Read gen Ezekìɛl 24 Bible Online

Ezekìɛl 24 - gen bible

Ezekìɛl 24

¹Kè wo kplɔ̀ àmèwo yì gàtɔnugbe be èpè àsiɖèkɛgɔ̃, lè wètri èwogɔ̃a be ŋùkèkè èwogɔ̃a gbèa, Tɔhonɔ̀ be ègbèa ɖì na mù gblɔ̃ be:

²“Èwò àgbètɔ be èvi, ŋlɔ̀ egbè be àzãa dà ɖɛ, ɖo sɔ so egbèa, Babɛ̀l be èfìɔa la yì xa Yèruzàlɛm be èdùa.

³Sɔ èlododo be ènyà kèa yì na àpe dùkɔ̃ jèaglaa. Gblɔ̃ na ɛ̀ be: “Nène a ye Tɔhonɔ̀ Mawu gblɔ̃: Jrà gàze ɖànua ɖo, ne wòa kɔ̀ èsì ɖo e mè.

⁴Lɔ èlã sòsowo kɔ̀ ɖo e mè, lɔ àkpa nyuɛ̃wo kɔ̀ ɖo e mè, àta gbɔ kudo èkpomè. Eye wòa lɔ èpu nyuɛ̃awo cã kɔ̀ ɖo e ji ne bèa ɖɔ.

⁵Sɔ àlɛ̃vi doàmì ɖe be èlã, zĩ yebe èpuwo ɖo gàzea mè ɖaa, ɖà ɛ̀ kudo èzò hɛ̀hɛ̀ ɖo èpuawo ŋutɔ cã ɖo la bi.

⁶Ɛ̃ɛ, sè ènu kè ènyè Tɔhonɔ̀ Mawu mù le gblɔ̃a ɖa: Bàbàa na èdù dãhlɔ̃ kèa! E ɖì gàze jè àkaɖa ɖe, kè wo mu la gbà teŋu tutu kaka be la kɔ̀ ò. Trɔ lɔ ènuwo lè gàzea mè kɔ̀ ŋùgbe ɖèka-ɖèka, ɖekpe mu gbà kpɔ̀tɔ̀ ci e mè ò.

⁷Ɖo èhũ kè Yèruzàlɛm kɔ̀a gbà kpɔ̀tɔ̀ lè èdùa mè, e kɔ̀ ɖo àkpã gbalo ɖe ji, ànyigbã mu nù ì kaka ne woa kù èkɔ cɔ̃ ɛ̀ ò.

⁸Nyè cã mù tàsi èhũa ɖo àkpãa ji, lè fikè e lè gàglàgbè lè eye èkɔ mu la cɔ̃ ɛ̀ òa ne bèa teŋu fɔ̃ àpe àdɔ̀mèze hɛlihɛlia.

⁹Ɛ̃ɛ, ènyè Tɔhonɔ̀ Mawu mù le gblɔ̃ ɛ̀ be: Bàbà na èdù dãhlɔ̃ kèa! Mù la do ànakèkpo be èzò gãa ɖe dà ɖɛ!

¹⁰Bɔ̀ ànakèkpowo ɖo tèpe ɖèka, ɖè èzò do e mè, ne wòa ɖà, gbà ɖà èlãa, kɔ̀ ɖàdonuwo ɖo e ji eye wòa fiɔ̃ èpuawo kaka yì vɔ̀vɔnu.

¹¹E yomè a, sɔ gàze gbaloa dà ɖo èzòfia ji ne bèa jèzò, kaka ne ègà kè wo sɔ wɔ̀ ɛ̀a, bèa bìa hɛ̀ɛ. Nène a, èɖinu kèwo lè e mèa, la fiɔ̃ keŋu-keŋu, eye àkaɖaa cã la fiɔ̃.”

¹²Vɔ̀ àgbàgba jèjewo nyi gbalo. Ɖo àkaɖaa kpata mu la fiɔ̃ lè èzò mè ò.

¹³Yèruzàlɛm, àpo èhlɔ̃dãnuwo na wò ɖùkɔ̀. Mù jro la kɔ̀ ŋuti wò, vɔ̀ wò mu ɖè àsi lè ɖokoe wò ŋuti ò. Eŋuã, wò mu la kɔ̀ kpɔ ne wò mu to àpe àdɔ̀mèze be àdãa mè ò.

¹⁴Ènyè Tɔhonɔ̀ ye le gblɔ̃ ɛ̀. E la va e mè, ɖo mù la wɔ̀ ɛ̀ pɛpɛpɛ, ènu ɖe mà gble dàɖɛ. Mù la ɖokòjo ku wò zɔ̃ ɖo àpo àgbè nɔ̀nɔ kudo wɔ̀nawo ji. Ènyè Tɔhonɔ̀ Mawu ye gblɔ̃ ɛ̀.”

¹⁵Tɔhonɔ̀ be ègbèa ɖì na mù gblɔ̃ be:

¹⁶“Àgbètɔ be vi, mù la ɖè ènu xɔ̀asì kè ɖona jìjɔɛ na àpo ŋùkuviwo jo lè àvòmè. Wò mu la fãvi àlo la làmɔɛ̃ kaka la lòfũ ò.

¹⁷Mù gbà ɖè vevesèse wòa fiɔ ò, mù gbà wɔ̀ ècɔ ò. Vɔ̀, sɔ ènu bla èta ne wòa do àfɔ̀kpa. Mù gbà sɔ ènu cɔ̃ ŋùmè ò. Mù gbà ɖùnu sìgbè àhòsì nène ò.”

¹⁸Mù yì pò nupo na dùkɔ̃a ŋùdekɛ̃nyɛ mè eye fìɛ̃si mèa, èsrɔ̃ nyè ku. Kè èŋù kèa, mù yì wɔ̀ ènu kè Tɔhonɔ̀ ɖo àsi na mù a.

¹⁹Àmèwo va biɔ mù sè be: “Ɖè ènu kè wò wɔ̀a gɔ̃mè na mi.”

²⁰Mù ɖo e ŋuti na wo be: “Tɔhonɔ̀ be ègbèa ɖì na mù gblɔ̃ be:

²¹“Gblɔ̃ na Izràɛl be àxuea be mù la na àmèjrowo la gudu tɛmpelì nyèa. Togbɔ be è nyi èglowɔ̀nu na mì, gbà nyi ŋùɖo na mìabe àgbèa, wo la wù mìabe èvi ŋusù ku nyɔ̃nùwo lè èwui nu.

²²Eye mì la wɔ̀ sìgbè àlekè mù wɔ̀a nène tututu. Mì mu gbà sɔ ènu cɔ̃ ŋùmè ò. Mì mu gbà ɖùnu sìgbè àhòsìwo nène ò.

²³Mìabe ètablanuwo ne nɔ̀ èta na mì eye àfɔ̀kpawo ne nɔ̀ àfɔ̀wo na mì. Mì mu la wɔ̀ ècɔ kaka la sèveve ò.

²⁴Ènu kè Ezekìɛl wɔ̀a, le nyi dosia na mì. Mì la wɔ̀ sìgbè e ye ke nène pɛpɛpɛ. Eye ne e va jɔ̀ a, mì la nya ɛ̀ be ènyè ye nyi Tɔhonɔ̀ Mawu.”

²⁵Èwò àgbètɔ be èvi sè: gbè ɖèkaa, mù la xɔ̀ kɔ̀kɔ̀ɛpea lè woa si. Woabe jìjɔɛ donu kè nana wo ŋusɛ̃ kudo ŋùɖo kèwo nana àgbè woabe èvi ŋusù ku nyɔ̃nùwo.

²⁶Gbè ŋua gbèa, àmè ɖe kè ci àgbèa, la va gblɔ̃ lekè ènua jɔ̀ ɖoa na wò.

²⁷Gbè ŋua gbèa, ènu la hũ na wò eye wò la pò nupo kudo àmè kè ci àgbèa. Ekèa la nyi dosia na wo eye wo la nya ɛ̀ be ènyè ye nyi Tɔhonɔ̀ Mawu.”