Read gen Ezekìɛl 37 Bible Online

Ezekìɛl 37 - gen bible

Ezekìɛl 37

¹Tɔhonɔ̀ be ŋusɛ̃ va ji nyè; yebe gbɔ̃gbɔ̃a kɔ mù yì dà ɖo bàlì gã ɖe, kè ɖɔ kudo èpu do xoxoa mè.

²Tɔhonɔ̀ kplɔ̀ mù to woa gbɔ va yì. Bàlì kèa ɖɔ kudo èpu sùgbɔ kèwo pu kpakplaa.

³Nène a ye Tɔhonɔ̀ biɔ mù sè be: “Àgbètɔ be èvi, èpu kèawo la gbà teŋu gbɔ̀ àgbèa?” Mù ɖo e ŋuti be: “Tɔhonɔ̀ Mawu, èwò ɖèka kpò ye nya ɛ̀.”

⁴E gbà gblɔ̃ na mù be: “Pò nupo na èpu kèawo sìgbè gblɔ̃ɖɛtɔ nène. Gblɔ̃ na wo be: Èpu pupuwo mì sè!

⁵Mì sè ènu kè Tɔhonɔ̀ Mawu le gblɔ̃ na mìa: Mù la trɔ gbɔ̀ àgbè mì eye mì la nɔ̀ àgbè.

⁶Mù la na èkã la va mìa ŋuti, la gbà na èlã la mìɔ̃ ɖo mìa ŋuti eye mù la cɔ̃ wo kudo àgbàze. Mù la trɔ sɔ gbɔ̃gbɔ̃ do mìa mè eye mì la gbɔ̀ àgbè. Eye mì la nya ɛ̀ be ènyè ye nyi Tɔhonɔ̀a.”

⁷Mù pò nupo sìgbè gblɔ̃ɖɛtɔ na èpuawo zɔ̃ ɖo lekè Tɔhonɔ̀ do ègbèa àsi na mù a nène. Wàlɛbɛ kè mù kpɔ̀tɔ̀ le pò nupoa, mù le sè hũnyà-hũnyà gã ɖe. Eye èpuawo le tètè gogo woa nɔ̀nɔwo, ɖe sia ɖe yì nɔ̀via kè sɔ̀ kudo èa gbɔ.

⁸Mù le kpɔ be èkãwo ku ŋutilã le va woa ŋuti eye àgbàze le cɔ̃ woa ji. Vɔ̀ wo kpɔ̀tɔ̀ lè màhuã-màhuã.

⁹Tɔhonɔ̀ gblɔ̃ na mù be: “Èwò àgbètɔ be èvi, gblɔ̃ ènyà ɖɛ na gbɔ̃gbɔ̃a! Gblɔ̃ na ɛ̀ be: Lè Tɔhonɔ̀ be nyikɔ mèa, va so àgo ènèawo ji ne wòa gbɔ̃ ɖo ènukuku kèawo ji ne àgbè ne trɔ gɛ̃ ɖo woa mè.”

¹⁰Mù gblɔ̃ ènyà kèwo be ègbè Tɔhonɔ̀ ɖè na mù a. Àgbè gbɔ̃gbɔ̃ gɛ̃ ɖo ènukukuawo mè eye wo gbɔ̀ àgbè. Wo sitè, nɔ̀tè. Wo sùgbɔ fuu sìgbè àhùakɔ̃ blibo nène.

¹¹Tɔhonɔ̀ gbà yì e ji na mù gblɔ̃ be: “Àgbètɔ be èvi, èpu kèwo wò kpɔa, le nyi Izràɛl be dùkɔ̃a be nɔ̀nɔmè. Izràɛlviwo le gblɔ̃ nyàwo be “Mi lè sìgbè èpu do xoxo nène, miabe ŋùɖo ku eye mi bu keŋu-keŋu!”

¹²Ekèa ŋutia, gblɔ̃ ènyà ɖɛ! Gblɔ̃ ènu kè ènyè Tɔhonɔ̀ Mawu mù jràɖo ɖɛ na woa be: Mù la trɔ yì ɖè mì to lè èyɔ̀dowo mè va, eye mù la kplɔ̀ mì va Izràɛl mìabe ànyigbã ji, dùkɔ̃ nyè.

¹³Mì la nya ɛ̀, wàlɛbɛ kè mù la trɔ gbɔ̀ mì àgbèa, dùkɔ̃ nyè; be ènyè ye nyi Tɔhonɔ̀ Mawu.

¹⁴Mù la sɔ Gbɔ̃gbɔ̃ nyèa do mìa mè eye mì la trɔ kpɔ àgbè. Mù la kplɔ̀ mì trɔ va mìabe ànyigbã ji. Funu mì la nya lè be ènyà kè ènyè Tɔhonɔ̀ Mawu mù gblɔ̃a, vana e mè godo. Tɔhonɔ̀ ye gblɔ̃ ɛ̀.”

¹⁵Tɔhonɔ̀ be ègbè ɖì na mù gblɔ̃ be:

¹⁶“Èwò àgbètɔ be èvi, sɔ àti sòso ɖe ne wòa ŋlɔ̀ ènu kèawo ɖo e ji be: “Na Yudà ku Izràɛlvi kèwo bɔ̀ ɖo e ŋutia”. Gbà sɔ àti sòso bu, ŋlɔ̀ ɖo e cã ji be: “Na Yosɛ̀f, Efràyim be àti kudo Izràɛlvi kèwo bɔ̀ ɖo e ŋutia.

¹⁷So àti sòso èvèawo ca ɖo woa nɔ̀nɔwo ŋuti, ne woa wɔ̀ àti ɖèka lè àpo àlɔ̀ mè.

¹⁸Ne àpo dùkɔ̃mèviwo va biɔ wò sè be: “Wò mu la ɖè ènu kèa gɔ̃mè na mia?”

¹⁹Wò la ɖo e ŋuti na wo be ènyè Tɔhonɔ̀ Mawu, mù ɖo è be: Mù la sɔ àti sòso kè lè Yosɛ̀f be tèpea ku Izràɛlvi kèwo lè fìɔdu kèa mèa, sɔ yì tɛ ɖo àti sòso kè lè Yudà be fìɔdua tèpea. Ne mù ca wo ɖodu vɔ̀a, wo la trɔ zũ àti sòso ɖèka.

²⁰Wò la kpɔ̀tɔ̀ le àti sòso kèwo ji wò ŋlɔ̀ ènu ɖoa, ɖo àlɔ̀ mè ne àmèwo kpata ne kpɔ wo.

²¹E yomè a, wò la gblɔ̃ ènyà kè ènyè Tɔhonɔ̀ Mawu, mù gblɔ̃ na wòa be: Izràɛlviwo, mù la kplɔ̀ mì so dùkɔ̃ kèwo dòmè mì yì sò cia. Mù la bɔ̀ mì eye mù la trɔ kplɔ̀ mì va mìabe ànyigbã ji.

²²Funu ye mù la trɔ ca mì ne mìa zũ dùkɔ̃ ɖèka lè Izràɛl be ètowo ji. Èfìɔ ɖèka ye la kplɔ̀ mìa kpata. Dùkɔ̃ be mamã ɖo fìɔdu èvè mè ɖe mu la gbà nɔ̀ ànyi ò.

²³Mì mu la gbà yì nɔ pòɖi mìa ɖokoe lè vòduwo be sùmɔ̀ sumɔ mè kaka la gbà wɔ̀ èhlɔ̃dãdã be ènuwo ò. Mù la ɖè mì to lè ènu gbegble kèwo mì wɔ̀ va gbɔ nyèawo mè. Mù la kɔ̀ mìa ŋuti. Mì la nyi àpe dùkɔ̃ eye mù la nyi mìabe Mawu.

²⁴Mù la na mì èfìɔ ɖe kè la sɔ̀ kudo èfìɔ David, ye ɖèka ye la nyi mìabe kplɔ̀tɔ. Mì la kpɔ èse nyèwo ji, la le ɖoɖo nyèa ɖo àsi.

²⁵Mì la nɔ̀ ànyigbã kè mù sɔ na sumɔ̃vi nyè Yakɔb, fikè mìa tɔgbewo nɔ̀ va yìa. Mì la nɔ̀ funu kaka yì, mìabe èviwo, mìabe èviwo be èviwo ji. Eye mì la ɖo èfìɔ kè la ɖì sumɔ̃vi nyè David so fifì kaka yì.

²⁶Mù la wɔ̀ ŋuti fàfa be zòɖùɖu kudo wo. E la nyi zòɖùɖu kòkòɖàbì ku wo. Mù la na wo nɔ̀pe, wo la jì ɖo ji fuu eye mù la li mawuxɔ nyèa ɖo woabe dòdòmè kaka sɔ yì.

²⁷Mù la nɔ̀ kudo mì. Mù la nyi mìabe Mawu eye mì la nyi àpe dùkɔ̃.

²⁸Wàlɛbɛ kè mawuxɔ nyèa nɔ̀ mìa dòmè kaka sɔ yìa, dùkɔ̃ kpɔ̀tɛawo la nya ɛ̀ be ènyè ye nyi Tɔhonɔ̀a eye mù ɖè Izràɛl, ɖovò na àpe sùmɔ̀ sumɔ.”