Read gen Ezekìɛl 23 Bible Online

Ezekìɛl 23 - gen bible

Ezekìɛl 23

²“Èwò àgbètɔ, ɖo èto nɔ̀vi nyɔ̃nù èvè be ŋutinya, ènɔ̀ ɖèka be èviwo.

³Wàlɛbɛ kè wo lè tùgbɛ̀jɛ mèa, wo trɔ àhasìtɔwo lè Ejiptè. Funua ye wo fitɔ̃ woabe ànɔwo eye wo lìlì àsi woa ŋuti sɔ ɖè woabe ègbèjinɔ̀nɔa jo.

⁴Àmègãxotɔa be nyikɔ tɔ̀ Oholà eye nɔ̀via tɔ̀ Ohòlibà. Àmè cucugbã tɔ̀a lè Sàmarìa tèpe eye èvègɔ̃a lè Yèruzàlɛm tèpe. Mù ɖè wo àmè èvèa eye wo jì èvi ŋusù ku nyɔ̃nùwo na mù.

⁵Vɔ̀a, Oholà wɔ̀ àhasì, to e gbɔ be e nyi tɔ̀ nyè gãke. Yebe èjì le ɖo àmè kèwo tɛ ɖo e ŋuti sìgbè Àsirìa nène. Eye e sɔ ɛ̀ wɔ̀ àzìãvi.

⁶Woabe èdùjikpɔtɔ kudo kòjoɖotɔwo dona àwù jɛ̃ àyòŋùklɛ. Wo nyi ɖèkajɛvi nya kpɔwo kudo èsɔdotɔ àdodoewo.

⁷Oholà nɔ̀ àzìãvi mè kudo Àsirìa be àmè ŋùkuta kèawo, eye e pòɖi ye ɖokoe ku àmè kèawo kudo woabe vòduwo.

⁸E kpɔ̀tɔ̀ le nɔ̀ àhasì be àgbè kè be nɔ̀ sãa lè Ejiptè a, ɖo àmè kèawo cã dɔ̃ kudo è lè yebe tùgbɛ̀jɛ mè va yì. Wo fitɔ̃ tùgbɛ̀jɛ mèvi be ànɔwo na ɛ̀, eye wo dɔ̃ ɛ̀ ɖo àhasì wɔ̀wɔ mè.

⁹Ekèa ŋuti ye mù sɔ ɛ̀ do àsi na yebe àzìãvi, Àsirìaviwo kèwo be lɔ̃a.

¹⁰Woawo ye kpɔ àma mè na ɛ̀. Wo xɔ̀ yebe ŋusùvi ku nyɔ̃nùviwo. Wo wù ye ŋutɔ lè èwui nu. E nyi kpɔwɔɛ ne nyɔ̃nùwo, ɖo wo ɖo yebe kòjo na ɛ̀.”

¹¹“Nɔ̀via Ohòlibà kpɔ e tèpe. Co gãke, e cã gbà trã lè lɔ̃lɔ̃ mè. E gbà wɔ̀ àhasì wu Oholà. Ye tɔ̀a gbà nyrã wu nɔ̀via tɔ̀.

¹²E cã ɖo lɔ̃lɔ̃ na Àsirìa be èdùjikpɔtɔ kudo kòjoɖotɔwo, yebe àxuekɔ̀tɔ kèwo dona àwù bìɖìbìɖìwo, èsɔkùtɔ kudo ɖèkajɛvi kèwo wɔ̀nà àzìãawo.

¹³E ye cã trɔ àhasìtɔ. Nyàwoa, wo àmè èvèa kpata zɔ̃ èmɔ̃ ɖèka ŋua ke!

¹⁴Vɔ̀a, Ohòlibà ya gbà wɔ̀ ɛ̀ wu. Gbè ɖèkaa, e kpɔ wo ta àmèwo ɖo èglìkpa ŋuti lè kɔlà jɛ̃ mè. Wo nyi Babɛ̀lviwo.

¹⁵Ègojiblanu lè àlì na wo, eye èta lè babla na wo. Wo ɖo àhùawɔ̀tɔ be nɔ̀nɔmè. Babɛ̀l nyigbã ji be ŋusù ye wo nyi.

¹⁶Wàlɛbɛ kè e kpɔ woa, woabe ènu jɔ̀jì na ɛ̀ trolo. Eye e dɔ̃ àmè ɖoɖa Babɛ̀l[12] ne woa yì kplɔ̀ wo va na ɛ̀.

¹⁷Nène a ye Babɛ̀lviwo va wɔ̀ àhasì kudo è. Wo pòɖi ì ku woabe àhasìgbe nɔ̀nɔa. Wàlɛbɛ kè e ɖìgbɔ ye ɖokoe kudo wo vɔ̀a, e va crì wo.

¹⁸E zã yebe àgbèa sìgbè àhasìtɔ nène lè èdùa kpata mè. E ɖè yebe àmaa sia kaka be mù ɖè èkɔ̀ lè e ŋuti, kaka jè nɔ̀via cã ji.

¹⁹E na yebe àhasì be àgbè nɔ̀nɔ jì ɖo eji, sɔ ɖoŋùku yebe tùgbèjɛmè, wàlɛbɛ kè e le wɔ̀ àhasì lè Ejiptè a.

²⁰Funu yaa, wo kpɔna jìjɔɛ kudo yàkàmewo. Àmè kèwo nɔ̀nà àgbè sìgbè èlãwo nènea. Wo lè kpò sìgbè èsɔ àkɛtɛ kudo èsɔwo nène.”

²¹“Ohòlibà, wò gbà trɔ yì àpo tùgbɛ̀jɛ mè be àgbè nɔ̀nɔa mè, wàlɛbɛ kè wò ɖè àsi lè ɖokoe wò ŋuti na Ejiptè be le wò, le fitɔ̃ àpo ànɔawo.

²²Ekèa ŋuti ye Ohòlibà, ènyà kè Tɔhonɔ̀ Mawu gblɔ̃a ye kè: Mù la na àpo àzìãviwo kpata la sitè ɖo ŋuti wò. Fifì kè wò crì woa, mù la na wo la sitè ɖo ji wò hòo so àfi ɖekpekpe.

²³Mù la na Babɛ̀lviwo, Kaldeatɔwo, Pekòd be ŋusùwo, Coà kudo Koà gbàkudo Àsirìaviwo kpata la sitè ɖo ŋuti wò. Mù la bɔ̀ woabe ɖèkajɛwo, èdùjikpɔtɔ ku kòjoɖotɔ nyakpɔkpɔwo, àhùawɔ̀tɔ kudo àgbònùglawo kaka jè èsɔdotɔwo ji.

²⁴Wo la so èvègo va ku àhùawɔ̀nu kudo àhùakèkevi vòvòvòwo lè àmèha gã ɖe mè. Kudo woabe kuku kudo àkpoxɔ̀nuwo, wo la va xa wò gòdò. Mù la gblɔ̃ àpo ènyàa na wo, eye wo la dɔ̃to na wò zɔ̃ ɖo woabe èsea ji.

²⁵Ɖo àdɔ̀mèze kè mù do ɖo ŋuti wòa, mù la na wo la wɔ̀ ènu drã kudo wò. Wo la nyɔ̀ ŋɔ̀ti kudo ètowo na wò eye wo la crɔ̃ wò lè woabe èwuiwo nu. Wo la kplɔ̀ èvi wò ŋusù ku nyɔ̃nùwo eye èzò la fiɔ̃ àmè kpɔ̀tɛawo.

²⁶Wo la hlà àpo àwù kudo àcɔɖonuwo lè àsi wò.

²⁷Mù la na àpo àhasì be àgbè ku ènu kpòtoe wɔ̀wɔa nu la sò. Àgbè kè gɔ̃mè wò jè so kaka Ejiptè a. Wò mu la gbà ji àmè ɖe kaka la ɖoŋùku Ejiptèviwo ji ò.

²⁸Ɖo ènyà kè Tɔhonɔ̀ Mawu gblɔ̃a ye nyi be: Mù la sɔ wò do àsi na àmè kèwo wò crìa, àmè kèwo be ènu wɔ̀na tɔna èjì na wòa simè.

²⁹Wo la wɔ̀ kudo wò sìgbè lekè wo crì wòa nène. Wo la xɔ̀ àpo ènuwo kpata eye wo la ɖè wò ɖo àma ŋùkpɛ̃ tèpe wòwo la ci gàglàgbè.

³⁰Wo la wɔ̀ kudo wò nène ɖo wò wɔ̀ àhasì ku èdùkɔ̃wo. Wò pòɖi ɖokoe wò sɔ sumɔ woabe vòduwo.

³¹Wò kplɔ̀ nɔ̀vi wòa do, eye wò sɔ yebe kɔpòa ɖo àsi.

³²Ènyà kè ènyè Tɔhonɔ̀ Mawu mù gblɔ̃a, ye nyi be: Wò la nù lè nɔ̀vi wòa be kɔpò nu, kɔpòa kèkè, e mè gbà gòglò. Àmèwo la kò, gbà ɖè àlɔmè lè ŋuti wò, ɖo kɔpò wòa ɖɔ nyuɛ̃ ɖe!

³³E la na wò la mu ku vevesèse, vɔ̃vɔ̃ ku àyàɖùɖu be kɔpòa, ye nɔ̀vi wò Sàmarìa nù vɔ̀ keŋu.

³⁴Wò la nù ì vɔ̀ keŋu-keŋu, wò la gbã ɛ̀ kudo àpo àɖuwo eye wò la sɔ gbãgbãwo sɔ doàbì àpo àkɔta. Ɛ̃ɛ, ènyè Tɔhonɔ̀ Mawu kè le pò nupoa, ye gblɔ̃ ɛ̀.

³⁵Ènu kèa ŋuti ye ènyè Tɔhonɔ̀ Mawu mù gblɔ̃ be: Kè wò ŋlɔ̀be mù, eye wò ɖèkɔ̀ lè ŋuti nyèa, wò cã wò la sèveve ɖo àhasì be àgbè nɔ̀nɔ wò ŋuti.”

³⁶Tɔhonɔ̀ gblɔ̃ na mù be: “Èwò àgbètɔ, jràɖo sɔ ɖokòjo na Oholà ku Ohòlibà. Gblɔ̃ woabe èhlɔ̃dãnuawo na wo.

³⁷Nyɔ̃nù àhasìtɔ ku èhlɔ̃dãtɔwo ye wo nyi. Wo wɔ̀ àhasì ku vòduwo. Wo sɔ èvi kèwo wo jì na mù a, wɔ̀ vɔsa na vòduawo.

³⁸Ènu kè wo gbà wɔ̀ ku mù a ye nyi be wo dovlo kɔ̀kɔ̀ɛpe nyèa, gbà gbã jɛ̃gbɔ̃zã nyèa zè ɖèka.

³⁹Wàlɛbɛ kè wo wù woabe èviwo na vòduawoa, ke ye wo yì kɔ̀kɔ̀ɛpe lè àxue nyèa ŋutɔ mè, yì dovlo è.

⁴⁰Wo na wo yì kplɔ̀ ŋusùwo so àzɔ̀ge boo va, wo dɔ̃ àmè ɖoɖa wo eye wo va kɔ̀ ɖɛ. Lè woa gbɔa, wò lèsì, jràɖo nyuɛ̃ ɖe eye wò do àcɔɖonuwo.

⁴¹E yomè a, wò nɔ̀ ànyi ɖo àbàti nyakpɔ ji, àbàti kè be ŋùkɔ̀ wo ɖo èkplɔ̃ ɖoa. Eye wò sɔ lifi kudo àmì xũɛ̃ titi nyèa dà ɖo ji.

⁴²Àmè fuu ye va ji wo kpɔ. Eye wo sè àmèha gã ɖe be ègbè. Wo kplɔ̀ àmèwo so zògbè nyigbã ji va. Wo va do àlɔ̀ga àlɔ̀ na nɔ̀vi nyɔ̃nù èvèawo eye wo sɔ jègbà nyuɛ̃wo cɔ̃ èta na wo.

⁴³Nène a ye mù gblɔ̃ be: “Àmè kè àhasì be àgbè nɔ̀nɔ sòkà lè lãmè na a, gbà le wɔ̀ àhasì!

⁴⁴Ŋusùwo gbà le yì e gbɔ ke! Nène a ye wo yì Oholà ku Oholibà gbɔa yeŋu. Nyɔ̃nù kèawo dɔ̃ ku àmè ɖekpekpe kpò!”

⁴⁵Vɔ̀a, ŋusù jɔ̀jɔɛwo gblehùɛ do nyɔ̃nù àhasìtɔ ku èhlɔ̃dãtɔ kèawo, ɖo wo wɔ̀ àhasì eye woabe àlɔ̀ kɔ̀ èhũ ɖɛ!

⁴⁶Ènyà kè ènyè Tɔhonɔ̀ Mawu mù gblɔ̃a ye nyi ekè: Mì bɔ̀ àmèha ɖo e ŋuti eye mù la ɖè àsi lè woa ŋuti ɖo tìtɔ̀ titɔ mè ne woa hlà woabe ènuwo.

⁴⁷Wo la pò wo èkpe eye wo la flì wo lè èwui nu. Wo la wù woabe èvi ŋusù kudo nyɔ̃nùwo. Wo la ɖè èzò do woabe àxuewo mè.

⁴⁸Eye mù la ɖo àsi ènu dakà wɔ̀wɔ ji lè ànyigbã a ji. Nyɔ̃nùwo kpata la xɔ̀ kpakpla àleke be wo mu gbà jè woa nɔ̀vi nyɔ̃nù èvè kèawo be àgbè nɔ̀nɔ yomè ò.

⁴⁹Mì la kpɔ ènu dakà kèwo mì wɔ̀a be emèsonuwo eye mì la dro mìabe àhasì wɔ̀wɔa be àgbã. Nène a ye mì la nya ɛ̀ be mù nyi Tɔhonɔ̀ Mawu.”