Read gen Ezekìɛl 27 Bible Online

Ezekìɛl 27 - gen bible

Ezekìɛl 27

¹Tɔhonɔ̀ be ègbèa ɖì na mù gblɔ̃ be:

²“Èwò àgbètɔ be èvi, jì àviha ɖo Tirò be èdùa ŋuti!

³Gblɔ̃ na Tirò kè ɖo nɔ̀pe ɖo àpùto, eye be dona àjɔ kudo dùkɔ̃ sùgbɔ, kèwo nɔ̀nà ètɔ̀dòmèkɔ̃ɛ̃wo jia be Tɔhonɔ̀ Mawu gblɔ̃ be: Oò Tirò, wò gblɔ̃nà be: “Mù nya kpɔkpɔ ŋutɔ!”

⁴Nɔ̀pe wòa kèkè kaka yì àpù dòmè, eye wo wɔ̀ wò nyuɛ̃ ɖe ŋutɔ.

⁵Wo wɔ̀ wò sìgbè àpùjihũ nène. Senì be èjètiwo ye wo sɔ wɔ̀ èhũa be gɔ̃mè. Wo sɔ Libàn be sedàti wɔ̀ àbaɖati a.

⁶Wo sɔ Bacàn be àtisu wɔ̀ àtàmbloawo. Wo sɔ Grik be ètɔ̀dòmèkɔ̃ɛ̃wo be sedàti wɔ̀ àgboŋugblo sò emè. Wo tɛ ènyìɖu ɖo wo ŋuti.

⁷Àpo àyalevɔwo nyi Ejiptè be àlɛ̃ŋudà kè ŋuti wo tɔ̃ èkàwo ɖoa. Ekèa nana wo jènàsi wò lè àzɔ̀ge. Àvɔ kèwo wò sɔ cɔ̃na àpo àgbãawo so Kiprò, wo ɖo kɔlà jɛ̃ kudo àyòŋùklɛ.

⁸Sidòn ku Arvàd[13] be ŋusùtiwo ye nyi àpo àtàmblo kùtɔwo, eye Tiròvi kèwo bia nyi àklùmawo[14]

⁹Gebàl[15] be àlɔ̀nudɔwɔ̀tɔ bibiwo ye jrànà ènu kèwo gblea ɖo. Àpùjihũwo kpata tɔnatè ɖo gbɔ wò eye àpùdɔwɔ̀tɔwo plènà ènu sàsa wòawo.

¹⁰Pɛrsìa be gbãdãgbãwo ku kèwo so Ludò kudo Putò, wo ye lè àpo àhùakɔ̃a mè. Gbɔ wò ye wo wlana woabe àkpɔxɔ̀nu kudo gàkukuwo ɖo, wo na àpo nyikɔ gbãkpe àgoa kpata ji.

¹¹Arvàd be ŋusùtiwo ɖiana àpo àgbògbòawo kudo wò ŋutɔ gbãdãgbã wòwo. Gamàd be ŋusùtiwo ya ɖiana àsãŋuawo. Wo sɔ na woabe àkpoxɔ̀nuawo kùnà ɖo èglì ŋuti trɔdo wò gòdò. Wo gbà nana wò nyiɖìɖi kpe è.”

¹²“Tarsò be àjɔdotɔwo sànàsì kudo wò lè àdɔ̀kùnuwo kpata mè. Wo nana sìka, klòsalò, gàyìbɔ, suŋubui ɣe kudo suŋubui bɔna lè àpo àsìwo mè.

¹³Àmèwo sona Grik, Tubàl kudo Mècɛk be èdùwo mè va sànà àsì lè gbɔ wò eye wo hɛ̃nà kluviwo kudo gàjɛ̃ be ènuwo va sɔ xɔ̀nà àpo ènusàsawo.

¹⁴Bɛt-Tògarmà be àsìsàtɔwo sànà èsɔ yì àhùa ku èsɔ kèwo dɔ̃nà àhùakèkeviwo kudo èsɔàkɛtɛwo lè gbɔ wò.

¹⁵Dedàn be àsìsàtɔwo cã va sànà ènuwo lè gbɔ wò. Àmè sùgbɔ sona ètɔ̀dòmèkɔ̃ɛ̃wo ji va plènà àsì lè gbɔ wò. Eye wo sɔna ènyìɖu kudo àti yìbɔwo tuna èfɛ̃ na wò.

¹⁶Edɔ̀mviwo plènà ènu sùgbɔ lè gbɔ wò; Wo sɔna èkpe xɔ̀asìwo, àvɔ jɛ̃ nyuɛ̃wo, àvɔ kèwo wo lɔ̃a, àlɛ̃ŋudà be àvɔ, èkpe fòfowo kudo èkpe jɛ̃ kɛ̃klɛ̃, tuna èfɛ̃ na wò.

¹⁷Yudà kudo Izràɛlviwo dona àjɔ kudo wò eye wo hɛ̃nà àgblèmènukuwo va sìgbè èpò, ànyisì, àmì, lifi. Wo hɛ̃nà èlù so Mìnit cã vana.

¹⁸Dàmaskò be àmèwo plènà ènu vòvòvò sùgbɔwo lè gbɔ wò. Wo tuna èfɛ̃ na wò kudo Hɛlbɔ̀n be vɛ̃ gbàkudo Sahàr be àlɛ̃ be èfuwo.

¹⁹So kaka Uzàl, Dàn ku Yavàn be kɔ̀tawo sɔna gàkpo kèwo èzògbɛ̀dɛwo tùa va plè ènu lè gbɔ wò. Wo hɛ̃nà àcãŋùku kudo àɖako xuɛ̃titi cã vana.

²⁰Dedàn be àmèwo hɛ̃nà èsɔwo be àzìkpe be àvɔ va sànà lè gbɔ wò.

²¹Àrabìa kudo Kedàr be ègawo va plènà ènu lè gbɔ wò. Wo hɛ̃nà àlɛ̃viwo, àgbòwo kudo ègbɔwo va.

²²Sabà ku Ragmà be àsìsàtɔwo vana gbɔ wò. Wo hɛ̃nà àmì xuɛ̃titi nyuɛ̃wo, èkpe xɔ̀asì vòvòvòwo kudo sìka va plènà ènuwo lè gbɔ wò.

²³Haràn, Kanè ku Edɛ̀n be èdùmètɔwo kaka jè Sabà ku Àsur kudo Kilmàd be àsìsàtɔwo va sànà àsì lè gbɔ wò.

²⁴Ènu xɔ̀asìwo be àjɔ ye wo dona kudo wò. Wo hɛ̃nà àyòŋùklɛ be àwù gãwo, àwù kèwo ŋuti wo lɔ̃ èkà hamè-hamèwo ɖoa, kùŋùtu kpɛ̃kpɛ̃ àmàdodo vòvòvòwo kudo èkà totro àdodoewo va.

²⁵Tarsò be àpùjihũ gãgãwo lɔna àpo àgbãwo.” “Wò ɖɔ kudo àjɔdonuwo, wò do àgbã kpɛ̃kpɛ̃ sìgbè àpùjihũ kè lè àpù dòmèa nène.

²⁶Àtàmblokùtɔwo kplɔ̀ wò yì ègũ ji, eye èwèzɛ̃pe be àya la gbã wò lè èsìa dòmè.

²⁷Àpo àdɔ̀kùnuwo, àgblèmènukuwo, ènusàsawo, àklùmawo kudo woabe ŋutimewo, èhũjràɖotɔwo, àsìsàtɔawo, gbãdãgbã kèwo le wɔ̀dɔ na wòa, àmèha kèwo lè àpùjihũ wòa mèa, ènu sia ènu crɔ̃ vĩi, wàlɛbɛ kè èhũ wòa gbãa.

²⁸Wàlɛbɛ kè wo sè èhũkùtɔawo be àpadodoa, ètɔ̀dòmèkɔ̃ɛ̃wo be èdùmèviwo hũhũ.

²⁹Àtàmblokùtɔwo kpata gble woabe èhuãwo ɖɛ. Àklùmawo kudo woabe ŋutimewo ɖì va ànyigbã pupuia ji.

³⁰Wo la ŋɛ̃ ɖo èta ji na wò kudo èhùɛdodo sɛ̃ŋuwo. Wo la lè hũhũ, la blìbɔ̀ àfi mè sɔ ɖè woabe vevesèsea fiɔ.

³¹Kù ɖo ŋuti wòa, wo la plɔ èta eye wo la do èfũlòlo be àwùwo. Wo la fãvi kɔ̀ ɖo ji wò èjì gbãgbãtɔ̀, eye wo la dohùɛ do wò veveɖe.

³²Lè woabe vevesèse mèa, wo jì àviha kèa ɖo ji wò, wo to èfũlòha kèa be: “Èdù kɛ ye sɔ̀ ku Tirò, fifìa, èɖa ɖo lè e nu lè àpùa dòmè see!”

³³Wàlɛbɛ kè wo le ɖè àsìsàsa be àgbãawo to lè àpo àpùjihũawo mèa, wò nana ènu ɖùɖu sùnà dùkɔ̃ sùgbɔ si. Àpo àsìsàsa be ènu kudo ènunɔ̀amèsiwo nana ànyigbã a be èfìɔwo kpɔna èci.

³⁴Fifìa, kpɔ lekè àsrɔ̀kewo gbã wò, eye wò bu ɖo èsìa dòmè ɖa. Àpo àgbãwo kudo ŋutime wòwo kpata crɔ̃ ku wò ɖo àpùa mè.

³⁵Ètɔ̀dòmèkɔ̃ɛwo be àmèwo lè ŋuzĩzĩ gã ɖe mè ɖo ŋuti wò. Woabe èfìɔwo caka ku vɔ̃vɔ̃, woabe ŋùkuwo mè ci jojojoe.

³⁶Dùkɔ̃wo be àsìsàtɔwo ɖɔ ku ènuhàha, ɖo wò trɔ zũ èŋɔjidonu, wò mu gbà lè ò, wò crɔ̃ gbidi!”