Read gen Ezekìɛl 39 Bible Online

Ezekìɛl 39 - gen bible

Ezekìɛl 39

¹“Na èwò àgbètɔ be èvi, gblɔ̃ ènyà ɖɛ ɖo Gɔg ŋuti! Wò la gblɔ̃ be: Nène a ye Tɔhonɔ̀ Mawu gblɔ̃: Mù la sitè ɖo èwò Gɔg, Mècɛk ku Tubàl be dùkɔ̃wo be èfìɔvi ŋuti.

²Mù la ɖè wò to àpo ànyigbã, kè lè kaka èvègoa, ji. Mù la kplɔ̀ wò to yì kpe àkɔ kudo Izràɛl be ètowo.

³E yomè a, mù la ŋɛ̃ àŋùdàtia lè àpo èmìɔ-lɔa mè eye mù la na àŋùtiawo la hlɛ̃ lè àpo ɖùsi-lɔa mè.

⁴Nène a, èwò, àpo àhùakɔ̃a kudo dùkɔ̃ kèwo wɔ̀ ɖèka kudo wòa, mì la crɔ̃ lè Izràɛl be ètowo ji. Eye mù la sɔ mìabe àmèkpòtiawo na àklàsuwo ku ègbemèlãwo la ɖù.

⁵Wò la ku lè àhùagbe ji, sìgbè lekè mù gblɔ̃ sãa nène. Ènyè Tɔhonɔ̀ Mawu ye gblɔ̃ ɛ̀.

⁶Mù la ɖè èzò do Màgɔg be ànyigbã ji kudo àmè kèwo lè àgbɔ̃jèpò mè lè ètɔ̀dòmèkɔ̃ɛ̃wo jia mè. Nène a ye wo la nya ɛ̀ be ènyè ye nyi Tɔhonɔ̀a.

⁷Mù la wɔ̀ ɛ̀ kaka be Izràɛl, dùkɔ̃ nyèa la nya ɛ̀ nyàwo be mù nyi Mawu. Nyè mu la gbà na ɛ̀ èmɔ̃ ne bèa le mù èfũ ò, eye dùkɔ̃ kpɔ̀tɛawo la nya ɛ̀ be ènyè ye nyi Tɔhonɔ̀, Izràɛl be Mawu àdodoea.

⁸Ɛ̃ɛ ènu kèawo kpata la jɔ̀, wo jè e gɔ̃mè cã vɔ̀. Kòjoɖoɖo be àzã kè mù ɖoa ye. Ènyè Tɔhonɔ̀ Mawu ye gblɔ̃ ɛ̀.

⁹Izràɛlviwo la to lè èdùwo mè. Wo do èzò, sɔ fiɔ̃ woabe kɛ̃tɔwo be àhùawɔ̀nuwo. Àkpoxɔ̀nuwo vivi ku gãgãwo, àŋùdàti kudo àŋùtiawo, èhuãvi ku èhuãgãwo la nyi èzòa be nuɖùɖu èpè adrɛ̃ sɔ̃ŋu.

¹⁰Wo mu la gbà yì lɔ ànakè lè àgblè ji ò, eye wo mu la gbà yì sò lè àvewo mè ò. Nyàwo, àhùawɔ̀nu kèawo ye wo la sɔ do èzòa. Wo la fĩ àmè kèwo yì fĩnà wo sãa, eye wo la ɖè àbòyo àmè kèwo ɖènà wo àbòyo sãa. Ènyè Tɔhonɔ̀ Mawu ye gblɔ̃ ɛ̀.

¹¹“Wàlɛbɛ kè ènu kèa kpata la jɔ̀ a, mù la na àmèɖìpe Gɔg lè Izràɛl nyigbã ji. E la nɔ̀ èmɔ̃zɔ̃tɔwo be bàlìa mè, lè èjè be àpùa be èwèzɛ̃pe. Àmèɖìpe kèa la tu èmɔ̃zɔ̃tɔwo be èmɔ̃a. Wo la ɖì Gɔg ku yebe àhùakɔ̃a kpata, eye wo la yɔ funua be “Gɔg be àmèha be bàlì”.

¹²Izràɛlviwo la sɔ wètri adrɛ̃ sɔ ɖì gbãdãgbãwo kpata eye wo la kɔ̀ ànyigbã a ŋuti.

¹³Dùkɔ̃a kpata ye la wɔ̀ èdɔ kèa eye wo la kpɔ jìjɔɛ lè ekèa be wɔ̀wɔ mè lè ŋùkèkè kè gbè mù la ɖè gogo nyè fiɔa. Ènyè Tɔhonɔ̀ Mawu ye gblɔ̃ ɛ̀.

¹⁴Wo la ɖè ŋusùwo ɖovò wètri adrɛ̃ sɔ̃ŋu ne woa ɖìsà to ànyigbã kpata ji sɔ ɖì ŋutilãkuku kèwo gbà ci ànyigbã jia. Nène a, wo la kɔ̀ ànyigbã ŋuti.

¹⁵Wo la ɖìsà to ànyigbã kpata ji lè go sia go mè. Ne àmè ɖe yì kè ɖo èpu ɖewo ŋutia, e la bɔ̀ èkpewo ɖo funu sɔ do jèsìdo è. Eye àmè kèwo kùnà èyɔ̀doa, la va lɔ èpuawo yì ɖì ɖo Gɔg be àmèha be bàlìa mè.

¹⁶Èdù ɖe lè kè wo ɖona be “Hàmɔnà”, e gɔ̃mè ye nyi Àmèha. Lè vɔ̀vɔnua, wo la kɔ̀ ànyigbã a ŋuti.”

¹⁷Tɔhonɔ̀ gbà gblɔ̃ na mù be: “Èwò àgbètɔ be èvi, gblɔ̃ na àyamè xèviwo kudo ègbemèlãwo be: Mì bɔ̀, mì va bɔ̀ so àfi sia àfi na àpe vɔsa, vɔsa gã kè mù la wɔ̀ na mì lè Izràɛl be ètowo jia! Mì va ɖù èhũlã eye mìa nù èhũ.

¹⁸Mì la ɖù gbãdãgbã kãlìsukawo be ŋutilãkukuwo eye mìa nù xixea be ègawo be èhũ. Àmè kèawo mù sɔ wɔ̀ vɔsa ɖo àgbòwo, àlɛ̃viwo, gbɔgbɔɛwo kudo ènyìvi doàmì kèwo keŋu so Bacàn, wo tèpe.

¹⁹Mì la ɖù àmì tèpe lekè mì jro ɖoa, eye mì la nù èhũ kaka la mu. Ekèa ye nyi vɔsa kè mù le na mìa.

²⁰Lè nuɖùɖu kplɔ̃ gã ŋua ŋutia, mì la ɖù èsɔwo ku èsɔdotɔwo, àhùasukawo ku gbãdãgbãwo lekè mì jro a. Tɔhonɔ̀ Mawu ye gblɔ̃ ɛ̀.

²¹“Mù la ɖè gogo nyèa fiɔ dùkɔ̃wo. Woa kpata la kpɔ lekè mù zãna ŋusɛ̃ nyè sɔ wɔ̀nà ɖo jɔ̀jɔɛsòso nyèa ji ɖoa.

²²So gà ŋua mèa, Izràɛlviwo la nya ɛ̀ be ènyè ye nyi Tɔhonɔ̀ woabe Mawu.”

²³“Dùkɔ̃ kpɔ̀tɛawo la sè e mè be wo kplɔ̀ Izràɛlviwo yì gàtɔnugbe ɖo woabe àgɔ̀ kèwo wo jè do ènyè Tɔhonɔ̀a ye. Nyàwoa, mù trɔ lè woa yomè. Mù ɖè wo do àsi na woabe kɛ̃tɔwo ne woa kpata woa ci èwui nu.

²⁴Mù trɔ lè woa yomè ne ma wɔ̀ kudo wo sìgbè lekè woabe àgɔ̀jèje ku mà-kɔ̀mà-kɔ̀ a nɔ̀a nène.

²⁵“Vɔ̀a ènyà kè ènyè Tɔhonɔ̀ Mawu, mù gblɔ̃a ye kè: So fifìa, mù la ku ŋuzĩzĩ na Izràɛlviwo, Yakɔb be jìjimèviwo. Mù la trɔ woabe àgbè nɔ̀nɔ eye mù la biɔ bùbu kè jè na mù a so woa kpata si.

²⁶Nène a, wo la ŋlɔ̀be ègbɔɖìamè kè mè woabe àgɔ̀jèjewo kplɔ̀ wo do a. Wo la trɔ nɔ̀ àgbè mà vɔ̃ gbledo ɖe lè woabe ànyigbã ji eye àmè ɖekpe mu la gbà do ŋɔji na wo ò.

²⁷Wàlɛbɛ kè mù la kplɔ̀ wo so dùkɔ̃wo dòmè gbɔ̀, so woabe kɛ̃tɔwo be ànyigbã ji vaa, mù la ɖè àɖèsã nyinyi fiɔ lè dùkɔ̃ sùgbɔwo be ŋùkɔ̀.

²⁸Woawo ŋutɔ la nya ɛ̀ be ènyè ye nyi Tɔhonɔ̀ Mawu a, wàlɛbɛ kè mù la bɔ̀ wo ɖo woa ŋutɔwo be ànyigbã ji; màgble àmè ɖɛ ɖo àmèjro be ànyigbã ji, fikè wo nɔ̀ gàtɔnugbe lè sãa.

²⁹Nyè mu la gbà wla ɖokoe nyè boo lè woa gbɔ ò. Wàlɛbɛ ŋua, mù la ɖùɖù Gbɔ̃gbɔ̃ nyèa ɖo Izràɛlviwo ji.” Tɔhonɔ̀ ye gblɔ̃ ɛ̀.