Read gen Ezekìɛl 4 Bible Online

Ezekìɛl 4 - gen bible

Ezekìɛl 4

¹Tɔhonɔ̀ gbà gblɔ̃ na mù be: “Èwò àgbètɔ be èvi, sɔ èkpe ɖèka. Sɔ ɛ̀ dà ɖo àpo ŋùkɔ̀. Ta Yèruzàlɛm be èdùa ɖo e ji.

²Sɔ kpea, ɖèfiɔ be kɛ̃tɔwo va xa ɛ̀. Kù èdo sɔ trɔ è gòdò eye wò la ta àhùakɔ̃ àgbàkà-àgbàkà ku àhùawɔ̀nuwo trɔ do è.

³Eye wò la sɔ gàkpo gbàjà ɖe, sɔ ma èwò kudo èdùa dòmè. Dà ŋùku ɖo èdùa ji: wo xa ɛ̀. Èwò ye xa ɛ̀. Ènu kèa nyi jèsìdo na Izràɛl be sìasia.

⁴E yomè a, mlɔ̃ ànyi ɖo èmìɔ̃ be àhàda ji eye sɔ Izràɛl be dùkɔ̃a be àgɔ̀jèjewo dà ɖo ɖokoe ji. Kaka kè wò la mlɔ̃ àhàda jia, wò la dro àgɔ̀jèje kèawo be àgbã.

⁵Mù la sɔ ŋùkèkè ɖewo dà ɖo ŋùkɔ̀ na wò. Ŋùkèkè kèawo sɔ kudo Izràɛl be àgɔ̀jèje be ŋùkèkèwo. Nène a ye wò la dro woabe àgɔ̀jèjewo xɔ̀ ŋùkèkè àlɔ̀ ètɔ̃ èkà èvè ci èwo (390).

⁶Ne gàmè kèa va yì vɔ̀a, wò la trɔ ɖo àhàda ɖùsimètɔ̀a ji eye wò la gbà dro Yudà be àgɔ̀jèjewo xɔ̀ ŋùkèkè èkà (40). Mù le na wò ŋùkèkè ɖèka ɖo èpè ɖe sia ɖe nu.

⁷E yomè a, wò la ɖè ŋùku kudo àbɔ puplu ɖo Yèruzàlɛm kè wo xaa ŋuti eye wò la gblɔ̃ ènyà ɖɛ so e ŋuti.

⁸Lè tɔ̀ nyè gomèa, mù la bla wò kudo èkà ne wò mu gbà teŋu trɔ àhàda kaka ne woa va ɖo vɔ̀vɔnu na xaxa be ŋùkèkèawo ò.

⁹Sɔ èlù, èlì, àyi, èklùi, èpòvi kudo èlù sɛ̃ŋu. Sɔ wo kɔ̀ ɖo àgbã ɖèka mè ne wòa sɔ wɔ̀ kpɔ̃nɔ. E la nyi àpo nuɖùɖu na ŋùkèkè àlɔ̀ ètɔ̃ èkà èvè ci èwo kèwo mè ye wò la mlɔ̃ àhàda jia.

¹⁰Wò la nɔ ɖà ènu kè wò la ɖù lè ŋùkèkè ɖèka mèa, ne bèa teŋu sù wò kaka na ŋùkèkè kè la vaa.

¹¹Wò la nù èsì ɖo jije ji eye ekè la sù wò lè ŋùkèkè ɖèka mèa, la nyi lità ɖèka.

¹²Ènuɖùɖu wòa la nyi èlù be fãniã kpɔ̃nɔ. Wò la mè ɛ̀ lè àgbètɔwo be èmi ji lè àmèwo kpata be ŋùkumè.”

¹³Tɔhonɔ̀ gbà gblɔ̃ kpe è be: “Nène ye Izràɛlviwo la nɔ ɖù woabe nuɖùɖu mà-kɔ̀ mà-kɔ yeŋu lè àmèjro nyigbã ji, fikè mù la nyà wo ɖoɖaa.”

¹⁴Mù do àpa gblɔ̃ be: “Oò, Tɔhonɔ̀ Mawu, nyè mu wɔ̀ ɖokoe nyè mà-kɔ̀ mà-kɔ kpɔ ò! So kaka ɖèvi nyè mèa, nyè mu ɖù èlã ŋùku gbãgbã àlo èlã kè ègbemèlã bu wùa kpɔ ò. Èlã mà-kɔ̀ mà-kɔ ɖekpe mu ɖo ènumè na mù kpɔ ò.”

¹⁵E ɖo e ŋuti be: “E nyɔ, fifìa mù na wò ègbè be wòa ɖɔ̀lì àgbètɔ be èmia kudo ènyì be èmi sɔ mè fãniã kpɔ̃nɔa.”

¹⁶Eye e gbà yì eji be: “Kpɔɖa Ezekìɛl, mù la crɔ̃ Yèruzàlɛm be kpɔ̃nɔ kpɔ̀tɛawo. Àmèwo ɖo la wla nuɖùɖu kudo àhà ŋutɔ cã. Ekèa ŋuti ye wo la ci jojojoe.

¹⁷Kpɔ̃nɔ kudo èsì la hùetè do wo. Àmè sia àmè be ènu la ku lè nɔ̀via ŋuti, eye wo la yì cɔ̃crɔ̃ mè ɖo woabe àgɔ̀jèje ŋuti.”