Read gen Ezekìɛl 29 Bible Online

Ezekìɛl 29 - gen bible

Ezekìɛl 29

¹Lè èpè èwogɔ̃a be wètri èwogɔ̃a be ŋùkèkè woèvègɔ̃a mè wàlɛbɛ kè wo kplɔ̀ àmèwo yì gàtɔnugbea, Tɔhonɔ̀ be ègbèa ɖì na mù gblɔ̃ be:

²“Àgbètɔ be èvi, trɔ àpo ŋùmè ɖo Ejiptè be èfìɔ Faraɔ̀n ŋuti, ne wòa gblɔ̃ ènyà ɖɛ ɖo Ejiptè be èdùa ŋuti.

³Gblɔ̃ be: Nène ye Tɔhonɔ̀ Mawu gblɔ̃ be: Mù la sitè ɖo èwò Faraɔ̀n, Ejiptè be èfìɔa ŋuti. Wò lè sìgbè èlo jiŋɔ ɖe nène, mlɔ̃ ànyi ɖo ètɔ̀ gãa mè. Wò gblɔ̃ be “Ètɔ̀a nyi tɔ̀ nyè, ènyè ye ɖo è.”

⁴Ɛ̃ɛ, mù la dogà àglãwo na wò, mù la sɔ ètɔ̀ wòa be èlãwo tɛ ɖo àpo àgbàze ŋuti. Eye mù la dɔ̃ wò to ètɔ̀a be àlɔ̀zɛ̃wo be dòdòmè kudo èlã kèwo tɛ ɖo ŋuti wòa kpata.

⁵Mù la sɔ mì dãŋùgbe ɖo zògbè ji, èwò kudo èlãawo kpata. Wò la ku ci ànyigbã pupuia ji. Àmè ɖekpe mu la va sɔ wò, àmè ɖe mu la va ɖì wò ò. Mù la sɔ wò wɔ̀ ènuɖùɖu na ègbemèlãwo kudo xèviwo.

⁶Nène a ye Ejiptèviwo kpata la nya ɛ̀ be mù nyi Tɔhonɔ̀. Àlɔ̀do kè wò na Izràɛlviwo flà sìgbè àɖako ɖe kpò nène.

⁷Wàlɛbɛ kè wo gba ɖo ŋuti wòa, wò ŋɛ̃. Wò do àbì àbɔta na wo eye wò gbɔjɔ wo keŋu.

⁸Ekèa ŋuti ye ènyè Tɔhonɔ̀a, mù le gblɔ̃ be: Mù la ɖo àhùa ɖoɖa wò. Eye mù la na àgbètɔ ku èlãwo la crɔ̃ lè ànyigbã wòa ji.

⁹Ejiptè la crɔ̃ eye e la trɔ zũ zògbè pupui. Nène a, xixea kpata la nya ɛ̀ be ènyè ye nyi Tɔhonɔ̀a. Wò gblɔ̃ be: “Ètɔ̀ gãa nyi tɔ̀ nyè, ènyè ye ɖo è.”

¹⁰Ɖo eŋuã ŋutia, mù la sitè ɖo èwò ku ètɔ̀ gãa ŋuti. Mù la trɔ Ejiptè wɔ̀ èglìkpo ɖèɖe. Èdùa la trɔ zògbè, so Migdɔ̀l va kɔ̀ ɖo kaka Àsuã be èdùa mè kudo Ètiopìa be lipòa gbɔ lè àpùgo.

¹¹Àgbètɔ ɖekpe, èlã ɖekpe mu la to funu ò. Eye Ejiptè la ci toto nènea xɔ̀ èpè èkà sɔ̃ŋu.

¹²Mù la trɔ Ejiptè wɔ̀ zògbè toto wu zògbèwo kpata. Yebe èdùwo la crɔ̃ wu èdùwo kpata. Èpè èkà sɔ̃ŋu ye mù la kãkã Ejiptèviwo ɖo dùkɔ̃ kpɔ̀tɛawo dòmè, lè ànyigbãwo kpata ji.

¹³Nène a ye Tɔhonɔ̀ Mawu gblɔ̃ be: Lè èpè èkà yomè a, mù la bɔ̀ Ejiptèviwo so dùkɔ̃ kèwo dòmè wo kãkã ɖoa.

¹⁴Mù la trɔ wɔ̀ ènyuɛ̃ na Ejiptè. Mù la trɔ kplɔ̀ wo va Patrɔ̀s nyigbã ji, lè woabe jɔ̀sope. Funu ye wo la sò fìɔdu viɖe ɖo.

¹⁵E la hùe wu fìɔduwo eye mu la gbà gla ɖo dùkɔ̃ kpɔ̀tɛawo ji ò. Mù la ɖiɖi woabe kpɛ̃kpɛ̃ mè ne wo mu gbà ɖù dùkɔ̃ kpɔ̀tɛawo ji ò.

¹⁶Nène a, wo mu la gbà nyi dùkɔ̃ kè ŋuti Izràɛlviwo la dojì ɖo ò. Wo mu la gbà sɔ woa ɖokoe na Ejiptè kaka la va jè èvuɛ̃ mè ò. Eye àmè sia àmè la nya ɛ̀ be ènyè ye nyi Tɔhonɔ̀a.”

¹⁷Lè èpè wìvɔ adrɛ̃ wàlɛbɛ kè wo kplɔ̀ wo àhùalea, lè wètri cucugbãa be ŋùkèkè cucugbãa gbèa, Tɔhonɔ̀ be ègbèa ɖì na mù gblɔ̃ be:

¹⁸“Àgbètɔ be èvi, wò le kpɔa, Babɛ̀l be èfìɔ Nèbukàdnezà zĩ yebe àhùakɔ̃a ji sɔ wɔ̀ ènu kpòtoe kudo Tirò be èdùa. Wo na Tirò be àhùawɔ̀tɔwo be èta plɔ eye àbɔta xɔ̀abì na wo. Vɔ̀a, èfìɔa kudo yebe ŋutimewo mu kpɔ àlè ɖekpe xɔ̀ lè ekèa mè ò.

¹⁹Ɖo ekèa ŋuti ye Tɔhonɔ̀ Mawu le gblɔ̃ be: Mù ɖè Ejiptè be èdùa do àsi na Babɛ̀l be èfìɔ Nèbukàdnezà. E la hlà ànyigbã a be ènuawo eye be la gbà crɔ̃ ɛ̀. E la lɔ àmɔ̀nyɔ̀nuawo eye be la ma wo na yebe gbãdãgbãwo.

²⁰Mù la sɔ Ejiptè sɔ tufɛ̃ na ɛ̀ ɖo èdɔ kè be wɔ̀a nu, ɖo ènyè ye yebe àhùakɔ̃a wɔ̀ èdɔa na. Ènyè Tɔhonɔ̀ Mawu ye gblɔ̃ ɛ̀.

²¹“Ne ekèa va jɔ̀ a, mù la trɔ ɖɔ̀lì Izràɛlviwo be ŋusɛ̃. Èwò yaa, mù la na wò ŋusɛ̃ ne wòa pò nupo na wo. Nène a, wo la nya ɛ̀ be mù nyi Tɔhonɔ̀.”