Read gen Ezekìɛl 22 Bible Online

Ezekìɛl 22 - gen bible

Ezekìɛl 22

¹Tɔhonɔ̀ be ègbèa ɖì na mù gblɔ̃ be:

²“Èwò àgbètɔ, wò la ɖokòjoa, wò la ɖokòjo na èdù kè kɔ̀ èhũ ɖɛa? Ɖè yebe èhlɔ̃dãnuwo kpata fiɔ ɛ̀!

³Gblɔ̃ na ɛ̀ be: Nène a ye Tɔhonɔ̀ Mawu gblɔ̃ be: Kpɔ èdù kè kɔ̀nà èhũ ɖo ànyi a, yebe àzã la sù eye àmè kè la wɔ̀ legbavia la pòɖi ye ɖokoe.

⁴Wò jèagɔ̀ ɖo èhũ kèwo wò kɔ̀ ɖo ànyi a ŋuti eye wò trɔ ènu mà-kɔ̀ mà-kɔ ɖo vòduawo ŋuti! Funu ye wò le ɖiɖi àgbènɔ̀zã wòwo lè. Wò la crɔ̃ sɔ̀sɔɛɖe kèa. Ekèa ŋuti mù sɔ ŋùkpɛ̃ cɔ̃ na wò lè dùkɔ̃ kpɔ̀tɛawo be ŋùkɔ̀ ɖo. Àmèwo kpata le ɖè àŋɔ̀ni mè na wò.

⁵Wò bu àsìxɔ̀xɔ wòa ɖo ènuwo kpata titɔ lè èwò mè. Eye àmèwo kpata, lè àzɔ̀ge ku kpòepe le kò wò.

⁶Lè gbɔ wòa Izràɛl be èfìɔviwo kɔ̀nà àmèwo be èhũ ɖo ànyi màjìjɔ.

⁷Àmèwo crìnà woa tɔ ku woa nɔ̀wo fàa. Wo tanafu àmèjro, tɛna ècɔɛvi ku àhòsìwo ɖo èto lè gbɔ wò.

⁸Wò lenafũ ènu kè ŋuti kɔ̀a eye wò donavlo jɛ̃gbɔ̃zãa.

⁹Lè gbɔ wòa, àmèwo ɖànàjè ɖo àmè buwo si sɔ crɔ̃na wo. Àpo èdùmèviwo yì ɖùnà vɔsanuwo lè ètowo ji eye wo nɔ̀nà àgbè yàkà yàkà.

¹⁰Lè gbɔ wòa, àmè ɖewo dɔ̃na kudo woa tɔ be èsrɔ̃, àlo dɔ̃na ku nyɔ̃nù kèwo lè àsiɖoànyi mèa.

¹¹Àmè ɖewo xɔ̀nà woa nɔ̀vi be èsrɔ̃. Àmè buwo dɔ̃nà woa toyɔvi ɖo àhasì mè àlo dɔ̃na ku woa srɔ̃ be nɔ̀vi nyɔ̃nùwo.

¹²Lè gbɔ wòa, wo ɖùnà èzãnu sɔ crɔ̃na àmè, wo dona ègàjìga eye wo tanafu àmèwo sɔ kpɔna èci. Eye wo ŋlɔ̀be ènyè Tɔhonɔ̀ Mawu ya keŋu-keŋu. Nène a ye mù le gblɔ̃!

¹³Mù la pò àsikpe ɖo wò hlà àmèwo be ènu kudo èhũ kè wò kɔ̀ ɖo ànyi a.

¹⁴Wò la teŋu ɖo ŋusɛ̃ la dojì ne mù sitè ɖo ŋuti wòa? Ènyè Tɔhonɔ̀ Mawu mù la wɔ̀ ɖo ènu kè mù gblɔ̃a ji.

¹⁵Mù kãkã wò ɖo dùkɔ̃wo dòmè eye mù la nɔ̀tè àpo ènu mà-kɔ̀ mà-kɔ̀wo wɔ̀wɔ.

¹⁶Wò la dovlo ɖokoe wò lè dùkɔ̃wo be ŋùkɔ̀, eye wò la nya be ènyè ye nyi Tɔhonɔ̀a.”

¹⁷Tɔhonɔ̀ yì ènyàa ji gblɔ̃ na mù be:

¹⁸“Àgbètɔ be èvi, ɖo èto! Izràɛlviwo trɔ sìgbè gàkpo kè wo mu kɔ̀ lè èzò mè òa nène. Wo lè sìgbè klòsalòmi, gàjɛ̃, suŋubui ɣe, gàyìbɔ àlo suŋubui kè gosimìti kɔ̀ ɖo èzò mèa nène.

¹⁹Ekèa ŋuti ènyè Tɔhonɔ̀ Mawu mù le gblɔ̃ be: Mì trɔ zũ ègà mà-kɔ̀ mà-kɔ̀wo. Mù la bɔ̀ mì ɖodu lè Yèruzàlɛm be dòdòmè.

²⁰Wo bɔ̀nà klòsalò, gàjɛ̃, gàyìbɔ, suŋubui àlo suŋubui ɣe ɖo gòze mè, eye wo donazò ɖo gɔ̃mè na ɛ̀ sɔ srènà ɛ̀a. Nyàwo lè àpe àdɔ̀mèze hɛlihɛli mèa, mù la bɔ̀ mì ɖodu eye mù la kpiti mì, sɔ srè mì lè èzò mè.

²¹Mù la bɔ̀ mì lè hasòsoe mè eye mù la na àdɔ̀mèze be èzò nyèa la bì, eye mì la srè lè èdùa be dòdòmè.

²²Mì la nɔ̀ sìgbè klòsalò kè wo srèa nène. Eye mì la nya ɛ̀ be ènyè Tɔhonɔ̀ ye ɖùɖù àpe àdɔ̀mèzea ɖo mìa ji.”

²³Tɔhonɔ̀ gbà gblɔ̃ na mù be:

²⁴“Èwò àgbètɔ, gblɔ̃ na Izràɛlviwo be woabe èdùa ɖì ànyigbã ɖe kè mu gbà kpɔ èsì kpɔ òa. E la ɖìku lè àpe àdɔ̀mèze dodoa mè.

²⁵Woabe gblɔ̃ɖɛtɔwo la blase lè woa dòmè. Wo la nɔ wɔ̀ sìgbè jãŋùta kèwo le ji ènu la trɛ̃a nène. Nène ye wo le crɔ̃ àmèwo, le hlà woabe àdɔ̀kùnuwo, eye wo le gble àhòsìwo ɖɛ drì.

²⁶Woabe hũbonɔwo le gbã èse nyè gbà dovlo ènu kè wo ɖè ɖovò na mù a. Wo mu gbà nya vòvòtoto lè ènu ɖè ɖovò ku ènu gbalo dòmè ò. Wo mu gbà teŋu fiɔ lekè wo la nya ènu kɔ̀kɔ̀ɛ lè mà-kɔ̀ mà-kɔ gbɔ ò. Wo ɖèkɔ̀ lè àpe jɛ̃gbɔ̃zã ŋuti. Eye wo dovlo mù lè woa dòmè.

²⁷Woabe èfìɔviwo lè sìgbè gbète la trɛ̃ ènuwo nène. Wo wùnà àmèwo sɔ hlànà woabe àdɔ̀kùnuwo.

²⁸Woabe gblɔ̃ɖɛtɔwo sɔna ènu cɔ̃ ènugbegble kèawo kpata ji. Eye wo kpɔna àvìmènu àjètɔ̀wo. Wo gblɔ̃nà be: “Nène a ye Tɔhonɔ̀ Mawu gblɔ̃!” Vɔ̀ nyè mu gblɔ̃ ènyà ɖekpe na wo ò.

²⁹Àmètɛtɛɖoto bɔ lè dùkɔ̃a mè, wo hlànà àmèwo be ènu fàa. Eye wo tanafu wɔ̀amènɔ̀ kudo ècɔɛviwo. Wo mu sònà jɔ̀jɔɛ na àmèjrowo ò.

³⁰Lè woa dòmèa, mù ji àmè ɖèka pɛ kè la teŋu tù èglìkpa, àlo la sɔ̀gbè sɔ ɖia èdùa ne nyè mu gbà va gbã ɛ̀ ò. Vɔ̀a nyè mu kpɔ àmè ɖekpe ò.

³¹Eŋuã, mù ɖùɖù àdɔ̀mèze hɛlihɛli nyèa ɖo woa ji. Mù crɔ̃ wo lè àpe jìbibi be èzòa mè. Mù na wo dro woa ŋutɔ be àgɔ̀jèjea be àgbã. Ènyè Tɔhonɔ̀ Mawu ye gblɔ̃ ɛ̀.”