Read gen Ezekìɛl 20 Bible Online

Ezekìɛl 20 - gen bible

Ezekìɛl 20

¹Lè èpè adrɛ̃gɔ̃ kè mè wo kplɔ̀ àmèwo yì gàtɔnugbe, lè wètri àtɔ̃gɔ̃a be ŋùkèkè èwogɔ̃a mèa, Izràɛl be èdùmèmègã ɖewo va la biɔ ne woa nya Tɔhonɔ̀ be èjro.

²Nène a ye Tɔhonɔ̀ be ènyà ɖì na mù gblɔ̃ be:

³“Èwò àgbètɔ be èvi, sɔ ènyà kè ènyè Tɔhonɔ̀ Mawu mù le gblɔ̃ na Izràɛl be àmèsĩsĩwoa, na wo be: “Ne mìa va sè àpe ènyà ŋuti ye mì va ɖoa? Nyè mu la ɖè àsi lè ɖokoe nyè ŋuti kpɔ ne mìa biɔ ènyà sè ò. Ènyè Tɔhonɔ̀ Mawu ye gblɔ̃ ɛ̀!”

⁴Èwò kè nyi àgbètɔ kpòa, wò la ɖokòjo na woa? Mù gbà ku ŋùkpɛ̃ku ò. Ɖoŋùku èhlɔ̃dãnu kèwo woa tɔgbewo wɔ̀a ji na wo.

⁵Gblɔ̃ ènyà kè ènyè Tɔhonɔ̀ Mawu mù le sɔ ɖoɖa woa na wo be: Gbè kè gbè mù cã Izràɛl, mù kã àtãŋu ku àsi kɔ yì ji na Yakɔb be àxuedo a. Eye mù ɖè ɖokoe nyè fiɔ wo lè Ejiptè. Mù kɔ àsi yì ji, fìã na wo be: Mù nyi Tɔhonɔ̀, woabe Mawu.

⁶Gbè ŋua gbèa, mù fìã na wo be mù la kplɔ̀ wo to lè Ejiptè yì ànyigbã ɖe kè mù jràɖo ɖɛ eye ànyisì kudo ènyìnɔsi bɔ lèa ji.

⁷Mù gblɔ̃ na wo be: “Àmè sia àmè ne ɖè àsi lè ènu kè gbɔ yebe ŋùkuviwo le dɔ̃ ɛ̀ yìa ŋuti! Mì mu gbà pòɖi mìa ɖokoe kudo Ejiptè be vòduwo ò! Ènyè Tɔhonɔ̀, mìabe Mawu a ye gblɔ̃ ɛ̀.”

⁸Wo sitè ɖo ŋuti nyè eye wo mu ji la sè àpe ègbè ò. Àmè ɖekpe mu ɖè àsi lè ènu dakà kè e le wɔ̀a ŋuti ò. Wo mu trɔ lè Ejiptè be vòduawo yomè ò. Nyè mu gbà jro la le àdɔ̀mèze nyèa ɖɛ ò, kaka ma ɖè è ɖo woa ji lè Ejiptè ŋutɔ cã ò.

⁹Co gãke mù wɔ̀ ɛ̀ zɔ̃ ɖo nyikɔ nyèa ji, ne wo mu gbà dovlo wo lè àmè kèwo dòmè wo lèa gbɔ ò. Àmè kèwo mù ɖè ɖokoe nyè fiɔ wàlɛbɛ kè mù ɖè wo to lè Ejiptè a.

¹⁰Mù ɖè wo to lè Ejiptè eye mù kplɔ̀ wo to zògbè ji.

¹¹Mù sɔ ɖoɖo kudo ègbè do àsiwo na wo ne àmè kè le wɔ̀ ɖo woa jia, bèa nɔ̀ àgbè.

¹²Mù ɖo jɛ̃gbɔ̃zã cã ànyi na wo ne woa teŋu nɔ̀ kàdodo mè ku mù eye woa gbà nya ɛ̀ be ènyè Tɔhonɔ̀ ye ɖè wo ɖovò na àpe sùmɔ̀ sumɔ.

¹³Vɔ̀a Izràɛl be àxuedo a sitè ɖo ŋuti nyè lè zògbèa ji. Wo mu wɔ̀ ɖo ɖoɖo ku kɔ̀do nyè kèwo ji wo ɖo la wɔ̀ ɖo sɔ nɔ̀ àgbè ò. Wo dovlo jɛ̃gbɔ̃zã nyèa. Mù ɖo è be mà-ɖùɖù àdɔ̀mèze nyèa kɔ̀ ɖo woa ji lè zògbèa ji sɔ crɔ̃ wo.

¹⁴Gãkea, mù wɔ̀ ɛ̀ zɔ̃ ɖo nyikɔ nyèa ji, ne wo mu gbà dovlo wo lè àmè kèwo be ŋùkumè mù ɖè wo to lè Ejiptè a be ŋùkɔ̀ ò.

¹⁵Vɔ̀ lè zògbèa jia, mù kã àtãŋu na wo be nyè mu la kplɔ̀ wo yì ànyigbã kè be àjɔ̀gbè mù fìã na woa ji, fikè ènyìnɔsi kudo ànyisì bɔ lè ò.

¹⁶Mù gblɔ̃ ekèa ɖo wo dà lè ɖoɖo ku kɔ̀do nyèawo ji. Wo dovlo jɛ̃gbɔ̃zã nyèa. Nyàwoa, woabe èjì gbà le ɖo woabe vòduwo ŋuti.

¹⁷Co gãke mù gbà ku ŋuzĩzĩ na wo, eye nyè mu crɔ̃ wo lè zògbèa ji ò.”

¹⁸“Mù gblɔ̃ na woabe èviwo lè zògbèa ji be: “Mì mu gbà jè mìa tɔwo be ɖoɖo ku kɔ̀dowo yomè ò. Eye mì mu gbà nɔ̀ mà-kɔ̀ mà-kɔ mè lè woabe vòdu sɛ̃sɛ̃ mè ò.

¹⁹Mù nyi Tɔhonɔ̀, mìabe Mawu. Mì zɔ̃ ɖo ɖoɖo nyèwo ji ne mìa wɔ̀ ɖo èse nyèwo ji.

²⁰Mì wɔ̀ jɛ̃gbɔ̃zã nyèwo kɔ̀kɔ̀ɛ, eye wo la nyi jèsì lè ènyè ku mì dòmè. Wo la nya ɛ̀ be ènyè ye nyi Tɔhonɔ̀, mìabe Mawu.”

²¹Vɔ̀a woabe èviwo sitè ɖo ŋuti nyè. Wo mu kpɔ ègbè do àsi nyèwo ji kaka la va wɔ̀ ɖo ɖoɖo nyèwo ji ò; nyàwoa, ɖoɖo kèawo nana àgbè àmè kèwo wɔ̀ ɖo woa jia, wo gbã jɛ̃gbɔ̃zã nyèawo. Mù ɖo è be mà-ɖùɖù àdɔ̀mèze nyèa kɔ̀ ɖo woa ji lè zògbèa ji sùsuiɖe.

²²Vɔ̀a, mù le àpe àlɔ̀ ɖo nyikɔ nyèa ŋuti, ne mu gbà nyi èvlodonu lè dùkɔ̃ kèwo be ŋùkɔ̀ mù kplɔ̀ wo to lè Ejiptè a be ŋùmè ò.

²³Co gãke, nyè ŋutɔ ye gbà kã àtãŋu na wo lè zògbèa ji be mù la kãkã wo ɖo dùkɔ̃wo dòmè, lè ànyigbãwo ji.

²⁴Mù kã àtãŋu kèa, ɖo wo mu kpɔ ɖoɖo ku ègbè do àsi nyèwo ji kaka la va kɔ̀ jɛ̃gbɔ̃zã nyèwo ŋuti ò. Wo ɖè àsi lè woa ɖokoe ŋuti na woa tɔwo be vòduwo.

²⁵Mù sɔ èse[9] kèwo mu dɔ̃ woa ji ò a cã na wo. Ɖoɖo kèwo mu la teŋu na wo la nɔ̀ àgbè ò.

²⁶Mù ɖè àsi lè woa ŋuti ne woa pòɖi woa ɖokoe lè ènunana kè biɔ be woa sɔ ŋùkɔ̀gbevi ŋusùa na mù a, mè. Wo va kè ɖo ènu gbegble kè wo le wɔ̀a ŋuti, eye wo nya ɛ̀ be mù nyi Tɔhonɔ̀.”

²⁷“Ekèa ŋuti ye wò la gblɔ̃ na Izràɛl be àxuedo a be ènyà kè Tɔhonɔ̀ Mawu gblɔ̃a ye kè: Mìa tɔgbewo jè àgɔ̀ eye wo gbe ànùkua wɔ̀wɔ na mù.

²⁸Mù kplɔ̀ wo yì ànyigbã kè be àjɔ̀gbè mù fìã na woa ji. Funua, wo kpɔ ètowo kudo àti do àmàwo kpata. Eye wo fɔ̃ àpe àdɔ̀mèzea ɖotè to ènunana, vɔsa kèwo ɖo xɔ̃xũɛ kè mè fana kudo vɛ̃ kè wo kɔ̀ ɖo ànyi na mù a.

²⁹Mù gblɔ̃ na wo be: “Vɔsa tèpe kɛwo ye nyi ekèawo ye mì le yì ò?” So funua ye wo ɖona tèpe kèawo be vɔsa tèpe.

³⁰Ènu kèa ŋuti ye wò la gblɔ̃ na Izràɛlviwo be leke ye Tɔhonɔ̀ Mawu gblɔ̃a ye kè: Mì mu gbà pòɖi mìa ɖokoe sìgbè mìa tɔgbewo nène ò. Mì mu gbà wɔ̀ àhasì sɔ sumɔ vòduwo ò.

³¹Fifì cã a, mì pònàɖi mìa ɖokoe lè mìabe ènunanawo, ku lekè mì tɔna èzò mìabe ŋùkɔ̀gbevi ŋusùwo ɖoa, mè. Nène a mù la teŋu ɖè àsi lè ɖokoe nyè ŋuti na Izràɛlviwo ne woa biɔ ènyà sèa? Kaka kè ènyè Tɔhonɔ̀ Mawu mù lè àgbèa, nyè mu la ɖè àsi lè ɖokoe nyè ŋuti na mì kpɔ ò!

³²Mì gblɔ̃nà be: mi ji la nɔ̀ sìgbè dùkɔ̃ kpɔ̀tɛawo ke nène, sìgbè xòmè ŋuawo ke nène. Mi ji la sumɔ àti kudo èkpewo. Vɔ̀a, ènu kè mì susua, mu la jɔ̀ kpɔ ò.

³³Ènyè Tɔhonɔ̀ Mawu kè lè àgbèa, mù la ɖè ɖokoe nyè fiɔ ku ŋusɛ̃. Mù la ɖùɖù àdɔ̀mèze nyèa eye mù la ɖù mìa ji.

³⁴Mù la ɖè mì to lè dùkɔ̃wo dòmè, eye mù la bɔ̀ mì so fikèwo mù kãkã mì ɖoa. Mù la wɔ̀ ekèa ku àpe hɔ̃hlɔ̃ kudo àdɔ̀mèze be emèsonuwo.

³⁵Mù la kplɔ̀ mì yì dùkɔ̃wo be zògbè ji[10] eye mù la ɖokòjo ku mì àgbãŋùgbà.

³⁶Mù la gblehùɛ do mì sìgbè lekè mù wɔ̀ ɛ̀ kudo mìa tɔgbewo lè Ejiptè be zògbè jia nène. Ènyè Tɔhonɔ̀ Mawu ye gblɔ̃ ɛ̀.

³⁷Mù la kplɔ̀ mì sìgbè àlɛ̃kplɔ̀tɔ nène sɔ zɔ̃ ɖo zòɖùɖu kè lè mia dòmèa ji.

³⁸Mù la ɖè àmè kèwo jè àgla lè mìa dòmè eye wo mu wɔ̀ ɖo ɖoɖo nyèwo ji òa to. Vɔ̀ wo mu la teŋu gɛ̃ ɖo Izràɛl be ànyigbã ji ò. Eye mì la nya ɛ̀ be ènyè ye nyi Tɔhonɔ̀a.

³⁹Ènyà kè ènyè Tɔhonɔ̀ Mawu mù le gblɔ̃ na Izràɛl be àxuedo a ye nyi be: Àmè sia àmè teŋu yì sumɔ yebe vòduwo fàa. Vɔ̀ e yomè a, mì la trɔ va sètonu na mù godo. Mì mu la gbà dovlo nyikɔ kɔ̀kɔ̀ɛ nyèa, sɔ nɔ savɔ na vòduwo ò.

⁴⁰Ɖo Tɔhonɔ̀ Mawu gblɔ̃ be lè yèbe èto kɔ̀kɔ̀ɛa ji, lè Izràɛl be èto gã jia, mì la sumɔ mù lè. Funu mù la hɔ̀ mì nyuɛ̃ ɖe lè eye mù la biɔ so mìa si be mìa sɔ mìabe ènu ɖè ɖovò, ènunana kudo ènu kɔ̀kɔ̀ɛwo va na mù fàa.

⁴¹Mù la hɔ̀ mì sìgbè ènunana huɛ̃ gbigbli ɖe nène, wàlɛbɛ kè mù la bɔ̀ mì so tèpe kèwo mì kãkã ɖoa. Nène a, mù la ɖè kɔ̀kɔ̀ɛ nyinyi nyèa fiɔ lè dùkɔ̃wo dòmè.

⁴²Mì la nya ɛ̀ be ènyè ye nyi Tɔhonɔ̀a, wàlɛbɛ kè mù la kplɔ̀ mì va Izràɛl nyigbã kè mù sɔ na mìa tɔgbewo ku àlɔ̀ sɛ̃ŋua ji.

⁴³Funu ye mì la dèŋùgblè so mìabe àgbè kè mì nɔ̀ sãa ku wɔ̀na kèwo pòɖi mìa ŋuti lè. Ènu dakà kèawo la na mìabe ènu la to lè ŋùkumè na mì.

⁴⁴Izràɛlviwo, nyè mu la le mìabe àgbè kudo ènu gbegble kèwo mì wɔ̀a ɖɛ ò. Vɔ̀a, mù la wɔ̀ kudo mì ne mìa teŋu do bùbu ŋuti nyè. Nène a ye mì la nya ɛ̀ be ènyè ye nyi Tɔhonɔ̀a. Tɔhonɔ̀ Mawu ye gblɔ̃ ɛ̀.”