Read gen Ezekìɛl 2 Bible Online

Ezekìɛl 2 - gen bible

Ezekìɛl 2

¹E gblɔ̃ na mù be: “Àgbètɔ be èvi, sitè ne wòa nɔ̀tè eye mù la pò nupo na wò.”

²Wàlɛbɛ kè e le gblɔ̃ ènyà kèa, Mawu be Gbɔ̃gbɔ̃ a va ji nyè eye e le mù ɖo tènu. Nène a ye mù ɖoto àmè kè le pò nupo na mù a.

³E le gblɔ̃ na mù be: “Èwò àgbètɔ be èvi, mù le dɔ̃ wò ɖoɖa Izràɛlviwo gbɔ; ɖoɖa àmè jèagla kèwo sitè ɖo ŋuti nyèa gbɔ. Woa kudo woa tɔgbewo sitè ɖo ŋuti nyè kaka va na egbè.

⁴Mù le dɔ̃ wò ɖoɖa èvi ètamèsɛ̃tɔ kèwo èjì kuàtrì na a wo gbɔ. Wò la gblɔ̃ ènyà kèa na wo be: “Ènyà kè Tɔhonɔ̀ gblɔ̃a yekè”.

⁵Ne wo sè àlo wo mu sè òa, ɖo wo nyi dùkɔ̃ jèagla, co wo la nya be gblɔ̃ɖɛtɔ ɖe lè woa dòmè nyàwo.

⁶Na èwò yaa, àgbètɔ be èvi, mù gbà vɔ̃ wo kaka ne wòa vɔ̃ woabe ènyà gbɔ̃gblɔ̃ ò. Ɖo wò lè àŋùja kudo àkeklewo dòmè. Mù gbà vɔ̃ dùkɔ̃ jèagla kèa be ènyà kudo woabe wɔ̀nawo ò.

⁷Wò la gblɔ̃ ènyà kè mù la gblɔ̃ na wòa, na wo. Ne wo sè àlo wo mu sè òa; e so woabe èkɔ̀ lìalia gbɔ.

⁸Èwò àgbètɔ be èvi, ɖo èto ènu kè mù la gblɔ̃ na wòa. Mù gbà trì èto sìgbè woawo ke nène ò. Hũ àpo ènu ne wòa ɖù ènu kè mù la na wòa.”

⁹Eye kpɔɖa, mù kpɔ àlɔ̀ ɖe, drɛ̃ ɖoɖa gbɔ nyè. E le ènu ɖe sìgbè xoma ŋɔŋlɔ̃ nène.

¹⁰E vlũ xoma kèa lè ŋùkɔ̀ na mù: Wo ŋlɔ̀ ènu ɖo yebe àkpa èvèa kpata. Wo ŋlɔ̀ èmɔ̃ɛ̃làla, èhùɛjèje kudo èfũlòlo be èhàwo ɖo e mè.