Read gen Ezekìɛl 17 Bible Online

Ezekìɛl 17 - gen bible

Ezekìɛl 17

¹Tɔhonɔ̀ be ègbèa ɖì na mù gblɔ̃ be:

²“Èwò àgbètɔ be èvi, sɔ àlòbalò ɖe ɖo ŋùkumè na Izràɛlviwo. Do èlo kèa na wo.

³Wò la gblɔ̃ be: Nène a ye Tɔhonɔ̀ Mawu gblɔ̃: “Èhɔ̃ gã jiŋɔ ɖe lè[6], yebe àwàdawo kèkè gbà trì, e ɖo èfu dìdi kèwo ɖo kɔlà hamè-hamè. E zrò kaka va ɖo Libàn be ètowo ji. E yì ŋɛ̃ Sedàti ɖe be ètamè.

⁴E sũ sedàti ɖe be àɖɔ̀mè. E ŋɛ̃ yebe àlɔ̀zɛ̃ kè yì ji wua. E sɔ ɛ̀ yì àsìsàtɔwo be ànyigbã ji, yì dà ɖo ènusàtɔwo be èdùa mè.

⁵E trɔ sɔ àti dodo fɛ̃fɛ̃ bu lè Izràɛl nyigbã ji, yì va ɛ̀ ɖo àbɔ viɖe mè lè èsì gã ɖe gbɔ, ɖo àti kèa jina èsì sùgbɔ.

⁶Wàlɛbɛ kè àti kèa sĩa, e trɔ zũ vɛ̃ka nyakpɔ ɖe. E ɖo àlɔ̀zɛ̃ kplìnyà yì àgo kè ji èhɔ̃ gãa lèa. Yebe èkèwo cã yì funua ke. E nyi vɛ̃ka ɖe kè ɖona àlɔ̀zɛ̃ ye yèwo tɛ̀gbɛ̀.

⁷Vɔ̀a, èhɔ̃ èvègɔ̃ bu[7] cã gbà va. Yebe àwàdawo kèkè gbà trì, yebe èfuwu sùgbɔ. Nène a ye vɛ̃kaa gbà trɔ yebe èkèwo ɖoɖa e cã gbɔ eye e trɔ yebe àlɔ̀zɛ̃ yeyewo ɖoɖa fikè be lèa. E le susu be yè la kpɔ èsì sùgbɔ so funu sɔ wu fikè yè lè sãa.

⁸Vɔ̀a, ànyigbã nyuɛ̃ ɖe ji ye wo do è ɖo gãke, lè èsì sùgbɔ ɖe gbɔ ne bèa teŋu nɔ na àlɔ̀zɛ̃ yeye kèwo ji kusɛ̃sɛ̃wo lè tɛ̀gbɛ̀ eye e la trɔ zũ vɛ̃ka nyakpɔ ɖe.”

⁹“Gblɔ̃ ɛ̀ be nène ye Tɔhonɔ̀ Mawu gblɔ̃a yeŋu: “Vɛ̃ka kèa la teŋu nyɔ nyuɛ̃dea? Èhɔ̃ jiŋɔa mu la fli yebe èkèwo, kusɛ̃sɛ̃wo na ɛ̀, eye yebe àlɔ̀zɛ̃ ye yèwo la pua? Mu la hiã ŋusɛ̃ gã ɖe àlo àhùakɔ̃ sùgbɔ gbɔ̀xue la hɔ̃ ɛ̀ jo lè funu ò.

¹⁰Wo do vɛ̃ka ya, vɔ̀a, mu la teŋu sĩ la vlũ ò. Ne èwèzɛ̃pe be àya pò to e jia, e la pu kplakpla. E la pu lè ànyigbã kè ji wo do è ɖoa!”

¹¹Tɔhonɔ̀ gblɔ̃ na mù be:

¹²“Biɔ àmè jèagla kèawo be wo mu kpɔ le sè èlododo kèa mè ò mà a! Ɖo ŋùku lekè Babɛ̀l be èfìɔa gɛ̃ ɖo Yèruzàlɛm, va le èfìɔa kudo ègawo eye e kplɔ̀ wo yì gàtɔnugbe lè Babɛ̀l ɖoa.

¹³E yomè a, e sɔ àmè ɖèka lè èfìɔsaa mè. E ɖùzò kudo è eye e na e kã àtãŋu na ɛ̀ lè ànùkua mè. Eye e kplɔ̀ cãmìwo kpata jo lè èdùa mè.

¹⁴E wɔ̀ ekèa, ne èdùa mè ne fa leke be àmèwo ne nɔ̀ ɖoɖo a gɔ̃mè.

¹⁵Vɔ̀a èfìɔ yeyea sitè ɖo jiɖùtɔa ŋuti, e dɔ̃ àmè ɖoɖa Ejiptè ne woa na ɛ̀ èsɔwo kudo àhùasukawo sùgbɔ. Àmè kè le wɔ̀ nènea la teŋu ɖùjia? E la teŋu to lè emè wàlɛbɛ kè be gbã zòɖùɖua? Kpao!

¹⁶“Ènu kè ènyè Tɔhonɔ̀ Mawu àgbèagbea mù sɔ le ɖokpe ekèa jia ye nyi be: èfìɔ kèa la crɔ̃ lè èfìɔ kè ɖo è èfìɔa be ànyigbã ji. Ɖo mu wɔ̀ ɖo àjɔ̀gbè kè be fìã ji ò. E gbã zòɖùɖua, kaka Babɛ̀l be la yì ku lè.

¹⁷Faraɔ̀n mu la sɔ àhùakɔ̃ gbogbo sɛ̃ŋu ɖe sɔ va do è àlɔ̀ wàlɛbɛ kè ye Babɛ̀l be àhùakɔ̃a la kù èdowo, la gbà ɖo àgbògbò viwo sɔ lɔ àmèwo jo ò.

¹⁸Wàlɛbɛ kè e gbã ɖoɖo kè wo wɔ̀a, eye e le ji èmɔ̃nu bua, eŋuã mu la teŋu to lè emè ò.

¹⁹“Kpɔ ènyà kè ènyè Tɔhonɔ̀ Mawu àgbèagbea, mù le gblɔ̃a ye nyi be: Ɖoɖo nyè ye be gble, zòɖùɖu nyèa ye Izràɛl be èfìɔa gbã. Mù la na yebe ètodɔ̃a la jè ye ŋutɔ ji dodo.

²⁰Mù la tre èmɔ̃ sɔ le è, eye mù la kplɔ̀ ɛ̀ yì kaka Babɛ̀l nyigbã ji. Funu ye mù la gblehùɛ do è lè ɖo èhlɔ̃dãnu kè be wɔ̀ kudo mù a ŋuti.

²¹Wo la wù yebe àhùasukawo eye àmè kèwo la ci àgbèa, la kãkã ɖo ànyigbã be koŋù ènèawo ji. Mì la nya ɛ̀ wàlɛbɛ ŋua be ènyè Tɔhonɔ̀ ye gblɔ̃ ɛ̀.”

²²“Ènyà kè ènyè Tɔhonɔ̀ Mawu mù le gblɔ̃a ye nyi be: Mù sò sedàti be àlɔ̀zɛ̃ vi ɖe lè àtia be ètamè. Yebe àlɔ̀zɛ̃ vi kpɔ̀tɛa ye mù la sɔ yì do ɖo èto gã yì ji boo ɖe ji.

²³Mù la yì do è ɖo Izràɛl be èto gãa ɖe ji. E vlũ nyuɛ̃ ɖe eye yebe àlɔ̀zɛ̃wo la na èkusɛ̃sɛ̃wo. E la nyi sedàti nyakpɔ ɖe. Àyamè xèviwo la va wɔ̀ àtɔ̃ ɖo yebe àlɔ̀zɛ̃wo mè eye wo la nɔ̀ yebe fàfagbè.

²⁴Nène a àvemètiwo kpata la nya be ènyè ye nyi Tɔhonɔ̀a. Mù sònà àti gã yì jiwo eye mù gbà nana àti viwo cã mìɔ̃ nà. Mù nana àti vùdù buwo puna eye mù trɔ nana àgbè kèwo pua. Ènu kè ènyè Tɔhonɔ̀ mù gblɔ̃a ye mù wɔ̀nà tututu.”