Read gen Ezekìɛl 38 Bible Online

Ezekìɛl 38 - gen bible

Ezekìɛl 38

¹Tɔhonɔ̀ be ègbèa ɖì na mù gblɔ̃ be:

²“Èwò àgbètɔ be èvi, trɔ kpɔ Gɔg lè Màgɔg be ànyigbã ji, sɔ kpɔ dùkɔ̃ Mècɛk ku Tubàl be èfìɔvia, gblɔ̃ ènyà ɖɛ ɖo e ŋuti.

³Wò la gblɔ̃ be: Ènyà kè Tɔhonɔ̀ Mawu gblɔ̃a ye kè: Mù la sitè ɖo ŋuti wò, Mècɛk ku Tubàl be èfìɔvi.

⁴Mù la sɔ ègà kù àglã na wò, mù la kplɔ̀ wò to lè èdùa mè. Èwò ku àpo àhùakɔ̃a kpata, èsɔ ku èsɔdotɔwo, woa kpata la nɔ̀ woabe àwù nyuɛ̃wo mè. Mì la sùgbɔ wu àhùakɔ̃ kèwo le woabe àkpoxɔ̀nuwo kudo èwuiwo.

⁵Pɛrsìa, Ètiopìa kudo Put be gbãdãgbãwo la cɔ̃ ègàkuku, la le àkpoxɔ̀nuwo eye wo la yì ku wò.

⁶Gòmer ku yebe àhùakɔ̃a kpata, Bɛt-Tògarmà kè lè àpùgoa ku yebe àhùakɔ̃a kpata cã la yì kudo wò, gbàkudo dùkɔ̃ gbogbo kpɔ̀tɛawo.

⁷Jràɖo dà ɖɛ ne wòa sɔ̀gbè, èwò kudo àmèha gbogbo kèa. Èwò ye la kplɔ̀ woa kpata.

⁸Lè èpè fuwo yomè a, mù la na wò la yì xa Izràɛl. Wàlɛbɛ ŋua, yebe àmèwo la si àhùa, la yì sò ci ànyigbã bu ji. Wo la yì bɔ̀ ɖo Izràɛl be èto kèwo ci gbalo va yìa ji. Ne wo jo lè dùkɔ̃ kpɔ̀tɛawo dòmè vɔ̀a, wo la nɔ̀ àgbè lè ètomè fàfa mè.

⁹Èwò kudo àpo àhùakɔ̃a gbàkudo dùkɔ̃ kèwo wɔ̀ ɖèka ku wòa, mì la yì jè wo ji lè àvòmè sìgbè èji sɛ̃sɛ̃ ɖe nène. Mì la yì cɔ̃ wo sìgbè lilikpo nène.

¹⁰“Ènyè Tɔhonɔ̀ Mawu, mù le gblɔ̃ ɛ̀ be ne gàmèa sùa, sùsu wòwo la sùgbɔ kaka eye wò la wɔ̀ ɖoɖo gbegble.

¹¹Wò la gblɔ̃ be: “Mù la ɖè àbòyo ànyigbã ci nùvò ɖe. Mù la wɔ̀ àvũ ku ŋusù kèwo lè tomè fàfa mè, kèwo lè èdù kèwo mu ɖo àgbògbò kaka la va ɖo àgbowo òa mè.

¹²Mù la yì lɔ àmɔ̀nyɔ̀nuawo eye mù la kãkã èdùa.” Wò la yì kpe àhùa ku àmè kèwo va lè èdù kèwo wo gbã sãa mè. Wo bɔ̀ to lè àmèjrowo be ànyigbã ji. Wo ɖo èlãhawo kudo àdɔ̀kùnuwo eye wo sò nɔ̀pe ɖo xixea be dòdòmè.

¹³Sebà ku Dedàn, Tarsò be àsìsàtɔwo kudo woabe èdù kèwo tɛ ɖo woa ŋutia, la gblɔ̃ na wò be: “Wò bɔ̀ àpo àhùakɔ̃a ne wòa va lɔ àmɔ̀nyɔ̀nuawo ye à? Wò va la lɔ klòsalò ku sìka, èlãhawo kudo miabe àdɔ̀kùnuwo sɔ wɔ̀ àmɔ̀nyɔ̀nu ɖɔ̀hũi ɖe a?”

¹⁴“Èwò àgbètɔ be èvi, ɖo ekèa ŋutia, gblɔ̃ ènyà ɖɛ! Gblɔ̃ na Gɔg be: Tɔhonɔ̀ Mawu gblɔ̃ be: Wàlɛbɛ kè Izràɛl dùkɔ̃ nyèa la nɔ̀ ŋuti fàfa mèa, wò la nya ɛ̀.

¹⁵Eye wò la va so kaka èvègo, lè ŋùkɔ̀ na gbãdãgbã kèwo so èdù sùgbɔwo mèa. Mì la lia èsɔwo ji, la sùgbɔ ŋutɔ eye mì la nyi àhùakɔ̃ sɛ̃ŋu ɖe.

¹⁶Wò la va kpe àkɔ kudo Izràɛl, dùkɔ̃ nyèa. Eye wò la xɔ̀ yebe ànyigbã sìgbè lekè lilikpowo cɔ̃na ànyigbã jia nène. Ekèa la va e mè lè àzã fuu yomè. Mù la dɔ̃ wò yì kpe àhùa ku dùkɔ̃ nyè. Nène a, dùkɔ̃ kpɔ̀tɛawo la nya mù, wàlɛbɛ kè mù la ɖè àɖèsã nyinyi nyèa fiɔ to èwò Gɔg jia.

¹⁷“Ènyà kè ènyè Tɔhonɔ̀ Mawu, mù gblɔ̃a ye kè: Sãa, mù pò nupo so e ŋuti, to àpe sumɔ̃vi kèwo nyi Izràɛl be gblɔ̃ɖɛtɔwo ji. Wo do àŋɛ̀ xoxo be mù la dɔ̃ wò ne wòa yì kpe àkɔ ku dùkɔ̃ nyèa.

¹⁸Vɔ̀ Gɔg, gbè kè gbè ye wò la yì xa Izràɛl be dùkɔ̃a, mù la gɛ̃ ɖo àdɔ̀mèze gã ɖe mè. Ènyè Tɔhonɔ̀ Mawu ye gblɔ̃ ɛ̀.

¹⁹Lè àpe jìbibi be àdãa mèa, mù tà ɖokoe nyè be gbè ŋua gbèa, ànyigbã hũhũ tɔ̀xɛ ɖe ye la jɔ̀ lè Izràɛl be ànyigbã ji.

²⁰Àpùmè be èlãwo, àyamè be xèviwo, ègbemèlãwo, èlãklìvi kèwo zɔ̃nà pòdo jia kudo àgbètɔwo kpata la hũhũ ku vɔ̃vɔ̃ lè ŋùkɔ̀ na mù. Ètowo la mù, àkpãwo la fɛ̃, jè e mè eye èglìkpa ɖekpe mu la nɔ̀tè ò.

²¹Mù la wɔ̀ àhùa ku wò Gɔg, lè èto nyèwo kpata ji. Àpo gbãdãgbãwo ŋutɔ la wù woa nɔ̀nɔwo. Ènyè Tɔhonɔ̀ Mawu ye gblɔ̃ ɛ̀.

²²Mù la sɔ èdɔ̀ vuɛ̃ sɔ pò wò eye wò la ku ci àhùa. Mù la na èwèmi ku èzò be èji la jà kɔ̀ ɖo èwò, àhùakɔ̃ wòa kudo èxlɔ̃ wò gbogboawo ji.

²³Nène a ye mù la ɖè gãnyinyi ku àɖèsã nyinyi nyèa fiɔ dùkɔ̃wo kpata. Eye wo la nya ɛ̀ be ènyè ye nyi Tɔhonɔ̀a.”