Read gen Ezekìɛl 32 Bible Online

Ezekìɛl 32 - gen bible

Ezekìɛl 32

¹Wàlɛbɛ kè wo kplɔ̀ àmèwo àhùalea, be èpè woèvègɔ̃a be wètri woèvègɔ̃a be ŋùkèkè cucugbãa gbèa, Tɔhonɔ̀ be ègbèa ɖì na mù gblɔ̃ be:

²“Èwò àgbètɔ be èvi, to àviha ɖo Faraɔ̀n, Ejiptè be èfìɔa ŋuti! Wò la gblɔ̃ be: “Wò lè dùkɔ̃wo dòmè sìgbè jãŋùtavi ɖe nène. Vɔ̀a, wò le wɔ̀ sìgbè zògbèji be èlo nène. Wò le blù èsì gãa wòa, wò le pòɖi ì kudo àpo àfɔ̀wo, ɖo wò le blù yebe èsìa.”

³Ɖoto ènyà kè Tɔhonɔ̀ Mawu le gblɔ̃a: Wàlɛbɛ kè dùkɔ̃ sùgbɔ la bɔ̀a, mù la dà àpe èɖɔa ɖo ji wò, eye wo la dɔ̃ wò va àgo.

⁴Mù la mlì wò ɖo ànyigbã a, lè àgblèwo dòmè ne xèviwo kpata woa zrò jè e ji wò eye ègbemèlãwo kpata la va ɖù àpo èlãa.

⁵Mù la hlɛ̃ àpo àmèkpòti kè kpɔ̀tɔ̀a ɖo ètowo ji eye e la ɖɔ bàlìwo mè.

⁶Mù la wu àpo èhũ ɖo ànyigbã. E la cɔ̃ ètowo tamè eye e la ɖɔ àbùwo

⁷Wàlɛbɛ kè àgbè wòa nu la cia, mù la na xixea la do vìvìti. Mù la sɔ lilikpowo cɔ̃ dɔ̃ŋùkusu ku wètriviwo ji eye wètri mu la gbà na yebe kɛ̃klɛ̃ ò.

⁸Hà ɖo èwò ŋutia, mù la xɔ̀ ŋusɛ̃ lè jiŋùkusi be kɔ̀kɔ̀ɛwo kpata si eye mù la na ànyigbã kpata la gɛ̃ jè vìvìti ɖe mè. Ènyè Tɔhonɔ̀ Mawu ye gblɔ̃ ɛ̀.

⁹Dùkɔ̃ sùgbɔ la hũhũ wàlɛbɛ kè mù la do àpo cɔ̃crɔ̃ be àŋɛ̀ na woa. Àŋɛ̀ kèa la yì kaka ànyigbã kè wò mu nya òa, cã ji.

¹⁰Àvìvɔfu la le dùkɔ̃ sùgbɔ lè ènu kè mù la wɔ̀ kudo wòa nu. Woabe èfìɔwo la vɔ̃ wàlɛbɛ kè mù la ɖè èwui nyè ɖo woa jia. Gbè kè gbè wò la jè ànyi a, wo la hũhũ ɖo woabe àgbè ta.

¹¹“Ènyà kè Tɔhonɔ̀ Mawu gblɔ̃a ye nyi ekèa: Babɛ̀l be èfìɔa be àhùakɔ̃a la va xa wò.

¹²Mù la ɖo àhùawɔ̀tɔ wɔ̀ drãwo ɖoɖa ne woa crɔ̃ dùmèvi wòwo kpata. Wo la crɔ̃ Ejiptè ègòyitɔa kudo yebe dùkɔ̃a kpata.

¹³Mù la crɔ̃ èlã kèwo kpata wò ɖo lè ètɔ̀ gãa toa. Èsìa mu la gbà blù lè àgbètɔ àlo èlãwo be àfɔ̀ gɔ̃mè ò.

¹⁴Mù la na e la gbɔ̃jɛ̃. E la srà blɛ̀wù sìgbè àmì nène. Ènyè Tɔhonɔ̀ Mawu ye gblɔ̃ ɛ̀.

¹⁵Mù la trɔ Ejiptè-nyigbãa wɔ̀ zògbè. Mù la ɖè yebe ènu nyìamèwo kpata jo, eye mù la crɔ̃ dùmèviawo kpata. Gà ŋua mèa, àmèwo kpata la nya ɛ̀ be ènyè ye nyi Tɔhonɔ̀a.”

¹⁶“Ekèa ye la nyi èfũlòha kè dùkɔ̃wo be nyɔ̃nùwo la jì ɖo Ejiptè ku yebe dùmèvi gbogboawo ŋuti. Tɔhonɔ̀ Mawu ye gblɔ̃ ɛ̀.”

¹⁷Wàlɛbɛ kè wo kplɔ̀ àmèwo àhùalea, lè èpè woèvègɔ̃a be wètri woèvègɔ̃a be ŋùkèkè woeàtɔ̃gɔ̃a gbèa, Tɔhonɔ̀ be ègbèa ɖì na mù gblɔ̃ be:

¹⁸“Èwò àgbètɔ be èvi, làmɔɛ̃ ɖo Ejiptè be dùkɔ̃a ta. Àpo èfũlòha ne ɖiɖi ì kudo dùkɔ̃ sɛ̃ŋu kpɔ̀tɛawo ɖo kaka ànyigbã a be tùmè, lè tèpe kè àmèkukuwo yìnàa.

¹⁹Gblɔ̃ na wo be: Mì susu be yèwo tɔ̀a la nɔ̀ tɔ̀xɛa? Mì ɖiɖi yì mlɔ̃ ànyi kudo àmè ku ci àhùa, kèwo mu sò èvo òa!

²⁰Ɛ̃ɛ, Ejiptèviwo la crɔ̃ lè àhùa. Èwuiwo sɔ̀gbè fifì vɔ̀, la wɔ̀ ànyrã. Wo la na èku la jè Ejiptè ku yebe dùkɔ̃a ji!

²¹Lè èkuwodea, àhùasukawo kudo Ejiptè be àmèsĩsĩwo la gblɔ̃ be: “Ŋusù èvo mà-sòtɔ kèawo la mlɔ̃ ànyi lè mia dòmè, àmè kèwo crɔ̃ lè àhùa!

²²Àsirìa be èfìɔa kudo yebe àhùakɔ̃a lè funua. Yebe gbãdãgbãwo be yɔ̀dowo trɔdo è. Woa kpata ku ci àhùa.

²³Woabe yɔ̀dowo lè èkuwode be gɔ̃mè, trɔdo woabe èfìɔa be yɔ̀do. Wo wù woa kpata lè àhùa, àmè kèwo dona ŋɔji na àgbètɔwo sãa.

²⁴Kpɔ Elàm be èfìɔa kudo yebe àhùakɔ̃a. Yebe yɔ̀doa lè yebe àhùakɔ̃a tɔ̀wo dòmè. Wo ku keŋu lè àhùa. Woa èvomàsɔ̀tɔ kèwo ye dona ŋɔji na àgbètɔwo sãa. Wo ɖiɖi ɖo ànyigbã gɔ̃mè. Fifìa, èŋù le kpɛ̃ wo kudo àmè kèwo lè èkuwodea.

²⁵Ɛ̃ɛ, Elàm be èfìɔa mlɔ̃ ànyi ku yebe àhùakɔ̃a lè àmè kèwo ku ci àhùawo dòmè. Yebe gbãdãgbãwo be yɔ̀dowo trɔdo è. Èvomàsòtɔ kèawo kpata ku lè àhùa. Wo dona vɔ̃vɔ̃ na àmèwo sã lè ànyigbã ji. Fifìa, wo ku àmè kèwo crɔ̃ kudo woa, ɖɔ ku ŋùkpɛ̃.

²⁶Mècɛk kudo Tubàl, èfìɔ kèawo kudo woabe àhùakɔ̃wo sɔ̀gbè lè funua. Woabe gbãdãgbãwo be yɔ̀dowo trɔdo woa tɔ̀a. Èvomàsòtɔ kèawo kpata ku lè àhùa gbe ji. Wo dona ŋɔji na àgbètɔwo sã!

²⁷Wo mu ɖì wo kudo àhùasuka ɖìnyi xoxo kèwo dona ŋɔji na àmèwo sã ò. Àhùasuka kèawo ɖiɖi yì èkuwode kudo woabe àhùawɔ̀nuwo. Wo sɔna woabe èwuiwo ɖona woabe sũŋuɖe gɔ̃mè eye àkɔtakpoxɔ̀nua cɔ̃na àkɔta na wo.

²⁸Na mìa Ejiptèviwo ya, wo la ŋɛ̃ mì eye wo la ɖì mì ɖo èvo mà-sòtɔ kèawo dòmè.

²⁹Edɔ̀mviwo, woabe èfìɔwo kudo èfìɔviwo cã lè funua. To e gbɔ be wo donajì ŋutɔ cã, wo sɔ wo caka ku àmè kèwo ku lè àhùa gbe jia. Wo ɖì wo kudo èvo mà-sòtɔ kèwo ɖiɖi yì èyɔ̀mèa.

³⁰Àvego be dùkɔ̃wo be kplɔ̀tɔwo kpata lè funua kudo Sidɔ̀n be dùmèvi kèwo yì èyɔ̀mèa. Kãlìsuka sɛ̃ŋu kèwo dona ŋɔji na àmèwo sãa, ye wo nyi. Vɔ̀ fifìa, èvo mà-sòtɔ kèawo kpata mlɔ̃ ànyi lè èkuwode kudo àmè kèwo ku ci àhùaa. Woa kpata ye ɖɔ ku ŋùkpɛ̃.

³¹Kè Faraɔ̀n kpɔ gbãdãgbã kèawo kpataa, mu gbà titɔ kaka ɖo yebe dùmèvi, ŋutime kudo àhùakɔ̃ kèwo ci èwui nua ŋuti ò. Tɔhonɔ̀ ye gblɔ̃ ɛ̀.

³²Mù na èmɔ̃ Faraɔ̀n be do ŋɔji na àmèwo, vɔ̀ fifìa, wo la ɖì ye ŋutɔ kudo yebe àhùakɔ̃a ɖo èvo mà-sòtɔ kèwo ku ci àhùaa dòmè. Ènyè Tɔhonɔ̀ ye gblɔ̃ ɛ̀.”