyɔ̃nùa cã wò lè”.

⁴⁵Nyàwo, ènɔ̀ wò be èvi nyɔ̃nù ŋutɔ ye wò nyi. E gbe èsrɔ̃a kudo èviawo. Wò ɖì dàda kudo nɔ̀vi wò nyɔ̃nù kèwo crì woa srɔ̃ kudo woabe èviawo. Mìa tɔ nyi Hitìvi jìji eye mìa nɔ̀ ya nyi Àmorìvi.

⁴⁶Dàda wò àmègãxotɔa nyi Sàmarìa, lè èvègo lè èdù viwo dòmè. Nɔ̀vi wò nyɔ̃nùvia nyi Sodɔ̀m lè àpùgo lè èdù viwo dòmè.

⁴⁷Wò mu kplɔ̀ dàda wò ku nɔ̀vi wò nyɔ̃nùviawo do ɖèɖe kpò ò. Wò gbà ɖù èzãnu wu wo lè èmɔ̃ ɖekpekpe nu.

⁴⁸Ènyè Tɔhonɔ̀ Mawu kè lè àgbèa ye le gblɔ̃ ɛ̀ na wò be nɔ̀vi wò Sodɔ̀m ku èdù viawo mu wɔ̀ ènu kpòtoe kèawo hati lè woabe àgowo ji ò.

⁴⁹Nɔ̀vi wò Sodɔ̀m be àgɔ̀jèjea ye nyi be: e kona ànya ɖo ènuɖùɖu sù ì. E ye kudo èvi nyɔ̃nùviwo lè àgbɔ̃jèpò gã ɖe mè. Vɔ̀ wo mu kãmana na wɔ̀amènɔ̀wo ku ènuwɔ̀donɔ̀wo ò.

⁵⁰Wo jra kaka be wo wɔ̀ ènu jiŋɔwo. Nène a ye mù crɔ̃ wo lè ànyigbã ji sìgbè lekè wò ŋutɔ wò nya ɛ̀ nène.

⁵¹Sàmarìa ya, mu wɔ̀ èvuɛ̃ wòa be àkpa ɖèka tètè gbɔ̀xue ò. Àpo èhlɔ̃dãnuwo sùgbɔ wu ye tɔ̀a. Wo lè kpò sìgbè ɖemànyatɔwo nène lè àpo ènu nyànyrãwo gbɔ.

⁵²Eŋuã fifìa, wò cã wò la dro èvlododo wòa be àgbã! Wò tutu dàda wò ku nɔ̀vi wòwo be àgɔ̀wo. Wo trɔ va lè jɔ̀jɔɛ sɔ wu èwò ŋutɔ!

⁵³Mù la trɔ tù èdù kèawo: mù la gbìgbɔ̀ trɔ jrà wo ɖo, woa ku woabe èdù viawo.

⁵⁴Eye wò la kpɔ be yè bu yèbe hùɛ̃yia lè woabe èdùawo be jàjràɖoa gbɔ.

⁵⁵Sodɔ̀m ku Sàmarìa la trɔ kpɔ woabe àsìxɔ̀xɔ sãtɔ̀a ku woabe èdù viawo. E la nyi nène na wò kudo èdù vi wòawo cã, Yèruzàlɛm.

⁵⁶Lè hùenu kè wò kpɔ̀tɔ̀ jrana a, wò pònà nupo bàɖà so Sodɔ̀m ŋuti.

⁵⁷Ekèa va e mè gbɔ̀xue wo va kè ɖo àfɛ̃nu wɔ̀wɔ wòa ŋuti. Fifìa, èwò ye Edɔ̀m ku yebe èdù viwo kaka jè Filistì be èdùwo le zũ. Lè àfi sia àfia, wo gblɔ̃nà be yèwo crì wò.

⁵⁸Lè funua, wò ŋutɔ ɖèka kpò ye la kpe àkɔ ènu gbegble kèwo wò wɔ̀a be emèsonuwo. Ènyè Tɔhonɔ̀ Mawu ye gblɔ̃ ɛ̀.

⁵⁹“Ɖo ekèa ŋuti ye ènyè Tɔhonɔ̀ mù le ɖè è gblɔ̃ be: wò mu kãma na àjɔ̀gbè kè wò fìã ò eye wò gbã zòɖùɖua. Nène a, mù la wɔ̀ ku wò sìgbè àlekè e jèa.

⁶⁰Vɔ̀ nyè ya, mù la ɖo ŋùku èzò kè mù ɖù ku wò lè ɖèvi mèa ji. Eye mù la trɔ ɛ̀ wɔ̀ zòɖùɖu kòkòɖàbì.

⁶¹Wò la ɖoŋùku ènu gbegble wòwo eye ŋùkpɛ̃ la le wò, wàlɛbɛ kè wò la nɔ̀ dàda wò ku nɔ̀vi wò nyɔ̃nùwo be ŋùkumèa. Mù la sɔ wo na wò sìgbè èvi wòwo nène, coa mu lè ɖoɖo nyèa mè ò.

⁶²Mù la trɔ wɔ̀ zòɖùɖu nyèa yeye kudo wò eye wò la nya ɛ̀ be mù nyi Tɔhonɔ̀.

⁶³Funua, wò la ɖoŋù ŋùkèkè kèwo va yìa eye èŋù la kpɛ̃ wò veveɖe. Wò mu la gbà jro la pò nupo ò. Vɔ̀ nyè ya, mù la sɔ èvuɛ̃ kè wò wɔ̀a kpata be àgɔ̀jèjewo sɔ kè. Ènyè Tɔhonɔ̀ Mawu ye gblɔ̃ ɛ̀.”