Read gen Ezekìɛl 36 Bible Online

Ezekìɛl 36 - gen bible

Ezekìɛl 36

¹“Èwò àgbètɔ be èvi, pò nupo fifì lè àpe nyikɔ mè ɖo Izràɛl be ètowo ŋuti. Biɔ so woa si ne woa sè ènyà kèwo mù le gblɔ̃ na woa.

²Eye Tɔhonɔ̀ Mawu gblɔ̃ nènea be: Ɖo kɛ̃tɔa gblɔ̃ so mìa ŋuti be “Ɛ̃ɛ! Ɛ̃ɛ! Gbè ɖe gbè be èto kèawo trɔ mia tɔ̀ fifì!”

³Ekèa ŋuti ye wò la gblɔ̃ ènyà ɖɛ! Wò la gblɔ̃ be: Nène Tɔhonɔ̀ Mawu gblɔ̃: Ɛ̃ɛ, wo ji la crɔ̃ mì to ègowo kpata mè, ne mìa bu ɖiwa. Wo xa mì eye mì ci dùkɔ̃wo be àsi mè. Wo kò mì nyuɛ̃ ɖe gbà zũ mì kpe è.

⁴Eŋuã, Izràɛl be ètowo ne sè ènyà kè ènyè Tɔhonɔ̀ Mawu, mù le gblɔ̃ na èto ku ètokɔ̃ɛwo, ètɔ̀ sàsra ku bàlìwo. Mù le gblɔ̃ ɛ̀ na èglìkpo kudo èdù gbãgbãwo, èdù kèwo wo zũ gbà ɖè àbòyoawo.

⁵Nyàwo ye be ènyè Tɔhonɔ̀ Mawu, lè àpe jìbibi be àdã mèa, mù pò nupo ɖo dùkɔ̃ kpɔ̀tɛawo ŋuti, gbà pò ɖo Edɔ̀m bliboa ŋuti. Jìjɔɛ ku èkunyànyrã gã ɖe mè ye wo xɔ̀ ànyigbã a, crɔ̃ yebe ègbeɖùpeawo.

⁶Ekèa ŋuti, èwò àgbètɔ be èvi pò nupo na Izràɛlviwo lè àpe nyikɔ mè. Gblɔ̃ na èto ku ètokɔ̃ɛwo, ètɔ̀ sàsra ku bàlìwo be ènyè Tɔhonɔ̀ Mawu, mù la ɖùɖù àpe jìbibi be àdãa ɖoɖa. Mù le gblɔ̃ be dùkɔ̃ kpɔ̀tɛawo do mì ŋùkpɛ̃.

⁷Ye ŋutia, ènyè Tɔhonɔ̀ Mawu, mù gblɔ̃ be wo la dovlo dùkɔ̃ kèawo cã sìgbè lekè wo wɔ̀ ɛ̀ kudo mìa nène;

⁸Lè gà ŋua mè lè Izràɛl be ètowo jia, àtiwo la gbà do àmà eye wo la sɛ̃ èkuwo na mì Izràɛlviwo. Ɖo mì la trɔ yì mìabe ànyigbã ji sɔ̀sɔɛɖe.

⁹Ɛ̃ɛ, mù la do mì ŋusɛ̃, mù la na be mìabe ànyigbã ne gbà na èkusɛ̃sɛ̃ nyuɛ̃wo.

¹⁰Lè Izràɛl be ànyigbã a kpata jia, mù la na mì la jì ɖo ji. Àmè la gbà ɖɔ mìabe èdùwo, ɖo wo la trɔ tù ènu kè gbãa.

¹¹Àgbetɔ ku èlãwo la jì ɖo ji drì lè tèpewo kpata. Mì la sùgbɔ eye mì la jì fuu. Àmèwo la sùgbɔ lè èdùa mè sìgbè sãa ke nène eye mù la gbà na jìjimèwo la sùgbɔ sìgbè lekè mù wɔ̀ na mì va yìa nène. Eye mì la nya ɛ̀ be mù nyi Tɔhonɔ̀.

¹²Mù la na mì la yì àfi sia àfi lè ànyigbã a ji, mìa Izràɛlvi kèwo nyi àpe dùkɔ̃a. Mì la xɔ̀ ɛ̀ eye e la trɔ mìa tɔ̀. Eye mu la gbà ma mìa ku mìabe èviwo dòmè ò.

¹³Ènyà kè ènyè Tɔhonɔ̀ Mawu, mù gblɔ̃a ye nyi be: Wo gblɔ̃nà be Izràɛl be ànyigbã a wùnà ye ŋutɔ be dùmèviwo, e crɔ̃na ye ŋutɔ be dùkɔ̃a be èviwo.

¹⁴Eŋuã so fifìa, ànyigbã a mu la gbà wù yebe dùmèviwo ò. Wò mu la gbà crɔ̃ àpo dùkɔ̃a be èviwo ɖe ò. Tɔhonɔ̀ Mawu ye gblɔ̃ ɛ̀.

¹⁵Mì mu la gbà sè dùkɔ̃ buwo be èzũ kaka wo la va nɔ kò mì ò. Nyàwo ye be mìabe ànyigbã mu la gbà crɔ̃ mìabe èviwo ke ò. Ènyè Tɔhonɔ̀ Mawu ye gblɔ̃ ɛ̀.”

¹⁶Tɔhonɔ̀ be ègbèa ɖì na mù gblɔ̃ be:

¹⁷“Èwò àgbètɔ be èvi, ɖoto sè! Wàlɛbɛ kè Izràɛlviwo kpɔ̀tɔ̀ lè woa ŋutɔwo be ànyigbã jia, wo mu nɔ̀ àgbè nyuɛ̃ klua ò. Eye wo pòɖi woabe ànyigbã. Wo pòɖi woabe àgbèa sɔ wu nyɔ̃nù be àsiɖoànyi ŋutɔ cã.

¹⁸Wo pòɖi ànyigbã a to èhũ kè wo kɔ̀ ɖo ànyi lè funu kudo woabe vòdu sɛ̃sɛ̃a ji. Ekèa ŋuti mù ɖùɖù àpe àdɔ̀mèze be àdãa ɖo woa ji ɖo.

¹⁹Mù kãkã wo ɖo àmèjro be dùkɔ̃wo dòmè. Nène a, mù sò kòjo na wo sɔ zɔ̃ ɖo woabe àgbènɔ̀nɔ ku wɔ̀nawo ji.

²⁰Wo yì dovlo nyikɔ nyèa lè ànyigbã kèwo ji wo to va yìa kpata, ɖo woabe àgɔ̀jèje ŋuti. Wo gblɔ̃ so woa ŋuti be: “Tɔhonɔ̀ be dùkɔ̃ ye wo nyi gbɔ̀xue! Wo jo lè yebe ànyigbã a ji.”

²¹Ekèa na be mù sè veve be àmèjro be dùkɔ̃wo crì àpe nyikɔ, to woabe àgɔ̀jèje ji. Ɖo wo yì sò ci woabe èdùwo mè.

²²Ekèa ŋuti ye wò la gblɔ̃ na Izràɛl be àxuedo a be, nène ye ènyè Tɔhonɔ̀ Mawu mù gblɔ̃ be: “Mu nyi mìawo ŋuti ye mù la wɔ̀ ènu kèa ɖo ò, Izràɛlviwo. Vɔ̀ ɖo àpe nyikɔ, kè mì dovlo lè, dùkɔ̃ kèwo dòmè mì yì sò cia, ŋuti ye.

²³Mù la ɖè nyikɔ kɔ̀kɔ̀ɛ nyè gãa kè trɔ èvlodonu lè dùkɔ̃wo dòmèa fiɔ. Nène a ye wo la nya be mù nyi àhùadù Tɔhonɔ̀. Tɔhonɔ̀ Mawu ye gblɔ̃ ɛ̀.

²⁴Eye mù la trɔ bɔ̀ mì so dùkɔ̃ kèwo mè mì yì sò cia, la kplɔ̀ mì trɔ va mìabe ànyigbã ji.

²⁵Mù la kɔ̀ èsì kɔ̀kɔ ɖo mìa ji eye mì la kɔ̀. Ɛ̃ɛ, mù la klɔ mìabe èɖiwo kudo vòdu sùmɔ̀ sumɔwo keŋu lè mìa ŋuti.

²⁶Eye mù la na mì èjì yeye, mù la sɔ gbɔ̃gbɔ̃ yeye do mìa mè. Mù la ɖè mìabe èkpe be èjìa jo, la sɔ èlãwɔ be èjì ɖo e tèpe.

²⁷Mù la sɔ Gbɔ̃gbɔ̃ nyè do mìa mè, eye mù la na, mì la ɖo ŋusɛ̃ sɔ wɔ̀ ɖo àpe èse ku ɖoɖo kèwo mù do àsi na mìa ji.

²⁸Nène a, mì la nɔ̀ ànyigbã kè mù sɔ na mìa tɔgbewoa ji. Mì la nyi àpe dùkɔ̃ eye mù la nyi mìabe Mawu.

²⁹Mù la hlùɛ̃ mì lè mìabe ènu màye màyewo keŋu mè. Nyè mu la gbà sɔ àdɔ̀toto sɔ pò mì ò, vɔ̀a mù la na àgblèmènukuwo la wɔ̀ na mì drì eye mì la yà nukuwo kɔ̀ ɖo mìabe àvàwo mè fuu.

³⁰Àgblènukuwo ku àti sɛ̃kuwo la na lè gbɔsùsu mè. Mìabe àgblèwo la ɖɔ kudo nukuyàya sùgbɔ.

³¹Wàlɛbɛ ŋua mì la ɖoŋù mìabe àgɔ̀jèje ku ènugbegble kèwo mì wɔ̀ va yìa, eye wo la jiŋɔ na mì.

³²Mì ɖo la nya ɛ̀ be mu nyi mìa ŋuti ye mù le wɔ̀ ekèa ɖo ò. Ènyè Tɔhonɔ̀ Mawu ye gblɔ̃ ɛ̀. Èŋù ɖo la kpɛ̃ mì, mìa Izràɛlviwo!

³³“Ènyà kè ènyè Tɔhonɔ̀ Mawu mù gblɔ̃a ye nyi be: Wàlɛbɛ kè mù la klɔ mìabe àgɔ̀jèjewo kpata lè mìa ŋuti vɔ̀a, mù la trɔ na àmè la ɖɔ mìabe èdùwo. Eye mù la trɔ jrà ènu kèwo gble va yìa ɖo.

³⁴Wo la trɔ dè àgblè nyigbã kèwo gble dàɖɛa. Àmè kèwo la to funua, la kpɔ be ànyigbã ŋuawo mu gbà ci gbalo ò.

³⁵Eye wo la gblɔ̃ be: “Ànyigbã cɔ̃crɔ̃ kèa trɔ va zũ Edɛ̀n be àbɔ mè. Èdù kèwo nyi èglìkpo gbãgbã ɖèɖe sãa, ɖo wo gbã wo gble wo ɖɛa, wo trɔ tù wo. Eye àmèwo gbà lè e mè fuu.”

³⁶Nène a, Dùkɔ̃ kèwo gbà lè trɔdo mìa, la nya be ènyè ye nyi Tɔhonɔ̀, àmè kè trɔ tùnà èdù gbãgbãwo eye mù trɔ nana àgblèwo sɛ̃naku. Ènyè Tɔhonɔ̀ Mawu kè gblɔ̃ ɛ̀a, ke gbà wɔ̀nà ɖo e ji.

³⁷“Ènu kè ènyè Tɔhonɔ̀ Mawu mù gblɔ̃a ye nyi be: Mù la gbà na èmɔ̃ Izràɛlviwo ne woa gbà biɔ mù àlɔ̀do. Eye mù la tɔ̀ na wo, la na wo la jì ɖo ji fuu wu èlãha ɖèka be èlãwo.

³⁸Lè àzã tɔ̀xɛwo be ɖùɖu mèa, Yèruzàlɛm la ɖɔ kudo vɔsa be èlãwo. Èlãha blibo ye wo la hɛ̃ sɔ va. Ɛ̃ɛ, àmè kèwo la trɔ va nɔ̀ èdù gbãgbãwo mèa, la sùgbɔ ɖo ji drì. Nène a ye àmèwo kpata la nya be mù nyi Tɔhonɔ̀.”