Read gen Ezekìɛl 26 Bible Online

Ezekìɛl 26 - gen bible

Ezekìɛl 26

¹Wàlɛbɛ kè wo kplɔ̀ àmèwo yì gàtɔnugbe be èpè woeɖèkagɔ̃a, lè wètri cucugbãa be ŋùkèkè cucugbãa mèa, Tɔhonɔ̀ gblɔ̃ na mù be:

²“Àgbètɔ be èvi, ɖo Tirò gblɔ̃ so Yèruzàlɛm ŋuti be: “Aà! Aà! E ŋɛ̃, dùkɔ̃wo be àgboa gbã! E trɔva gbɔ nyè. Kè mù le jì ɖo e jia, e ya gbã keŋu-keŋu!”

³Ènyà kèa ŋuti ye Tɔhonɔ̀ Mawu gblɔ̃ be: Mù la sitè ɖo èwò Tirò ŋuti. Mù la na dùkɔ̃ sùgbɔ la sitè ɖo ŋuti wò, sìgbè lekè àpù be àsrɔ̀kewo sonaa nène.

⁴Wo la crɔ̃ àpo àgbògbòwo, la gbã àsãŋu wòawo. Mù la va bɔ̀ èkpe gbãgbãwo, eye àkpãa gbalo kpò mù tàsi ɖɛ.

⁵E la trɔ zũ tèpe ɖe lè àpù dòmè, fikè èɖɔdɔwɔ̀tɔwo la nɔ sia woabe èɖɔwo lèa. Ènyè Tɔhonɔ̀ Mawu ye gblɔ̃ ɛ̀. Dùkɔ̃wo la va hlà Tirò be èdùa.

⁶Wo la crɔ̃ kɔpe kèwo lè àpùa ŋutia. Nène a ye wo la nya ɛ̀ be mù nyi Tɔhonɔ̀.

⁷Ɖo ènyà kè Tɔhonɔ̀ Mawu gblɔ̃a ye nyi be: Mù la kplɔ̀ so èvègoa, Babɛ̀l be èfìɔ sɛ̃ŋu, Nèbukàdnezà, va sitè ɖo ŋuti wò. Èfìɔwo be èfìɔa la va kudo yebe èsɔwo, àhùakèkeviwo kudo àhùawɔ̀nuwo, gbàkudo àhùasuka sùgbɔ ɖe.

⁸Wo la crɔ̃ kɔpe kèwo lè e gbɔ lè àpùata. E yomè a, kɛ̃tɔwo la kù èdowo trɔdo eye wo la gbà ɖo èkpo kèwo la nyi àkpoxɔ̀nu gãa ɖo ŋuti wò.

⁹Wo la zɔ̃ èglìkpawo ji ku àhùawɔ̀nuwo, eye wo la tùkù àpo àsãŋuwo kudo gàkpowo.

¹⁰Woabe èsɔawo be èdù sisi la lɔ hũhũ cɔ̃ na wò. Àgbògbò wòawo la hũhũ lè àhùakèkeviawo be èdù sisi mè. Wo la gɛ̃ ɖo èdùa mè sìgbè fikè ji wo ɖo àsi sãa nène.

¹¹Wo la to èmɔ̃wo kpata ji lè èdùa mè, ku woabe èsɔwo. Wo la wù èdùmèvi wòwo lè èwui nu eye wo la mù àpo sɔtì kpɛ̃kpɛ̃awo pu ànyi.

¹²Wo la lɔ àdɔ̀kùnu wòawo sìgbè àmɔ̀nyɔ̀nu nène. Wo la hlà àpo ènu sàsawo eye wo la gbã àpo àgbògbòawo. Wo la gbã àxue nyakpɔkpɔwo, eye wo la lɔ woabe èkpe xɔ̀asìawo, àtikpowo ku àpo èkɔ kɔ̀ ɖo ètɔ̀ be dòdòmè.

¹³Mù la na àpo èhà jìjiwo nu la sò, wo mu la gbà sè èhàjìnu ɖe be ègbè lè gbɔ wò ke ò.

¹⁴Mù la trɔ wò sɔ wɔ̀ àkpã gbalo puplu. Ètɔ̀dɔwɔ̀tɔwo la nɔ sia woabe èɖɔwo lè funu. Wo mu la gbà trɔ tù èdù kèa gbèɖe ò. Ɛ̃ɛ ènyè Tɔhonɔ̀ Mawu ye gblɔ̃ ɛ̀. E la nɔ̀ nène tututu.

¹⁵Nène a ye Tɔhonɔ̀ Mawu gblɔ̃ be lè Tirò, wàlɛbɛ kè wò la jè ànyi, ye àmè kèwo le crɔ̃a la nɔ nùhlì eye èku la pò woa kpataa, ètɔ̀dòmèkɔ̃ɛ̃ kèwo la sèa, la hũhũ tìtìtì.

¹⁶Èfìɔ kèwo lè àpùgoa, la ɖì lè woabe àzìkpeawo ji. Wo la ɖè woabe dàbla kudo èfìɔ be àwùawo dàɖɛ. Wo la ɖɔ ku ŋùkpɛ̃ eye wo la nɔ̀ ànyi ɖo ànyigbã gbalo. Wo la kpɔ̀tɔ̀ nɔ hũhũ ku vɔ̃vɔ̃.

¹⁷Wo la jì mɔɛ̃làla be èhà na wò: “Aò, wo gbã èdù ɖìnyia, e bu lè àpùwo dòmè! Àpo èdùmèviwo ɖo ŋusɛ̃ ɖo àpùwo ji sã, eye àmèwo kpata vɔ̃na wo.

¹⁸Fifìa, àpù ŋuti be dùkɔ̃wo le vɔ̃ ɖo wò mu gbà lè ò. Ètɔ̀dòmèkɔ̃ɛ ji tɔwo le vɔ̃ ɖo wò bu keŋu-keŋu.

¹⁹Ɛ̃ɛ, mù le gblɔ̃ ɛ̀, ènyè Tɔhonɔ̀ Mawu, mù la wɔ̀ wò cã sìgbè èglìkpo be èdù, kèwo mu gbà ɖo àmè ɖekpe òa ke nène. Mù la na àpùsi gbogbowo la cɔ̃ ji wò vĩi keŋu.

²⁰Mù la ɖiɖi wò ɖo èku be èdo gãa mè ne wòa yì kpe gbèɖegbè be àmèkukuwo. Wò la yì nɔ̀ ègũmè be èdùa mè, yì ca èha kudo gbèɖegbè be àmèkukuwo. Wò mu la gbà fɔ̃ va gbèɖe ò, ɖo wò mu gbà ɖo nɔ̀pe lè àgbèagbèwo dòmè ò.

²¹Àpo nɔ̀nɔmè la do vevesèse na àmèwo eye wò mu la gbà nɔ̀ ànyi ò. Wo la ji wò, vɔ̀ wo mu la gbà kpɔ wò gbèɖe ò. Ènyè Tɔhonɔ̀ ye gblɔ̃ ɛ̀.”