Read gen Ezekìɛl 34 Bible Online

Ezekìɛl 34 - gen bible

Ezekìɛl 34

¹Tɔhonɔ̀ be ègbèa ɖì na mù gblɔ̃ be:

²“Èwò àgbètɔ be èvi, gblɔ̃ ènyà ɖɛ ɖo Izràɛl be dùkɔ̃a be kplɔ̀tɔwo ŋuti. Gblɔ̃ ènyà kè ènyè Tɔhonɔ̀ Mawu mù do àsi na wòa be: Hèlu na mì Izràɛl be kplɔ̀tɔwo! Mì lenabè na mìa ɖokoewo kpò! Mu nyi àlɛ̃ha ye kplɔ̀tɔwo ɖo la lebè na a?

³To e gbɔ be mì le nù èlãwo be ànɔsi a, mì le kpà woabe èfuwo sɔ le wɔ̀ àwùdodowo, mì le wù èlã doàmìwo le ɖù; vɔ̀ coa, mì mu le lebè na wo ò.

⁴Mì mu do ŋusɛ̃ èlã kèwo gbɔjɔa, àlo dà èdɔ̀ na kèwo lè le èdɔ̀ ò. Mì mu bla àbì na èlã kèwo xɔ̀ àbìa, àlo la jɔ̀ èmɔ̃ na kèwo le trãmɔa ò. Mì mu yì ji èlã kèwo bua ò. Vɔ̀a, mì ɖù gaglasu ɖo woa ji kudo ŋusɛ̃.

⁵Eye èlãwo kãhlɛ̃ ɖo kplɔ̀tɔ mu gbà lè woa si ò. Wo trɔ zũ ègbemèlãwo be ènuɖùɖu.

⁶Ɛ̃ɛ, èlãha nyèa le dã lè ètowo ku ètokɔ̃ɛwo dòmè. Èlãha nyèa kãkã ɖo ànyigbã kpata ji. Eye àmè ɖekpe mu lè la yì kplɔ̀ ɛ̀ gbɔ̀ kaka la va kpɔ e gbɔ ò.

⁷Mìa Izràɛl be kplɔ̀tɔwo, mì ɖoto ènyà kè mù la gblɔ̃ na mìa:

⁸Kaka kè ènyè Tɔhonɔ̀ Mawu mù lè àgbèa, mù le kãɖoji na mì be:

⁹Ènu kèa ŋuti ye mìa Izràɛl be kplɔ̀tɔwo mì sè ènyà kè mù la gblɔ̃ na mìa.

¹⁰Ènyè Tɔhonɔ̀ Mawu, mù le sìa mì. Mù la sitè ɖo mìa, kplɔ̀tɔwo ŋuti. Mù la xɔ̀ èlãha nyèa lè mìa si, eye nyè mu la gbà na mì èmɔ̃nu ɖekpe ne mìa gbà gla ɖo e ji ò. Nène a, mù la ɖè èlã nyèawo lè mìabe ènu mè. Wo mu la gbà nyi mìabe ènuɖùɖu ò.

¹¹“Ɛ̃ɛ, ènyè Tɔhonɔ̀ Mawu ye gblɔ̃ ɛ̀ be so fifìa, nyè ŋutɔ mù la kpɔ èlãha nyèa ji, la nɔ kplɔ̀ ɛ̀.

¹²Mù la bɔ̀ ɛ̀ sìgbè lekè èlãkplɔ̀tɔ bɔ̀nà èlã kèwo kãhlɛ̃a nène. Mù la yì ji èlãwo lè fikè wo kãhlɛ̃ ɖoa keŋu gbɔ̀, lè èji-ya sɛ̃sɛ̃ ku vìvìti klìko ŋua mè gbè ɖèka.

¹³Mù la yì kplɔ̀ wo lè dùkɔ̃ ku àmèjro nyigbãwo ji, fikè wo yì sò cia. Mù la yì bɔ̀ wo, la kplɔ̀ wo gbɔ̀ va woabe ànyigbã ji. Mù la kplɔ̀ wo yì Izràɛl be ètowo ji, lè bàlì do àmàwo mè, lè fikè wo la teŋu kpɔ nɔ̀pe lèa.

¹⁴Mù la kplɔ̀ wo va ègbeɖùpe do àmà nyuɛ̃wo. Wo la ɖo woabe èjɛ̃gbɔ̃pewo lè Izràɛl be ànyigbã ji. Funua, wo la ɖù ègbe do àmàwo lè ànyigbã nyuɛ̃wo ji.

¹⁵Nyè ŋutɔ ye la nyì èlãha nyèa. Nyè ŋutɔ mù la nɔ na wò jɛ̃gbɔ̃gbɔ̃. Ènyè Tɔhonɔ̀ ye gblɔ̃ ɛ̀.

¹⁶Mù la yì ji èlã kè bua, èlã kè sò ci ègbea, mù la yì kplɔ̀ ɛ̀ gbɔ̀. Mù la bla àbì na èlã kè àfɔ̀ ŋɛ̃ na a. Mù la na ŋusɛ̃ èlã kèwo le èdɔ̀a. Vɔ̀a, èlã kè lòlò gbà ɖo ŋusɛ̃a, mù la crɔ̃ ɛ̀. Mù la nyi èlãkplɔ̀tɔ jɔ̀jɔɛ.”

¹⁷“Na àpe èlãhaa, ènyà kè ènyè Tɔhonɔ̀ Mawu mù gblɔ̃a ye nyi be: Mù la nyi kòjoɖotɔ na èlãhaa be èlãwo, lè ègbɔsuwo ku àgbòwo dòmè.

¹⁸Mu sù na mì ne mìa ɖù mìabe ègbe do àmàa kpo òa? Nukɛ ŋuti ye mì le ɖiki ègbe kpɔ̀tɛawo ɖo ò? Èsì kɔ̀kɔ̀ɛ kè mì le nùa, mu sù na mì vɔ̀a? Nukɛ ŋuti mì gbà le blù èsì kè lè è akpa ɖèkaa ɖo ò?

¹⁹Èlãha nyè be kpɔ̀tɛa la va ɖù ègbe kè mì ɖikia, la gbà nu èsì kè mì sɔ àfɔ̀ blùa!

²⁰Ekèa ŋuti, ènyè Tɔhonɔ̀ Mawu mù le gblɔ̃ be: Ènyè ŋutɔ ye la nyi kòjoɖotɔ lè èlã doàmìwo kudo èlã ɖìkùawo dòmè.

²¹Ɖo mì lìagbà èlã kèwo ɖìkùa eye mì tù àzò wo. Vɔ̀vɔnua, mì nyà wo do ègbe boo.

²²Mù va la doàlɔ̀ èlã nyèwo, ne wo mu gbà fĩ wo ɖe ò. Mù la nyi kòjoɖotɔ lè mì kudo wo dòmè.

²³Mù la sɔ kplɔ̀tɔ ɖèka dà ɖo èlãha nyèa be ŋùkɔ̀. E la lebè na èlãhaa. E la nyi èfìɔ kè ɖì David sumɔ̃vi nyèa. E la nyi èlãkplɔ̀tɔ nyuɛ̃ na wo.

²⁴Ènyè Tɔhonɔ̀ mù la nyi woabe Mawu, eye wo la ɖo èfìɔvi ɖe sìgbè David sumɔ̃vi nyè nène. Ènyè Tɔhonɔ̀ Mawu ye gblɔ̃ ɛ̀.

²⁵Mù la wɔ̀ ŋuti fàfa be zòɖùɖu kudo èlãha nyèa eye mù la crɔ̃ ègbemèlãwo lè ànyigbã a ji. Nène a, èlã nyèawo la teŋu nɔ̀ ètomè fàfa mè lè zògbèa ji. Eye wo la dɔ̃ àlɔ̃ bɔ̀kɔ̀ lè ègbedɔ̃dɔ̃wo mè.

²⁶Mù la na wo èmɔ̃ lè èto kɔ̀kɔ̀ɛ nyèa gbɔ. Mù la na èsì ɖo àmèhùenu eye èsì kèa la wɔ̀ nyuɛ̃ na wo.

²⁷Àtiwo la sɛ̃ku, ànyigbã la na àgblèmènukuwo la wɔ̀. Àmè sia àmè la nɔ̀ ŋuti fàfa mè lè ànyigbã ji. Mù la sò kɔ̀sɔ̀kɔsɔ kèwo bla dùkɔ̃ nyè mèviwo. Mù la xɔ̀ wo lè àmè kèwo sɔ wo wɔ̀ kluvia si. Wàlɛbɛ ŋua wo la nya ɛ̀ be mù nyi Tɔhonɔ̀.

²⁸Àmèjrowo mu la gbà fĩ wo ɖe ò, ègbemèlãwo mu la gbà trɛ̃ wo ɖe ò. Wo la nɔ̀ àgbè lè ŋuti fàfa mè, eye àmè ɖekpe mu la do ŋɔji na wo ò.

²⁹Mù la na wo àgblè nyigbã nyuɛ̃wo, àdɔ̀toto mu la gbà nyi tamè bubu na wo ò. Dùkɔ̃ kpɔ̀tɛawo cã mu la doŋùkpɛ̃ wo ò.

³⁰Àmè sia àmè la kpɔ ɛ̀ jèsi be ènyè Tɔhonɔ̀ ye nyi woabe Mawu. Mù lè ku wo eye Izràɛl nyi àpe dùkɔ̃. Ènyè Tɔhonɔ̀ Mawu ŋutɔ ye gblɔ̃ ɛ̀.

³¹“Ɛ̃ɛ, mìa àmè kèwo lè èlãha nyèa mèa, mù la lebè na mì ɖo mù nyi mìabe Mawu. Ènyè Tɔhonɔ̀ Mawu ye gblɔ̃ ɛ̀.”