Read gen Ezekìɛl 3 Bible Online

Ezekìɛl 3 - gen bible

Ezekìɛl 3

¹Àmè kè le pò nupo na mù a, gblɔ̃ be: “Èwò àgbètɔ be èvi, ɖù ènu kè lè ŋùkɔ̀ na wòa. Ɖù xoma ŋɔŋlɔ̃ kèa ne wòa yì pò nupo na Izràɛlviwo.”

²Mù hũ àpe ènu eye e sɔ xoma kèa na mù ne mà-ɖù.

³E gbà gblɔ̃ na mù be: “Èwò àgbètɔ be èvi, na pòdo wòa ne ɖù ne àmèti wòa ne ɖɔ kudo xoma kè mù sɔ le na wòa.” Nène a ye mù ɖù ì eye e vivi lè ènu mè na mù sìgbè ànyisì nène.

⁴E gbà gblɔ̃ na mù be: “Àgbètɔ be èvi, yì Izràɛl be àxuedo a gbɔ ne wòa gblɔ̃ ènyà nyèwo na wo.

⁵Nyè mu le dɔ̃ wò ɖoɖa dùkɔ̃ kè be ègbèdodo sɛ̃ŋua gbɔ ò, vɔ̀ ɖoɖa Izràɛl be dùkɔ̃a gbɔ.

⁶Ne mù dɔ̃ wò ɖoɖa dùkɔ̃ kèwo be ègbèdodo sɛ̃ŋua gbɔa, wo la sè àpo ènyàa.

⁷Vɔ̀a Izràɛl be àxuedo a mu ji la sè àpo ègbè ò, ɖo wo mu le ji la sè ègbè nyè ò. Nyàwoa, Izràɛl be àxuedo a kpata nyi àmè kèwo be ŋùgonu sɛ̃ŋu eye woabe èjì trì.

⁸Co mù la lìa àpo ŋùkumè be ne wòa teŋu nɔ̀tè ɖo woabe ŋùkumè, eye ŋùgonu wòa la sɛ̃ŋu lè woa tɔ̀awo be ŋùkɔ̀!

⁹Mù la wɔ̀ ŋùgonu wòa la sɛ̃ŋu sìgbè daimɔ̀n nène, kè gbà sɛ̃ŋu wu èkpea. Wò mu ɖo la vɔ̃ wo eye wò mu ɖo la tàsi ɖokoe wò ne woa do vɔ̃vɔ̃ na wò ò. Ne wo gbà nyi dùkɔ̃ kè èkɔ̀ lìa na ŋutɔ cã a.”

¹⁰E gbà gblɔ̃ na mù be: “Àgbètɔ be èvi, na àpo èjì ne xɔ̀ eye àpo ètowo ne sè ènyà kèwo kpata mù la gblɔ̃ na wòa.

¹¹E yomè a, yì àhùale kèwo so àpo dùkɔ̃a mèa gbɔ. Wò la pò nupo na wo eye ne wo sè àlo wo mu sè òa, wò la gblɔ̃ na wo be: “Ènu kè Tɔhonɔ̀ Mawu gblɔ̃a ye kè.”

¹²Ekèa yomè a, gbɔ̃gbɔ̃a gbà kɔ mù jo eye mù le sè àpadodo gã ɖe lè àpe ŋùgbedòmè gblɔ̃ be: “Kafu ye jè na Tɔhonɔ̀ kè le ɖè yebe gogoa fiɔ so kaka yebe nɔ̀pea.”

¹³Mù sè ènu àgbèagbeawo be àwàda be zigìdi wàlɛbɛ kè wo le tɔ woa nɔ̀nɔwo, kudo zigìdi kè le to so àfɔ̀kuawo mèa cã. Hũnyà-hũnyà gã ɖe ye.

¹⁴Gbɔ̃gbɔ̃ kè kɔ mù lè ànyigbãa, kplɔ̀ mù yì. Eye mù titɔ ku jìbibi ɖo Tɔhonɔ̀ be àlɔ̀ kè kɔ mù a kpɛ̃ sɔ wu mù.

¹⁵Mù yì kɔ̀ ɖo Tɛl-Àviv, lè àhùale kèwo sò kɔpe ɖo Kebàr be ètɔ̀a to lɔ̀ge. Mù nɔ̀ woa dòmè lè funu ŋùkèkè adrɛ̃ lè tìtɔ̀ titɔ tɔ̀xɛ ɖe mè.

¹⁶Lè ŋùkèkè adrɛ̃ a yomè a, Tɔhonɔ̀ sɔ ènyà gblɔ̃ na mù be:

¹⁷“Àgbètɔ be èvi, mù sɔ wò wɔ̀ Izràɛl be dùkɔ̃a be ɖiatɔ. Wò la sè ènyà kè la to lè ènu nyèa eye wò la gblɔ̃ àfɔ̀ ɖo àfɔ̀ ji be ènyà na Izràɛlviwo.

¹⁸Ne mù to na àmè bàɖà be e la kua, va yì sìa ɛ̀. Gblɔ̃ na ɛ̀ be ne ɖè àsi lè àgbè bàɖàa ŋuti ne bèa ci àgbè. Ne wò mu yì sìa ɛ̀ òa, àmè bàɖàa la ku ɖo yebe àgɔ̀jèjea ta. Vɔ̀a, mù la biɔ wò àkɔ̃ŋùta so yebe èkua ŋuti.

¹⁹Eŋuã ne wò ɖo àfɔ̀ àfɔ̀ ji na àmè bàɖàa eye mu sètonu ò kaka la trɔ lè ènu bàɖà wɔ̀wɔa mè òa, e la ku ɖo yebe àgɔ̀jèjea ta. Vɔ̀ èwò yaa, wò la hlùɛ̃ àpo àgbè.

²⁰Ne àmè jɔ̀jɔɛ ɖe trɔ lè yebe jɔ̀jɔɛ wɔ̀wɔa yomè eye be le wɔ̀ ènu bàɖàa, mù la na e la jè èvuɛ̃ be èmɔ̃tetre mè eye e la ku. Ne wò mu teŋu yì sìa ɛ̀ òa, e la ku ɖo yebe àgɔ̀jèjea ta. Yebe ènunyuɛ̃ kèwo be wɔ̀ va yìa mu la teŋu hlùɛ̃ ò. Vɔ̀ mù la biɔ wò yebe èhlɔ̃.

²¹Co vɔ̀, ne wò teŋu yì sìa àmè jɔ̀jɔɛa be mu gbà wɔ̀ ènu bàɖà eye bèa trɔ lè bàɖàa yomè a, e la nɔ̀ àgbè ɖo àmè sìasìaa ŋuti. Eye èwò cã wò la kpɔ àgbè.”

²²Tɔhonɔ̀ be ŋusɛ̃a gbà lè mù. E gblɔ̃ na mù be: “Sitè, to yì bàlìa mè ne ma pò nupo kudo wò.”

²³Mù sitè so jè èmɔ̃ yì bàlìa mè. Eye Tɔhonɔ̀ be gogo gbà ze sìgbè àlekè mù kpɔ ɛ̀ sãa lè Kebàr be ètɔ̀a toa nène. Mù jè ànyi sɔ ŋùkumè cɔ̃ ànyi.

²⁴Eye gbɔ̃gbɔ̃ ɖe ɖo ètùmè na mù, fɔ̃ mù ɖotè. E gblɔ̃ na mù be: “Yì tu ɖokoe wò ɖo àpo àxomè.

²⁵Àgbètɔ be èvi, wo la ɖè èkàwo ɖo ji wò eye wo la bla wò àlekea be wò mu la gbà teŋu to va àmèdòmè ò.

²⁶Mù la tɛ àɖe ɖo àpo ènu mè ne wò mu gbà teŋu pò nupo ɖe ò. Wò mu la gbà teŋu kãŋùmè na dùkɔ̃ kè èkɔ̀ lìa na kèa ò.

²⁷Vɔ̀a, wàlɛbɛ kè mù ɖo ènyà ɖe la gblɔ̃ to èji wòa, mù la hũ ènu na wò. Eye wò la gblɔ̃ na wo be: “Ènyà kè Tɔhonɔ̀ Mawu gblɔ̃a ye kè.” Àmè kèwo jro be yèwoa ɖoto wòa ne sè! Àmè kèwo mu jro òa, wo ne gbe fàa! Ɛ̃ɛ dùkɔ̃ jè àgla ɖe ye.”