Read gen Ezekìɛl 30 Bible Online

Ezekìɛl 30 - gen bible

Ezekìɛl 30

¹Eye Tɔhonɔ̀ be ègbèa ɖì na mù gblɔ̃ be:

²“Èwò àgbètɔ be èvi, gblɔ̃ ènyà ɖɛ. Ɖè ènyà kè ènyè Tɔhonɔ̀ Mawu, mù gblɔ̃ na wòa na wo be: Mì làmɔɛ̃ ɖo ŋùkèkè kè gbãnàa ŋuti!

³Ɖo e gbãnà, Tɔhonɔ̀ be ŋùkèkèa lili. E la nyi ŋùkèkè kè be lilikpowo la do vìvìtia. Ŋùkèkè ŋua ji ye Tɔhonɔ̀ la biɔ àkɔ̃ŋùta dùkɔ̃wo.

⁴Àhùa la gɛ̃ ɖo Ejiptè, eye àmèwo la vɔ̃ kaka kɔ̀ ɖo Ètiopìa. Wo la wù àmèwo lè Ejiptè, la fĩ woabe àdɔ̀kùnuwo eye wo la crɔ̃ woabe ànyigbã a.

⁵Ètiopìa, Put kudo Ludò viwo, Àrabìa kudo Libìa viwo, Izràɛlviwo ŋutɔ cã la ku lè àhùaa mè.

⁶Ènyè Tɔhonɔ̀ ye le gblɔ̃ ɛ̀ be so Migdɔ̀l, lè èvègo kaka va yì Àsuã, lè àpùgoa, àmè kèwo le xɔ̀ ènyà ɖo Ejiptè taa, la ku eye Ejiptè be gòyiyia la bu keŋu. Ènyè Tɔhonɔ̀ Mawu ye gblɔ̃ ɛ̀.

⁷Ànyigbã a la trɔ zũ zògbè pupui, yebe èdùawo la trɔ èglìkpowo ɖèɖe.

⁸Wàlɛbɛ kè mù la ɖè èzò do Ejiptè be ànyigbã jia, eye yebe ènyàxɔ̀ɖoàkɔtɔwo la crɔ̃a, nènea xixea kpata la nya ɛ̀ be ènyè ye nyi Tɔhonɔ̀a.

⁹Lè ŋùkèkè ŋua gbèa, àmèdɔ̃dɔ̃ nyèwo la ɖo àpùjihũ yì hũhũ Ètiopìa kè susu be yè lè àgbɔ̃jèpò mèa. Ŋùkèkèa lili!

¹⁰Nène a, ènyè Tɔhonɔ̀ ye le gblɔ̃ be: Mù la zã Babɛ̀l be èfìɔ Nèbukàdnezà sɔ crɔ̃ Ejiptè be dùkɔ̃ gbogboa.

¹¹E ye kudo yebe dùkɔ̃ mà-wɔ̀ àmènua, la va gbã èdùa. Wo la lìɔ èwi to ɖo Ejiptèviwo ji eye wo la wù àmè sùgbɔ.

¹²Mù la na Ejiptè be ètɔ̀ gãa be àlɔ̀zɛ̃wo la pu eye mù la ɖè èdùa do àsi na àmè bàɖàwo. Mù la crɔ̃ èdùa kudo yebe àdɔ̀kùnuwo to àmèjrowo ji. Ènyè Tɔhonɔ̀ ye gblɔ̃ ɛ̀.

¹³Ènyà kè ènyè Tɔhonɔ̀ Mawu, mù gbà gblɔ̃ kpea ye nyi be: Mù la crɔ̃ legba kudo Mènfis be àjè vòduwo kpata. Èdùkplɔ̀tɔ ɖe mu la gbà nɔ̀ Ejiptè ò eye mù la na vɔ̃vɔ̃ la nɔ̀ ànyigbã kpata ji.

¹⁴Mù la crɔ̃ Ejiptè be àpùgo, mù la do èzò Soàn be èdùa mè. Mù la na àpe ètodɔ̃a la zɔ̃ sù lè Nɔ̀[16] be èdùa mè.

¹⁵Mù la ɖùɖù jìbibi be àdã nyèa ɖo Sin, èdù kè xɔ̀nà na Ejiptè a. Mù la crɔ̃ Nɔ̀ be èdùamèvi sùgbɔ.

¹⁶Mù la ɖè èzò do Ejiptè mè. Sin be èdùmètɔwo la hũhũ ku vɔ̃vɔ̃. Wo la ɖè èdo ɖo Nɔ̀ be èglìa mè, eye èdùa kpata la nyrɔ̃.

¹⁷Wo la wù Hèliopolìs kudo Pi-Besɛ̀t be ɖèkajɛwo lè àhùa eye wo la kplɔ̀ àmè kpɔ̀tɛawo àhùale.

¹⁸Wàlɛbɛ kè mù la gbã Ejiptè be ŋusɛ̃ eye mù la nɔ̀tè yebe ègòyiyia, èŋù mu la kè ɖo Tàpanès be èdùa ji ò. Lilikpo yìbɔ ɖe la cɔ̃ èdùa eye wo la kplɔ̀ àmè kèwo lè yebe àgojia yì àmèjronugbe.

¹⁹Mù la dɔ̃ èto na Ejiptè, eye wo la nya ɛ̀ be mù nyi Tɔhonɔ̀ nyàwo.”

²⁰Lè èpè woeɖèkagɔ̃a kè wo kplɔ̀ wo àhùalea, lè wètri cucugbãa be ŋùkèkè adrɛ̃gɔ̃ a gbèa, Tɔhonɔ̀ be ègbèa ɖì na mù gblɔ̃ be:

²¹“Àgbètɔ be èvi, wò le kpɔa, mù ŋɛ̃ Ejiptè be èfìɔ Faraɔ̀n be àbɔ. Àmè ɖekpe mu ji àbìblanu na ɛ̀ àlo na ɛ̀ àtikè ò. Àmè ɖekpe mu bla àbìa na ɛ̀ kaka ne bèa teŋu ɖo ŋusɛ̃ sɔ le èwi, wɔ̀ àhùa ò.

²²Ekèa ŋuti ye mù sitè ɖo Ejiptè be èfìɔ, Faraɔ̀n ŋuti. Mù la ŋɛ̃ yebe àbɔ èvèawo. Àbɔ kè lè nyuɛ̃ ɖe sã cã la trɔ sìgbè ŋɛ̃ŋɛ̃a ke nène. Eye mù la na èwia la gɛ̃ lè àlɔ̀ mè na ɛ̀.

²³Mù la kãkã Ejiptèviwo ɖo àgowo kpata ji, lè dùkɔ̃wo dòmè, lè ànyigbã a kpata ji.

²⁴Mù gbà do ŋusɛ̃ Babɛ̀l be èfìɔa kpe è. Eye mù la sɔ èwi nyèa do àsi na ɛ̀. Mù la ŋɛ̃ Ejiptè be èfìɔa be àbɔwo eye e la nɔ ŋɛ̃ sìgbè àmè (kè wo do èkubia nène) kè lè èkudonua nène.

²⁵Ɛ̃ɛ Mù la na ŋusɛ̃ Babɛ̀l be èfìɔa eye Ejiptè be èfìɔa ya tɔ̀a la yì èdò. Mù la sɔ èwi nyèa do àsi na Babɛ̀l be èfìɔa eye e kɔ ɛ̀ yì ji ɖo Ejiptè ŋuti. Nène a ye àmèwo kpata la nya ɛ̀ be ènyè ye nyi Tɔhonɔ̀a.

²⁶Mù la kãkã Ejiptèviwo ɖo dùkɔ̃ buwo dòmè lè àmèjrowo be ànyigbãwo ji keŋu. Eye wo la nya ɛ̀ be ènyè ye nyi Tɔhonɔ̀.”