Read gen Ezekìɛl 31 Bible Online

Ezekìɛl 31 - gen bible

Ezekìɛl 31

¹Lè èpè woeɖèkagɔ̃a be wètri ètɔ̃gɔ̃a be ŋùkèkè cucugbãa gbèa, Tɔhonɔ̀ be ènyàa va na mù gblɔ̃ be:

²“Àgbètɔ be èvi, gblɔ̃ na Ejiptè be èfìɔ, Faraɔ̀n kudo yebe àmèha gbogboa be: “Nukɛ mù la sɔ wò sɔ̀ kudo ò, èwò kè ɖo ŋusɛ̃ tɔ̀xɛ kèa ò?

³Wò ɖì Libàn be sedàti kèwo be àlɔ̀zɛ̃wo nya kpɔkpɔ, sedàti kè yì ji hũi kè be àɖɔ̀mè yì tɔ lilikpowo.

⁴Èji jàja na be sĩ yì ji, èsì gã kè lè ànyigbã gɔ̃mèa na be sĩ kpe è. Èsìa bɔ̀ trɔdo yebe èkèwo, e yomè ye e srànà yì àgblè ji be àtiawo kpata gbɔ.

⁵Èsì gbogbo ŋua ye na be yì ji wu àti kpɔ̀tɛawo kpata lè àgblèa ji. Yebe àlɔ̀zɛ̃wo dìdì, gbà sùgbɔ drì:

⁶Xèviwo kpata va wɔ̀nà àtɔ̃ ɖo yebe àlɔ̀zɛ̃wo mè, ègbemèlãwo kpata va jìnà èvi lè àlɔ̀zɛ̃awo gɔ̃mè eye dùkɔ̃ sùgbɔ va nɔ̀nà àtia gɔ̃mè.

⁷Àti nyuɛ̃ ɖe ye be nyi, ɖo e trì, yebe àlɔ̀zɛ̃wo trì gbà dìdì ŋutɔ. Yebe èkèwo ɖì ɖo ànyigbã kè ɖɔ kudo èsìa mè.

⁸Lè Mawu be àbɔ a mèa, sedàti ɖekpe mu sɔ̀ kudo è ò, èjèti ɖekpe cã mu ɖo àlɔ̀zɛ̃ nya kpɔkpɔ leke ò, àti ɖekpe mu teŋu na fàfagbè leke ò, àti ɖekpe mu nya kpɔkpɔ sìgbè e ye nène ò.

⁹Mù sɔ àlɔ̀zɛ̃ nyuɛ̃wo ɖo àcɔ na ɛ̀, eye Edɛ̀n, Mawu be àbɔ a be àtiwo kpata, le hùãŋu ì trolo.”

¹⁰Ekèa ŋuti ye ènyè Tɔhonɔ̀ Mawu mù gblɔ̃ be: sedàtia sĩ, e yì ji kaka yì tɔ lilikpowo eye ègòyiyi ɖɔ ɛ̀.

¹¹Nène a ye mù ɖè àsi lè e ŋuti eye mù ɖè è do àsi na ànyigbã a be èfìɔ gãa; àmè kèa la wɔ̀ kudo è, sɔ zɔ̃ ɖo èvuɛ̃ kè be wɔ̀a ji.

¹²Àmèjro nyrãkuwo, mù ì pu ànyi eye wo gble è ɖo funua. Yebe àlɔ̀zɛ̃ kudo àlɔ̀zɛ̃vi kèwo flia, wo gɛ̃ jè ètowo ku ànyigbã be bàlìwo mè. Àmè kèwo kpata kpɔ nɔ̀pe lè yebe fàfagbèa, si gbà hũ gble è ɖɛ.

¹³Xèviwo kpata va le jè ɖo yebe àlɔ̀zɛ̃ ŋɛ̃ŋɛ̃wo ji eye ègbemèlãwo kpata le zɔ̃ to yebe àlɔ̀zɛ̃awo ji.

¹⁴Ekèa va e mè ne àti ɖekpekpe kè èsì sùa, mu gbà teŋu sĩ, yì kaka lilikpowo mè nène ɖe, ne bèa gbà yigò ɖo yebe jiyìyi ŋuti ò. Nyàwoa, àtiwo àlo àgbètɔwo kpata ɖo la va ku gbè ɖèka. Wo la yì ànyigbã be ètù mè eye wo la yì àmè kèwo jè ŋùkɔ̀ na woa gbɔ.

¹⁵Ènyà kè ènyè Tɔhonɔ̀ Mawu mù gblɔ̃a ye nyi be: Gbè kè gbè sedàtia la ɖiɖi yì èkuwodea, mù la na xixea la lòfũ. Mù ɖo àsi èsì kè lè ànyigbã gɔ̃mèa ji. Mu la gbà srà ɖe ò. Hà ɖo e ŋuti ye mù na vìvìti do ɖo Libàn be ètoa ji vĩi. Eye àgblèji be àtiwo kpata ku yɔ̀ɔ àlo yrɔ̀.

¹⁶Wàlɛbɛ kè mù na àti kèa mù, ne bèa yì kpe kpɔ̀tɛ kèwo lè èkuwodea, dùkɔ̃wo sè yebe mùmu eye wo hũhũ ku vɔ̃vɔ̃. Lè Edɛ̀n be àbɔ a mèa, àti nya kpɔkpɔ ku kpɔ̀tɛ kèwo lè Libàn nyigbã jia kpata kpɔ jìjɔɛ.

¹⁷Woa cã wo bu ɖo ànyigbã mè sìgbè sedàtia ke nène. Wo yì èkuwode sìgbè àmè kèwo ku lè àhùa ke nène. Wo dona ɛ̀ ŋusɛ̃ sãa eye wo nɔ̀nà yebe hɔ̃hlɔ̃a gɔ̃mè lè dùkɔ̃wo dòmè.

¹⁸Edɛ̀n be àti ɖekpe mu ɖo àpo kpɛ̃kpɛ̃ mè ò. Co wo la tùtù wò kudo wo ɖo èkuwode. Wò la mlɔ̃ ànyi ku èvo mà-sòtɔwo kudo àmè kèwo ku lè àhùaa. Ènu kèa ye le nɔ̀tè kpɔ Ejiptè be èfìɔ, Faraɔ̀n kudo yebe dùkɔ̃a.” Ènyè Tɔhonɔ̀ Mawu ye gblɔ̃ ɛ̀.