Read gen Ezekìɛl 33 Bible Online

Ezekìɛl 33 - gen bible

Ezekìɛl 33

¹Eye Tɔhonɔ̀ be ègbè ɖì na mù gblɔ̃ be:

²“Èwò àgbètɔ be èvi, gblɔ̃ na Izràɛlviwo be ne mù na àhùa va ànyigbã ɖe jia, ènu kè jɔ̀nàa ye kè. Èdùmètɔwo yì jina ŋusù ɖe lè woa dòmè ne bèa nyi woabe bèkpɔɛ.

³Ne bèkpɔɛa kpɔ kɛ̃tɔwo gbãnà, e la ku èkpɛ̃ sɔ na dùkɔ̃a ètoklã.

⁴Ne àmè ɖe sè èkpɛ̃a, eye mu sɔ ɛ̀ veveɖe ò kaka ye kɛ̃tɔa va wù ìa, ye ŋutɔ be èta ji ye yebe èhũa la jè.

⁵E la ku ɖo e sè èkpɛ̃a, vɔ̀ mu sɔ ɛ̀ do èdɔwɔ̀wɔ mè ò. Ne e kè wɔ̀ ɛ̀a, e la hlùɛ̃ ye ɖokoe gã.

⁶Lè ègo ɖe mèa, mi sɔ ɛ̀ be bèkpɔɛa kpɔ kɛ̃tɔwo be àhùakɔ̃a gbãnà eye mu ku èkpɛ̃a ò: Yebe dùmèviwo mu sè ètoklã ò, ne àmè ku lè ekèa wɔ̀wɔ mèa, bèkpɔɛa be àgɔ̀jèje ye. E ye mù la sɔ èku kèa be àgɔ̀jèje na.

⁷Na èwò àgbètɔ be èvia ya, mù cã wò ne wòa nyi bèkpɔɛ na Izràɛl be dùkɔ̃a. Wò la sè àpe ègbè eye wò la sìa Izràɛlviwo na mù.

⁸Mi sɔ ɛ̀ be: Mù ɖo la sìa àmè bàɖà ɖe be e la ku dodo. Vɔ̀a, ne wò mu sìa ɛ̀ òa, ne wò mu biɔ so e si be ne ɖɔ̀lì èdɛ̃ òa, àmè kèa la ku ɖo yebe vuɛ̃ ŋuti. Co mù la biɔ wò àkɔ̃ŋùta so yebe èkua ŋuti.

⁹Co ne wò sìa ɛ̀ ne bèa ɖɔ̀lì èdɛ̃ eye mu wɔ̀ ɛ̀ òa, e la ku ɖo yebe àgɔ̀jèje ŋuti. Eye wò la hlùɛ̃ àgbè wòa gã.”

¹⁰“Èwò àgbètɔ be èvi, gblɔ̃ na Izràɛlvi kèwo susuna be: “Miabe àgɔ̀jèje ku èvuɛ̃wo be àgbã le kpɛ̃ mi. Wo na be ŋusɛ̃ vɔ̀ na mi. Leke mi la wɔ̀ nɔ̀ àgbè ò?”

¹¹Gblɔ̃ na wo be: Kaka kè mù kpɔ̀tɔ̀ lè àgbèa, ènyè Tɔhonɔ̀ Mawu a, nyè mu ji la kpɔ èvuɛ̃wɔ̀tɔ ɖe be èku ò. Ènu kè jɔ̀nàjì na mù a ye nyi be bèa trɔ lè yebe ènu dakà wɔ̀wɔ mè ne bèa nɔ̀ àgbè. Mù ɖèkuku na mì, Izràɛlviwo, mì trɔ lè mìabe èvuɛ̃wo mè. Izràɛlviwo, nukɛ ŋuti mì la ku ɖo ò?

¹²Èwò àgbètɔ be èvi, gbà gblɔ̃ ènyà kèa cã na dùkɔ̃ wòa be: “Ne àmè jɔ̀jɔɛ ɖe wɔ̀ àgɔ̀jènu ɖe a, ènunyuɛ̃ kè bè wɔ̀ sãa, mu la hlùɛ̃ gã ò. Ne àmè nyrãku ɖe trɔ lè yebe ènu dakàa yomè a, mu la crɔ̃ ɖo ènu bàɖà kè bè wɔ̀ va yìa ŋuti ò. Àmè jɔ̀jɔɛ ɖe be wɔ̀na nyuɛ̃ ɖekpe mu la hlùɛ̃ ɛ̀ gã ne e va yì le wɔ̀ ènu bàɖàa ò.

¹³Mi sɔ ɛ̀ be mù fìã àgbè na àmè jɔ̀jɔɛ ɖe. Ne e susu be yèbe ètonusèse sãatɔ̀a sù vɔ̀ eye be tɔ ènu gbegble wɔ̀wɔa, dodo yebe ènu nyuɛ̃ sãatɔ̀awo mu ɖɔ ò. E la ku ɖo èvuɛ̃ kèwo be va wɔ̀a ŋuti.

¹⁴Ne mù gblɔ̃ na àmè nyrãkua be e la ku dodoa; ne e trɔ lè yebe ènu bàɖàa yomè eye e le wɔ̀ ɖo èsea ku ɖoɖoawo jia, mu la ku ò.

¹⁵Ne e trɔ sɔ àwòbanua na ènutɔ eye e wɔ̀ nènea ke na ènu kè be fìã a, ne mu gbà le wɔ̀ bàɖà ò eye be le wɔ̀ ɖo èse kèwo nana àgbèa jia, mu la ku ò, e la nɔ̀ àgbè.

¹⁶Wo mu la hlɛ̃ yebe àgɔ̀jèje sãatɔ̀awo na ɛ̀ ò. E la nɔ̀ àgbè ɖo e le wɔ̀ ɖo èsea ku jɔ̀jɔɛnyinyi ji.”

¹⁷Nɔ̀vi wò Izràɛlviwo le gblɔ̃ be ènyè Tɔhonɔ̀a, mù gbà le wɔ̀ ɛ̀ ŋutɔ; vɔ̀a, mu nyi woawo ye to lipòawo ŋutia?

¹⁸Ne àmè jɔ̀jɔɛ ɖe trɔ lè yebe ènu nyuɛ̃ wɔ̀wɔ yomè, le wɔ̀ èvuɛ̃ kudo ènu bàɖàa, e la ku.

¹⁹Ne gbè ɖèka, àmè bàɖà ɖe trɔ lè yebe ènu bàɖà yomè, eye be le wɔ̀ ɖo èsea ku jɔ̀jɔɛnyinyi jia, e la nɔ̀ àgbè to ekèa ji.

²⁰“Mìa Izràɛlviwo, mì gblɔ̃nà be mù gbà le wɔ̀ ɛ̀ wunu: ɛ̃ɛ nyàwo, mì nya ɛ̀ nyuɛ̃ ɖe be mù la ɖokòjo na àmè sia àmè zɔ̃ ɖo yebe àgbè nɔ̀nɔ ji!”

²¹Lè èpè woèvègɔ̃a, wàlɛbɛ kè wo kplɔ̀ mi àhùalea, be wètri èwogɔ̃a be ŋùkèkè àtɔ̃gɔ̃a gbèa, ŋusù ɖe ci àgbè lè Yèruzàlɛm be xɔ̀xɔ yomè. E va gblɔ̃ na mù be: “Wo xɔ̀ Yèruzàlɛm be èdùa!”

²²Lè wètrɔ gbɔ, gbɔ̀xue ŋusù kèa la vaa, Tɔhonɔ̀ na mù sè yebe hɔ̃hlɔ̃a wàlɛbɛ kè e sɔ yebe ènyà na mù. Wàlɛbɛ kè èŋù kè ŋùdekɛ̃nyɛ gbɔ̀xue be la vaa, nyè mu gbà nyi àmumui ò. Mù teŋu gbà le pò nupo.

²³Tɔhonɔ̀ gblɔ̃ na mù be:

²⁴“Èwò àgbètɔ be èvi ɖoto sè! Àmè kèwo kpɔ̀tɔ̀ ci Izràɛl be ànyigbã ji, lè èdù kèwo wo crɔ̃a mèa, le gblɔ̃ be: “Abràham ŋutɔ ɖèka kpò ye, gãkea, e xɔ̀ ànyigbã a kpata. Mia ya mi sùgbɔ ŋutɔ, mia ŋutɔ ye la xɔ̀ ànyigbã a fifì.”

²⁵Ènyà kèa ŋuti ye wò la gblɔ̃ ènyè Tɔhonɔ̀ Mawu be ègbè do àsi kèa na wo be: Mì le ɖù èhũ-lã kudo yebe èhũ, mì le sumɔ legbawo, mì le dãhlɔ̃, leke mì la susu be ànyigbã la teŋu nyi mìa tɔ̀ ɖo ò?

²⁶Mì le kã ɖo mìabe àhùawɔ̀nuwo ji, mì le wɔ̀ ènu jiŋɔwo, mì le ji àmèsrɔ̃, leke mì la susu be ànyigbã la teŋu nyi mìa tɔ̀ ɖo ò?

²⁷Gblɔ̃ na wo be ènyè Tɔhonɔ̀ Mawu ye le gblɔ̃ ekèa be: “Mù le sìa mì be àmè kèwo ci èdù gbãgbãwo mèa, la ku. Ègbemèlãwo la vũvũ àmè kèwo ci àgblètawo eye àmè kèwo yì wla ɖo èto kudo àkpãdowo mèa, èdɔ̀ vuɛ̃ la wù wo.

²⁸Mù la crɔ̃ ànyigbã a, mù la trɔ ɛ̀ wɔ̀ zògbè. Ŋusɛ̃ kè nana yebe dùmètɔwo yinagòa, la bu. Izràɛl be ètowo la ci puplu, àmè ɖe mu la gbà to funu ò.”

²⁹Wàlɛbɛ kè mù la trɔ ànyigbã kèa keŋu wɔ̀ zògbè sɔ dɔ̃to na Izràɛlviwo ɖo woabe ènu dakàwo ŋutia, wo la nya ɛ̀ be mù nyi Tɔhonɔ̀ nyàwo.

³⁰Èwò àgbètɔ be èvia, ɖoto! Izràɛlviwo le pò nupo so ŋuti wò lè èdùa be èglìwo gɔ̃mè le yì. Wo le gblɔ̃ lè woa nɔ̀nɔwo dòmè be: “Mì na mia yì sè ènu kè Tɔhonɔ̀ le gblɔ̃ na mia.”

³¹Nène a ye èdùmèviwo la va bɔ̀, nɔ̀ ànyi ɖo gbɔ wò sɔ sè àpo ènyà. Wo le sè, vɔ̀ wo mu la wɔ̀ ɖo e ji ò. Woabe àlè kpò wo jina.

³²Lè nyàwo toto mèa, wò lè na wo sìgbè èhàjìtɔ ɖe kè ɖo ègbè liloe eye èhàjìnuwo le kplɔ̀a nène. Wo la sè àpo ènyà, vɔ̀ wo mu la wɔ̀ ɖo e ji ò.

³³Ne ènu kèawo va jɔ̀ a, ɛ̃ɛ e la jɔ̀ godo, wo la nya ɛ̀ be gblɔ̃ɖɛtɔ ɖe lè woa dòmè.”