Read gen Ezekìɛl 19 Bible Online

Ezekìɛl 19 - gen bible

Ezekìɛl 19

¹Tɔhonɔ̀ gblɔ̃ na mù be ma jì àviha ɖo Izràɛl be fìɔviwo ŋuti:

²Eye wò la gblɔ̃ be: “Mìa nɔ̀ nyi jãŋùta nɔ lè jãŋùtawo dòmè! E nana ènuɖùɖu èviawo, lè ànyi mɔmlɔ̃ lè jãŋùtaviwo dòmè.

³E fiɔ àdè dàda tɔ̀xɛ èvia ɖèka ɖe lè woa dòmè. Wàlɛbɛ kè e trɔ zũ jãŋùtavi xɔ̀asì ɖe a, e nya lekè wo vũvũna èlã ɖoa eye e vũvũna àmèwo cã.

⁴Dùkɔ̃wo sè yebe nyikɔ lè èdù ta eye wo tre èmɔ̃ na ɛ̀ sɔ le è. Wo kplɔ̀ ɛ̀ va Ejiptè[8] nyigbã ji kudo kɔ̀sɔ̀kɔsɔ.

⁵Jãŋùta nɔa nɔ̀tè kpɔ e sinu dìdiɖe eye kè ŋùɖo bu na ɛ̀a, E gbà trɔ sɔ èvi bu lè kpɔ̀tɛawo dòmè. E gbà kpla ɛ̀ àdè dàda tɔ̀xɛ ɖe.

⁶E ɖìnàsà lè jãŋùtawo dòmè. Wàlɛbɛ kè e trɔ zũ jãŋùtavia, e cã kpla lekè wo vũvũna èlã ɖoa; eye e vũvũna àmèwo cã.

⁷E dɔ̃ kudo woabe àhòsìwo eye e ɖè woabe èdùa ɖo àma. Wo hlà ènu kèwo lè èdùa mè kaka kè wo sè yebe fãfãa.

⁸Dùkɔ̃wo bɔ̀ so tèpewo kpata va nɔ̀ àjòha mè na ɛ̀. Wo tre èmɔ̃ na ɛ̀ sɔ le è.

⁹Wo sɔ ɛ̀ do àja mè wàlɛbɛ kè wo do è kɔ̀sɔ̀kɔsɔa. Wo kplɔ̀ ɛ̀ yì Babɛ̀l be èfìɔa gbɔ. Wo kplɔ̀ ɛ̀ yì àgbògbòwo mè ne wo mu gbà sè yebe nyikɔ ke lè Izràɛl be ètowo ji ò.”

¹⁰“Mìa nɔ̀ ɖì vɛ̃ka ɖe kè wo do ɖo èsì gbɔ, eye e ɖo àlɔ̀zɛ̃wo kudo èkusɛ̃sɛ̃wo ɖo wo do è ɖo èsì gbɔ.

¹¹E ɖo àlɔ̀zɛ̃ nyuɛ̃ kèwo va trɔ zũ àmè kplɔ̀ti. Àmè sia àmè kpɔ yebe vũvlũ mè; e yì ji ŋutɔ eye e ɖo àlɔ̀zɛ̃ sùgbɔ.

¹²Vɔ̀a wo hɔ̃ ɛ̀ kudo àdɔ̀mèze eye wo sɔ ɛ̀ pu ànyi. Èwèzɛ̃pe be àya pu yebe èkusɛ̃sɛ̃wo; yebe àlɔ̀zɛ̃ nyuɛ̃awo pu eye wo tɔ wo èzò.

¹³Vɔ̀a fifìa, wo do vɛ̃kaa ɖo zògbè ji, lè ànyigbã puplu mà-ɖo èsì ɖe ji.

¹⁴Èzò ɖe to so yebe èkèa mè fiɔ̃ yebe àlɔ̀zɛ̃ kudo èkusɛ̃sɛ̃awo. Mu gbà ɖo àlɔ̀zɛ̃ àdodoe ɖe kè la teŋu va nyi èfìɔ be àtikplɔ ò. Wo la jì èhàlo kèa sìgbè àviha nène.