Read gen Ezekìɛl 28 Bible Online

Ezekìɛl 28 - gen bible

Ezekìɛl 28

¹Tɔhonɔ̀ be ègbèa ɖì na mù gblɔ̃ be:

²“Àgbètɔ be èvi, gblɔ̃ na Tirò be ègaa be: Nène ye Tɔhonɔ̀ Mawu gblɔ̃ be: ɖo wò kpɔ jìjɔɛ eye wò gblɔ̃ be: “Mù nyi mawu ɖe, mù nɔ̀ ànyi lè mawuwo dòmè lè àpù be gòglòpe ke!” Wò susu be yè nyi mawu, co wò mu ɖo Mawu be kpɛ̃kpɛ̃mè ɖe ò! Àgbètɔ kpò wò nyi.

³Wò xɔ̀sè be yè ɖo ènunya wu Dànèl. Wò susu be yè teŋu ŋɔjè àmlìmànuwo kpata mè.

⁴To àpo bìbi kudo ènunya mèa, wò ɖo àdɔ̀kùnuwo na ɖokoe wò. Wò ɖo sìka ku klòsalò ɖo àpo fòtrowo mè.

⁵Wò bɔ̀ àlè sùgbɔ to àpo bìbi lè àjɔdodo mè. Eye ekèa na wò ɖɔ ku ègòyiyi.

⁶Eŋuã, sè ènu kè ènyè Tɔhonɔ̀ Mawu gblɔ̃a be: “Wò sɔ ɖokoe wò ɖo mawu ɖe be bònu.

⁷Ekèa ŋuti ye mù la ɖè wò do àsi na dùkɔ̃ kèwo wɔ̀nà ènu dakàwo. Wo la ɖè èwui ɖo ji wò sɔ crɔ̃ ènu kèwo wò wɔ̀ to ènunya mèa. Wo la dovlo àpo nyiɖìɖia.

⁸Wo la ɖiɖi wò ɖo yɔ̀do wòa mè. Wò la ku èku kpàtà ɖe lè àpùa be dòdòmè ke.

⁹Lè àmè kèwo la va wù wòa be ŋùkɔ̀a, wò la gbà teŋu gblɔ̃ be: “Mù nyi mawua?” Gãkea, àgbètɔ kpò wò la nyi lè àlɔ̀ mè na àmè kèwo la crɔ̃ wòa, mu nyi mawu ò.

¹⁰Wò la ku ègbɔɖìamè be èku, lè àmèjrowo be àlɔ̀ mè. Ènyè Tɔhonɔ̀ Mawu ye gblɔ̃ ɛ̀.”

¹¹Tɔhonɔ̀ be ègbèa ɖì na mù gblɔ̃ be:

¹²“Àgbètɔ be èvi, to àviha ɖo Tirò be èfìɔa ŋuti. Wò la gblɔ̃ na ɛ̀ be, ènyè Tɔhonɔ̀ Mawu ye le gblɔ̃ ɛ̀ be: “Kpɔɖa, wò nyi kpɔwɔɛ to àpo ènunya ku ɖèkajɛ jèje màsɔ̀kua ji.

¹³Wò ɖo nɔ̀pe ɖo Edɛ̀n, Mawu be àbɔ a mè; fikè èkpe xɔ̀asìwo bɔ lè: èkpe Jɛ̃ Siãsiã, Tòpazè ku Daimɔ̀n, Krizòlitè, Kɔ̀rnalinà ku Jaspè, Sàfirò, Grenàt ku Èmerɔ̀d. Wò dona sìkanu vòvòvò kèwo wo wɔ̀ wàlɛbɛ kè wo ɖo wòa.

¹⁴Mù cã wò sìgbè Kèrubim kè kpɔna àmè ji eye àwàdawo kèkè na a. Wò sò nɔ̀pe ɖo èto kɔ̀kɔ̀ɛa ji, wò ɖìnàsà lè èzò-kpe kɛ̃klɛ̃wo dòmè.

¹⁵So kaka gà kè mè wo ɖo wòa, wò nɔ̀ nɔ̀nɔmè nyuɛ̃ ɖe mè va ɖo gbè kè gbè ye èvuɛ̃ gɛ̃ ɖo gbɔ wòa.

¹⁶Àsìsàsa wòa va kpɔ ŋùkɔ̀yìyi. Ekèa tùtù wò ɖo èkunyrãnyrã mè eye wò wɔ̀nà èvuɛ̃ fàa. Eŋuã, mù la nyà wò lè èto nyèa ji eye mù la sɔ wò ɖo àmè gbalo be èbɔ̀nu. Mù la nyà wò lè èzò-kpe kɛ̃klɛ̃wo dòmè.

¹⁷Èjì wòa va trɔ ègòyitɔtɔ̀, ɖo àpo ɖèkajɛ jèjea ŋuti. Àpo jiɖùɖu be zĩzĩa na sùsumè caka na wò. Ekèa ŋuti mù la sɔ wò dãŋùgbe ɖo ànyigbã eye mù la ɖè wò do àsi na èfìɔ kpɔ̀tɛawo.

¹⁸Lè àpo àjɔdodowo mèa, wò mu wɔ̀nà ànùkua kaka la wɔ̀ jɔ̀jɔɛ ò. Nène a ke ye wò dovlo kɔ̀kɔ̀ɛpewo cã yeŋu. Ekèa ŋutia, mù la ɖè èzò ɖe ɖo èdù wòa mè, kè la crɔ̃ wòa. Mù la trɔ wò wɔ̀ àfi lè àmèwo be ŋùmè.

¹⁹Dùkɔ̃ kèwo jèsi wòa, la nɔ̀ ŋuzĩzĩ gã ɖe mè ɖo ŋuti wò. Wò la nyi vɔ̃vɔ̃donu na dùkɔ̃wo kpata, eye wò la crɔ̃ gbidi.”

²⁰Tɔhonɔ̀ be ègbè ɖì na mù gblɔ̃ be:

²¹“Àgbètɔ be èvi, trɔ kpãŋùkɔ̀ Sidɔ̀n be èdùa ne wòa gblɔ̃ ènyà ɖo e ŋuti!

²²Gblɔ̃ ènyà kè ènyè Tɔhonɔ̀ Mawu mù ɖè na wòa, na ɛ̀ be: Mù la sitè ɖo Sidɔ̀n ŋuti! Mù la ɖè gogo nyèa fiɔ lè èdùa mè. Mù la wɔ̀ ènu kè mù gblɔ̃a, kudo wò godo. Eye àmè sia àmè la nya be mù nyi Tɔhonɔ̀, wàlɛbɛ kè mù la na ètodɔ̃ nyèa la zɔ̃ sùua.

²³Mù la ɖo èdɔ̀ vuɛ̃ ɖoɖa wò, eye èhũ la srà lè èmɔ̃ wòwo ji. Wo la xa wò to àgowo kpata ji eye èdùmèviwo la jè ànyi lè èdùa mè. Nène a, àmè sia àmè la nya be ènyè ye nyi Tɔhonɔ̀a.”

²⁴“Eye dùkɔ̃ ɖekpe mu la gbà kpɔ̀tɔ̀ nɔ nyi àfɔ̀klɛ̃ àlo àŋùja na Izràɛl be dùkɔ̃a ò. Nène a, àmè sia àmè la nya ɛ̀ be ènyè ye nyi Tɔhonɔ̀a.

²⁵Nène a ye Tɔhonɔ̀ Mawu gblɔ̃ be mù la bɔ̀ Izràɛlviwo so dùkɔ̃wo dòmè, fikè wo kãkã ɖoa. Eye mù la ɖè ɖokoe nyè fiɔ dùkɔ̃ kpɔ̀tɛawo. Wo la nɔ̀ ànyigbã kè mù sɔ na Yakɔb, sumɔ̃vi nyèa ji.

²⁶Wo la nɔ̀ tomè fàfa mè. Wo la sò nɔ̀pewo eye wo la dà vɛ̃-gblewo. Wo la nɔ̀ tomè fàfa mè, ɖo mù la dɔ̃to na dùkɔ̃ kèwo crì woa. Nène a, wo la nya be ènyè ye nyi Tɔhonɔ̀ woabe Mawu a.”