Read gen Ezekìɛl 25 Bible Online

Ezekìɛl 25 - gen bible

Ezekìɛl 25

¹Tɔhonɔ̀ be ègbèa ɖì na mù gblɔ̃ be:

²“Àgbètɔ be èvi, trɔ ŋùkumè ɖoɖa Amɔ̀nviwo gbɔ ne wòa gblɔ̃ ènyà ɖo woa ŋuti.

³Gblɔ̃ na Amɔ̀nviwo be: Mì ɖo èto ènyè Tɔhonɔ̀ Mawu be ègbè. Ɖo mì kònu wàlɛbɛ kè wo dovlo kɔ̀kɔ̀ɛpe nyèa, kè wo xa Izràɛl nyigbã eye wo kplɔ̀ Yudàviwo yì gàtɔnugbea,

⁴eŋuã, mù la ɖè mì do àsi na èwèzɛ̃pe be èmɔ̃zɔ̃tɔwo eye wo la va ɖo nɔ̀pe ɖo mìa dòmè. Woawo ye la ɖù àpo àgblèmènukuwo, la nù àpo ènyìnɔsi.

⁵Mù la trɔ Rabà, mìabe èdù gã wɔ̀ ènuɖùpe na èsɔ kpotɔnɔ̀wo. Amɔ̀n be ànyigbã kpata la nyi àlɛ̃ha be èkpawo. Nène a ye mì la nya be ènyè ye nyi Tɔhonɔ̀a.

⁶Kpɔ ènu kè ènyè Tɔhonɔ̀ Mawu mù le gblɔ̃a ye nyi ekèa be: Mì pò àsikpe eye mì tìkpo sɔ kpɔ jìjɔɛ ɖo Izràɛl be gbledoa ŋuti. Nène a ye mì ɖè mìabe cìcria fiɔ àpe dùkɔ̃a.

⁷Ɖo ekèa ŋutia, mù la ɖè ŋusɛ̃ nyèa ɖo mìa ŋuti eye mù la sɔ mì do àsi na dùkɔ̃ bu kèwo la hlà mìabe ènuwo. Mù la crɔ̃ mìabe dùkɔ̃a, la xɔ̀ ànyigbã a lè mìa si. Eye mì la nya ɛ̀ be ènyè ye nyi Tɔhonɔ̀a.”

⁸Ènyà kè ènyè Tɔhonɔ̀ Mawu, mù le gblɔ̃a ye kè: Mòab kudo Sèyir, wo gblɔ̃ be Yudà nyi dùkɔ̃ sìgbè kpɔ̀tɛawo ke nène.

⁹Ɖo ekèa ŋutia, mù la ɖè èdù kèwo le xe èmɔ̃ ne Mòab be xaxaa, do àsi. Woabe kɛ̃tɔwo la crɔ̃ wo ɖèka-ɖèka, kaka jè èdù kèwo nyɔ sìgbè Bɛt-Yesimɔ̀t, Baal-Mɛɔ̀n kudo Kiriatayìm ji.

¹⁰Mù la na èwèzɛ̃pe be èmɔ̃zɔ̃tɔwo la xɔ̀ Mòab sìgbè lekè wo xɔ̀ Amɔ̀n nène. Eye àmè ɖekpe mu la gbà ɖoŋùku Mòab ji gbèɖe, lè èsɔ̀mè ò.

¹¹Mòabviwo la kpɔ kòjosòso nyè be wɔ̀na eye wo la nya be ènyè ye nyi Tɔhonɔ̀ Mawu a.

¹²Ènu kè Tɔhonɔ̀ Mawu gblɔ̃a ye nyi ekèa: Edɔ̀mviwo wɔ̀ hlɔ̃ biɔbiɔ be ènu sùgbɔ ku Yudà be dùkɔ̃a. Ekèa ŋuti ye wo jè àgɔ̀ ɖo.

¹³Ɖo ekèa ŋutia, è nyè Tɔhonɔ̀ Mawu, mù gblɔ̃ be: Mù la ɖè àpe ŋusɛ̃a ɖo Edɔ̀m ji. Mù la crɔ̃ àgbètɔ ku èlãwo kpata lè ànyigbã kèa ji. Mù la crɔ̃ ɛ̀ so Temàn be èdùa mè kaka va Dedàn. Mù la crɔ̃ wo lè àhùa wɔ̀wɔ mè.

¹⁴Mù la na èmɔ̃ Izràɛl, dùkɔ̃ nyèa la biɔhlɔ̃ Edɔ̀mviwo. E la dɔ̃to na Edɔ̀m ɖo àdɔ̀mèze ku jìbibi nyèa nu. Nène a, wo la nya be wo mu jènà àgɔ̀ lè ji nyè ò. Tɔhonɔ̀ ye gblɔ̃ ɛ̀.

¹⁵Nène a ye Tɔhonɔ̀ Mawu gblɔ̃ be: Filistìviwo wɔ̀ ènu zɔ̃ ɖo èhlɔ̃ biɔbiɔ be ɖoɖo ji. Wo biɔhlɔ̃ woabe kɛ̃tɔwo kudo àdã kpàmè jiŋɔ ɖe eye wo crɔ̃ wo keŋu.

¹⁶Ekèa ŋuti ye ènyè Tɔhonɔ̀ Mawu, mù le gblɔ̃ be: Mù la ɖè àdɔ̀mèze nyèa ɖo woa ji. Mù la crɔ̃ wo, woa àmè kèwo so Kaftɔ̀r va ci àpùtaa (àpùtoa).

¹⁷Mù la ɖè ètodɔ̃ kudo èhlɔ̃biɔbiɔ sɛ̃ŋu nyèwo ɖo woa ji. Ne ekèa jɔ̀ a, wo la nya ɛ̀ be ènyè ye nyi Tɔhonɔ̀ Mawu.