Read gen Ezekìɛl 35 Bible Online

Ezekìɛl 35 - gen bible

Ezekìɛl 35

¹Tɔhonɔ̀ be ègbèa ɖì na mù gblɔ̃ be:

²“Èwò àgbètɔ be èvi, trɔ ŋùkumè ɖoɖa Edɔ̀m be èto be ànyigbã a ji. Gblɔ̃ ènyà ɖɛ lè àpe nyikɔ mè ɖo èdù kèa ŋuti.

³Gblɔ̃ na wo be: Nène a ye Tɔhonɔ̀ Mawu gblɔ̃ be: Mù la sitè ɖo mìa ŋuti! Mù la ɖè hɔ̃hlɔ̃ nyèa ɖo èwò Edɔ̀m ŋuti. Mù la crɔ̃ wò eye mù la sɔ ànyigbã wòa wɔ̀ zògbè.

⁴Mù la trɔ èdù wòwo wɔ̀ èglìkpowo ɖèɖe. Àpo ànyigbã a la crɔ̃ keŋu. Nène a, wò la nya be ènyè ye nyi Tɔhonɔ̀a.

⁵Wò kpɔ̀tɔ̀ le crì Izràɛlviwo. Lè woabe gbledo be hùenu, wàlɛbɛ kè woabe èhlɔ̃dãdã nu sòa, wò ɖè èwui ɖo woa ji.

⁶Eŋuã ŋuti, ènyè Tɔhonɔ̀ Mawu mù le gblɔ̃ be: Mù la na wò la ci èhũ ku èzò mè, ɖo èhũ kè wò kɔ̀ ɖo ànyi a le biɔ èhlɔ̃. Kè e tɔ̀ be wò kɔ̀ èhũ ɖo ànyi ŋùgbe màkpɔ tɔ̀a, wò cã wò la ci èhũ mè godo.

⁷Mù la crɔ̃ ànyigbã wòa, Edɔ̀m. Mù la trɔ ɛ̀ wɔ̀ zògbè nyigbã eye mù la crɔ̃ àmè kèwo kpata la to funu va yìa.

⁸Mù la wù àmèwo kɔ̀ ɖo èto wòawo ji vĩi. Àmè kèwo wo la wù lè àhùa gbe jia, la jè ànyi ɖo bàlì kudo ètokɔ̃ɛ wòwo ji. Wo la ku ci èsì sàsra tèpewo.

⁹Mù la crɔ̃ àpo ànyigbã a gbidi sɔ wɔ̀ zògbè ɖèɖe. Àmè ɖekpe mu la gbà nɔ̀ àpo èdùawo mè ò. Nène a ye wò la nya be ènyè ye nyi Tɔhonɔ̀a.

¹⁰Wò le gblɔ̃ be: “Mù la ɖo àsi Izràɛl kudo Yudà be èfìɔdu èvèawo ji. Ànyigbã kèwo ji Tɔhonɔ̀ ɖo nɔ̀pe ɖoa.”

¹¹Nyàwoa, woabe ènu le ve àdɔ̀mè na wò kaka be wò le do fùnya-fùnya na wo. Wò crì wo ŋutɔ. Eŋuã kaka kè mù nyi Tɔhonɔ̀ Mawu a, mù la wɔ̀ nèneake kudo wò cã. Eye mù la ɖè àmè kè mù nyia fiɔ Izràɛlviwo, wàlɛbɛ kè mù la nɔ dɔ̃to na woa.

¹²Funu ye wò la nya be ènyè Tɔhonɔ̀a, mù sè èvlododo be ènyà kè wò gblɔ̃a be: “Mìa tɔ̀ ye nyi Izràɛl be ètowo! Wo ci àsi, mi la teŋu sɔ wo wɔ̀ ènu kè jro mia!”

¹³Mì sitè ɖo ŋuti nyè, eye nyè mu ŋlɔ̀be ègòyigbe kèwo mì do ɖo ŋuti nyèa ò.

¹⁴Ènyà kè ènyè Tɔhonɔ̀ Mawu, mù le gblɔ̃a ye nyi be: Mù la crɔ̃ wò gbidi sɔ na jìjɔɛ ànyigbã kèwo trɔdo wòa keŋu.

¹⁵Wò kpɔ jìjɔɛ ɖo Izràɛl, dùkɔ̃ nyèa be gbãgbã ŋuti. E nyɔ fifìa, mù la wɔ̀ kudo wò ɖo jije ŋua pɛpɛ ke ji. Àpo ètowo kudo ànyigbã a la ci gbalo. Nène a ye àmè sia àmè la nya ɛ̀ be mù nyi Tɔhonɔ̀ nyàwo.”