Read gen Ezekìɛl 18 Bible Online

Ezekìɛl 18 - gen bible

Ezekìɛl 18

¹Tɔhonɔ̀ be ègbè ɖì na mù gblɔ̃ be:

²“Nukɛ ŋuti wo kpɔ̀tɔ̀ le gblɔ̃ èlododo be ènyà kèa lè Izràɛl be: “Àjìtɔwo ɖù rɛ̀zɛ̃ gboògbo, vɔ̀ ɖèviawo ye àɖu le nyinyi ò?”

³Kaka kè mù lè àgbèa, ènyè Tɔhonɔ̀ Mawu, mù le kãɖoji na mì be, èlododo kèa mu la gbà ɖì lè Izràɛl ò.

⁴Nyàwoa, àmè sia àmè be àgbè lè àsi mè na mù, so àjìtɔwo ji kaka jè ɖèviawo ji. Eŋuã àmè kè jè àgɔ̀a ye ɖo la ku.

⁵Àmè kè lè jɔ̀jɔɛ, eye e le wɔ̀ ènu kè jè gbà sɔ̀gbè ŋùmèkãkã mà-ɖoa ye.

⁶Mu kpɔna ègomè lè vòduwo be sɛ̃sɛ̃ mè kaka la ɖù èhũkpamè be ènu lè ètowo ji ò. Mu dona àsi àmè bu be èsrɔ̃ ŋuti kaka la dɔ̃ ku nyɔ̃nù kè lè àsiɖoànyi mè ò.

⁷Mu tanafu àmè kaka la va fĩ ì ò. E trɔna àwòbanuwo nana, e nana nuɖùɖu kudo àwù, àmè kè lè èhiã mèa.

⁸Mu dona ènu, va biɔna jì ɖo ji àlo àlè ò. Eye mu ɖùnà èzãnu ò. E ɖona kòjo jɔ̀jɔɛ, àmè ŋùkumè mà kpɔ.

⁹E kpɔna èse nyèwo ji. E wɔ̀nà ànùkua lè ɖoɖo nyèwo mè. Àmè jɔ̀jɔɛ ŋutɔ ye be nyi eye e la nɔ̀ àgbè. Ènyè Tɔhonɔ̀ Mawu ye gblɔ̃ ɛ̀.

¹⁰Mia sɔ ɛ̀ be ŋusù ɖe ɖo èvi ŋusù kè nyi àjòglasu. E wùnà àmè gbà wɔ̀nà èhlɔ̃dãnuwo kpata.

¹¹To e gbɔ be ètɔa ya mu wɔ̀ ènu kèawo be ɖekpe kpɔ òa, e ya kpɔna gomè lè vɔsa wɔ̀wɔwo mè lè ètowo tamè. E wɔ̀nà àhasì kudo àmè buwo be nyɔ̃nù.

¹²E tafuna wɔ̀amènɔ̀ ku ènuwɔ̀donɔ̀wo. E fĩnà àmè, gbà hlànà àmèwo be ènuwo mà kpɔ ŋùgbe. Mu ɖùnà èfɛ̃, tuna ò. E sɛ̃nà vòduwo gbà wɔ̀nà ènu dakàwo.

¹³E dona ègà jì ga kudo àlè. Àmè kèa la teŋu nɔ̀ àgbèa? Kpao! E wɔ̀ ènu dakà kèawo kpata. E la ku eye yebe èhũa la kɔ̀ ɖo ye ŋutɔ ji.

¹⁴Mia sɔ ɛ̀ be ètɔ ɖe ɖo èvi ɖèka, kè kpɔ ètɔa be ènu dakà kèawo kpata be wɔ̀wɔ. Vɔ̀a, mu le zɔ̃ ɖo ètɔa be wɔ̀na ji ò.

¹⁵Mu yì ètowo ji, yì kpɔna gomè lè vɔ̀sawo mè ò. Mu sɛ̃nà Izràɛl be vòduwo ò. Mu pònàɖi àmè bu be nyɔ̃nù ò.

¹⁶Mu tafuna àmè kaka la va xɔ̀ àwòba nu ò. Mu hlànà àmè ɖe be ènu ò. E nana ènuɖùɖu àmè kè àdɔ̀ le wùa eye e tànà àvɔ na àmè kè lè àmaa.

¹⁷Mu ɖùnà èzãnu ɖo jɔ̀jɔɛ sòso ta ò. Mu dona ègà jì ga ò. E wɔ̀nà ɖo èse kudo ɖoɖo nyèwo ji. Àmè kèa mu la ku ɖo ètɔa tèpe ò. E la nɔ̀ àgbè

¹⁸Ètɔa kè hlà àmèwo be ènu eye be wɔ̀ ènu dakà lè àmèha dòmèa ye la ku ɖo yebe èvuɛ̃ ta.”

¹⁹Mì le biɔ sè be: “Nukɛ ŋuti ye èvia mu dro ètɔa be àgɔ̀jèjea be àgbã ɖo ò?” Nyàwo a, èvia wɔ̀ ɖo ɖoɖo ku jɔ̀jɔɛ ji. E wɔ̀ ɖo ègbè do àsi nyèwo kpata ji, gbà sètonu. Eŋuã, e la nɔ̀ àgbè.

²⁰Àmè kè wɔ̀ èvuɛ̃a ye la ku. Èvi ɖe mu la dro ètɔa be àgbã ò, ètɔ ɖe cã mu la dro èvia be àgbã ò, àdɔ̀ kè ɖù a ye la doàcì. Àmè jɔ̀jɔɛ be jɔ̀jɔɛ sòso la kplɔ̀ ɛ̀ do, eye àmè nyrãkua cã be èkunyànyrãa la kplɔ̀ ɛ̀ do.”

²¹“Ne àmè bàɖà trɔ lè ènu bàɖà kèwo be wɔ̀a yomè, ne e wɔ̀ ɖo ègbè do àsi nyèwo ji, le ŋùku ɖo ɖoɖo ku jɔ̀jɔɛ wɔ̀wɔ ŋutia, e la nɔ̀ àgbè, mu la ku ò.

²²Wo la ŋlɔ̀be yebe àgɔ̀jèjewo kpata eye e la nɔ̀ àgbè zɔ̃ ɖo ènyuɛ̃ kè be le wɔ̀a ji.

²³Mì susu be mù le ji àmè bàɖà ɖe be èkua? Mù le gblɔ̃ na mì be ènyè Tɔhonɔ̀ Mawu a, ènu kè kpò mù le jia ye nyi be bèa trɔ lè èvuɛ̃ yomè eye bèa nɔ̀ àgbè.

²⁴Tovò lè ekèa ŋutia, ne àmè jɔ̀jɔɛ ɖe trɔ lè yebe jɔ̀jɔɛ wɔ̀wɔ yomè, eye e le nɔ̀ àgbè sìgbè àmè bàɖà nènea, e la teŋu nɔ̀ àgbèa? Kpao! Ènu nyuɛ̃ kèwo kpata be wɔ̀ va yìa, la bu ɖo ènu dakà kèwo be va le wɔ̀a mè. Èvuɛ̃ kèawo ŋuti be la ku ɖo.

²⁵Mì gblɔ̃ be: “Tɔhonɔ̀ be èmɔ̃a mu jɔ̀ ò.” Izràɛl be àxuedo a ne ɖo èto sè: Èmɔ nyèa ye mu jɔ̀ òa? Mu nyi mìabe èmɔ̃a bòhũ ye mu jɔ̀ òa?

²⁶Ne àmè jɔ̀jɔɛ ɖe trɔ lè jɔ̀jɔɛ wɔ̀wɔ yomè, le wɔ̀ ènu bàɖà eye be kua, e ku sɔ zɔ̃ ɖo ènu bàɖà kè be wɔ̀a ji.

²⁷Tovò lè ekèa ŋuti, ne àmè bàɖà ɖe trɔ lè ènu bàɖà wɔ̀wɔ yomè, le wɔ̀ ènu kè jè gbà sɔ̀gbèa, e la hlùɛ̃ yebe àgbèa gã.

²⁸Ne e va kè ɖo yebe dàdawo ŋuti eye e trɔ lè woa yomè a, e la nɔ̀ àgbè. Mu la ku ò.

²⁹Vɔ̀ Izràɛl be àxuedo a le gblɔ̃ be: Tɔhonɔ̀ be èmɔ̃a mu jɔ̀ ò. Àpe èmɔ̃wo ye mu jɔ̀ òa, Izràɛl be àxuedo? Mu nyi mìa ŋutɔ mìabe èmɔ̃wo ye mu jɔ̀ òa?

³⁰Ekèa ŋuti ye mù la ɖokòjo kudo mì, sɔ zɔ̃ ɖo àmè sia àmè be àgbè nɔ̀nɔ ji. Ènyè Tɔhonɔ̀ Mawu ye gblɔ̃ ɛ̀. Mì trɔ va, mì trɔ lè mìabe àgɔ̀jèjewo kpata yomè, ne ènu ɖekpe mu gbà na mìa jè ànyi ɖe ò.

³¹Mì ɖè àsi lè mìabe àgɔ̀jèjewo ŋuti boo, ne mìa trɔ wɔ̀ mìabe èjì ku gbɔ̃gbɔ̃a yeye. Nukɛ ŋuti Izràɛl be àxuedo a le crɔ̃ ɖo ò?

³²Ɖo nyè mu le ji àmè kè le kua be èku ò. Ènyè Tɔhonɔ̀ Mawu ye gblɔ̃ ɛ̀. Mì trɔ lè èvuɛ̃ yomè ne mìa nɔ̀ àgbè!”