Read gen Ezekìɛl 40 Bible Online

Ezekìɛl 40 - gen bible

Ezekìɛl 40

¹Wàlɛbɛ kè wo kplɔ̀ àmèwo yì gàtɔnugbe be èpè èwì vɔ àtɔ̃gɔ̃a be gɔ̃mèjèje, lè wètria be ŋùkèkè èwogɔ̃a gbè, kè wo gbã Yèruzàlɛm be èpè woènègɔ̃a yomè a, Tɔhonɔ̀ be ŋusɛ̃ va ji nyè eye be kplɔ̀ mù yì tèpe ɖe.

²Lè àvìmènu be kpɔkpɔ ɖe mèa, Mawu kplɔ̀ mù yì Izràɛl be èto yì ji hũi ɖe ji. Lè àpùgoa, èxɔ̀ bɔ̀ɖoduwo lè funu. E ze sìgbè èdù ɖe nène.

³E kplɔ̀ mù yì funua, eye mù kpɔ àmè ɖe kè lè sìgbè gàjɛ̃ nène lè ètènu lè hɔ̃tru ɖe gbɔ. E le àlɛ̃ŋudà be èkà kudo èkpò sɔ jijenu ɖo àsi.

⁴E gblɔ̃ na mù be: “Èwò àgbètɔ be èvi, hũ ŋùku ku èto wòwo. Le ŋùku ɖo ènu kèwo kpata mù la sɔ fiɔ wòa ŋuti. E yomè a, wò la gblɔ̃ ènu kèwo kpata wò kpɔa, na Izràɛlviwo.”

⁵Kpɔ ènu kè ŋuti mù kè ɖoa ye nyi ekè: èglìkpa ɖe trɔdo mawuxɔa. Àmèa le yebe èkà kè dìdì àbɔglìgo àdɛ̃a ɖo àsi. E jije èglìa be kèkemè ku yebe jiyìyi eye be kpɔ àbɔglìgo àdɛ̃ lè àkpa èvèa kpata.

⁶E yì àgbo kè lè èwèzɛ̃pea gbɔ, e lia àcrɔkpe a eye e jije èxɔ̀a be gũwɔ̀wɔ. E cã nyi àbɔglìgo àdɛ̃.

⁷Èxɔ̀nuɖiatɔwo be èxɔ̀nugoe ɖe sia ɖe ɖo dìdimè ku kèkemè àbɔglìgo àdɛ̃. Eye àbɔglìgo àtɔ̃ lè èxɔ̀nugoe ɖe sia ɖe dòmè. Èxɔ̀mɔnu ɖe kèkè àbɔglìgo àdɛ̃ jè ŋùkɔ̀ èxɔ̀ kè lè mawuxɔa be ŋùkɔ̀a.

⁸E jije èxɔ̀mɔnu àdɔ̀mètɔ̀a be àkpàtaa nu, eye e kpɔ àbɔglìgo èvè.

⁹E jije èxɔ̀mɔnua be àkpàtaa nu, e kpɔ àbɔglìgo ènyi. Yebe sɔtìwo trì àbɔglìgo èvè. Èxɔ̀mɔnua be àkpàtaa lè àdɔ̀mè.

¹⁰Èxɔ̀nuɖiatɔwo be èxɔ̀nugoe àdɛ̃ kèwo lè èxɔ̀mɔnu lè èwèzɛ̃pea, lè àgbàkà nu: ètɔ̃ lè àkpa ɖèka eye ètɔ̃ buwo cã lè àkpa èvègɔ̃a. Àgbàkà ɖe sia ɖe ɖo jije ɖèka ŋùkumè eye sɔtìwo cã ɖo kèkemè ɖèka ŋùkumè.

¹¹E jije èxɔ̀mɔnua be kèkemè, eye e kpɔ àbɔglìgo èwo. Èxɔ̀mɔnua be dìdimè nyi àbɔglìgo woètɔ̃.

¹²Lè èxɔ̀nugoe kèwo ɖo kèkemè ku dìdimè àbɔglìgo àdɛ̃ trɔdoa, àlìdoe ɖe to funu eye àtivi ɖe kè yìji àbɔglìgo èvèa, sò èmɔ̃a nu.

¹³Àmèa jije èxɔ̀nugoe ɖe mè eye e gbà jije èxɔ̀a bu kè jè ŋùkɔ̀ ɛ̀a, e kpɔ àbɔglìgo wì vɔ àtɔ̃.

¹⁴E gbà jije sɔtìwo cã nènea eye e kpɔ àbɔglìgo èkà takpo. Yì sɔtìa gbɔa, xixeanu trɔ do èxɔ̀a mɔnu[17].

¹⁵Èmɔ kè lè èxɔ̀mɔnu be àkpàtaa kudo èxɔ̀mɔnu àdɔ̀mètɔ̀a dòmèa, nyi àbɔglìgo èkà ci èwo.

¹⁶Flɛsɛ̀ kèwo ŋuti gàja lèawo lè èxɔ̀nugoeawo ŋuti pòxla, wo lè àkpàtaawo ŋuti eye wo ta ède be àzãwo ɖo sɔtìawo ŋuti lè àdɔ̀mè.

¹⁷Ŋusùa kplɔ̀ mù yì mawuxɔa be xixenu e godotɔ̀a. Xixenu kèa ɖo èxɔ̀tamè gbàjà eye wo tù èxɔ̀ ègbã sɔ trɔ do è.

¹⁸Wo do ànyigbã a cã lè èxɔ̀mɔnu vòvòawo. Èxɔ̀awo mè yì gɔ̃mè lè xixenu kè lè àdɔ̀mèa gbɔ.

¹⁹Ŋusùa xɔ̀ jijea so èglì kè lè mawuxɔa be èxɔ̀mɔnu kudo xixenu kè lè e godoa gbɔ yì xixenu àdɔ̀mètɔ̀a be èglìkpaa gbɔ. E kpɔ àbɔglìgo èkà èvè takpo, lè èwèzɛ̃pe lɔ̀ge.

²⁰E yomè a, e yì èvègo lɔ̀ge. E jije èxɔ̀mɔnu kè yì xixenu kè lè e godoa, be kèkemè ku dìdimè.

²¹E ɖo èxɔ̀nugoe àdɛ̃: ètɔ̃ lè àkpa ɖèka, ètɔ̃ lè àkpa èvègɔ̃a eye èmɔ̃ to woa dòmè. Àkpàtaa kudo èglìawo ɖo kèkemè ɖèka ku èwèzɛ̃pe be èxɔ̀mɔnua. Èxɔ̀mɔnu kè lè èvègoa dìdì àbɔglìgo èkà ci èwo eye e kèkè àbɔglìgo wì vɔ àtɔ̃.

²²Àkpàtaa, flɛsɛ̀awo kudo ènutata vòvòawo ɖo jijemè ɖèka ku èxɔ̀mɔnu èvègɔ̃a. Ne wò la yì èxɔ̀mɔ̃nu kè lè èvègoa, wò la lia àcrɔkpe adrɛ̃. Àkpàtaa lè àcrɔkpe a be ŋùkɔ̀.

²³Lè èxɔ̀mɔnu kè lè èvègoa be ŋùkɔ̀a, èxɔ̀mɔnu bu trɔ hũ ɖoɖa xixenu àdɔ̀mètɔ̀a. Nène a tutu be lè, lè èwèzɛ̃pe cã. Ŋusùa jije èmɔ̃ kè lè èxɔ̀mɔnu èvèa be dòdòmèa, e kpɔ metà èkà ci èwo.

²⁴E yomè a, e kplɔ̀ mù yì àpùgo, fikè èxɔ̀mɔnu bu lèa. E jije àgbonuɖiatɔwo be èxɔ̀nugoewo; èxɔ̀a kudo èglìawo. Wo ɖo jijemè ɖèka ku èxɔ̀mɔnu kpɔ̀tɛawo.

²⁵Flɛsɛ̀wo cã lè funua, trɔdo èxɔ̀mɔnua ku èxɔ̀a. Wo lè sìgbè kèwo lè èwèzɛ̃pe kudo èvègoawo ke nène.

²⁶Wò la lia àcrɔkpe adrɛ̃ gbɔ̀xue la ɖo àpùgo be èxɔ̀amɔnu. Èxɔ̀ gãa, lè àcrɔkpe a be ŋùkɔ̀ tututu. Wo do àcã na èglìa lè àdɔ̀mè kudo ède be àzãwo. Wo lè èglìa ŋuti lè àkpa èvèa kpata na èmɔ̃ kè to dòdòmèa.

²⁷Lè èxɔ̀ kèa be ŋùkɔ̀a, èxɔ̀mɔnu bu gbà lè, kè hũ ɖoɖa xixenu àdɔ̀mètɔ̀a. Ŋusùa gbà jije èmɔ̃ kè lè èxɔ̀mɔnu èvè kèwo lè àpùgoa cã. E kpɔ àbɔglìgo èkà èvè takpo.

²⁸E yomè a, ŋusùa kplɔ̀ mù yì xixenu kè lè àdɔ̀mèa, to àpùgo be èxɔ̀mɔnu. E jije èxɔ̀mɔnu kèa cã. E kpɔ jijemè ɖèka ku xixenu kè lè e godoa be èxɔ̀mɔnuwo.

²⁹Àgbojikpɔtɔwo be èxɔ̀nugoewo, sɔtìwo kudo àkpàtaa, woa kpata wo ɖo jijemè ɖèka ku èxɔ̀mɔnu kpɔ̀tɛawo. Flɛsɛ̀wo lè àkpàtaa kpata ŋuti. Èxɔ̀mɔnu kè lè èvègoa dìdì àbɔglìgo èkà ci èwo eye e kèkè àbɔglìgo wì vɔ àtɔ̃.

³⁰Àkpàtawo trɔ do è gòdò eye wo dìdì àbɔglìgo wì vɔ àtɔ̃, kèkè àbɔglìgo àtɔ̃.

³¹Àkpàta kèawo hũ ɖoɖa xixenu kè lè e godoa. Wo do àcã na èglìa lè àdɔ̀mè ku ède be àzã. Wò la lia àcrɔkpe be àfɔ̀ɖèɖe ènyi gbɔ̀xue la yì funu.

³²E yomè a, ŋusùa kplɔ̀ mù to èwèzɛ̃pe be èxɔ̀a mɔnu yì xixenu kè lè àdɔ̀mèa. E jije èxɔ̀a mɔnu. E cã ɖo jije ɖèka ŋùkumè ku èxɔ̀mɔnu kpɔ̀tɛawo.

³³Àgbojikpɔtɔwo be èxɔ̀nugoewo, sɔtìwo kudo àkpàtaa, woa kpata wo ɖo jijemè ɖèka ku èxɔ̀mɔnu kpɔ̀tɛawo. Flɛsɛ̀wo lè èxɔ̀mɔnu ku àkpàtaa kpata ŋuti. Èxɔ̀mɔnua be dìdimè kpata nyi àbɔglìgo èkà ci èwo eye e kèkè àbɔglìgo wì vɔ àtɔ̃.

³⁴Àkpàtaa hũ ɖo xixenu kè lè e godoa. Wo ta ède be àzã ɖo èglìawo ŋuti lè àdɔ̀mè. Wò la lia àcrɔkpe be àfɔ̀ɖèɖe ènyi gbɔ̀xue la yì funu.

³⁵E yomè a, ŋusùa kplɔ̀ mù yì èxɔ̀mɔnu kè lè èvègoa. E jije è eye e gbà kpɔ jijemè ɖèka ŋùkumè ke sìgbè kpɔ̀tɛawo nène.

³⁶E cã ɖo èxɔ̀nugoewo, pilàwo ku àkpàtawo, kudo flɛsɛ̀wo trɔdo. E dìdì àbɔglìgo èkà ci èwo gbà kèkè àbɔglìgo wì vɔ àtɔ̃.

³⁷Àkpàtaa hũ jè xixenu kè lè e godoa. Wo do àcã na èglìkpa lè àdɔ̀mè kudo ède be àzãwo lè sɔtìawo ŋuti. Àcrɔkpe be àfɔ̀ɖèɖe ènyi wò la wɔ̀ gbɔ̀xue la yì funua.

³⁸Èxɔ̀ ɖe lè kè be èxòmɔnu lè èxɔ̀mɔnuawo be sɔtìwo be dòdòmè. Funu ye wo jrànà ènumème vɔsa be èlãwo ɖo lè.

³⁹Èkplɔ̃ èvè lè èxɔ̀ ɖe sia ɖe be èmɔ̃nu. Èkplɔ̃ ŋuawo ji ye wo wùnà vɔsa be èlãwo lè. Ènumème vɔsa kudo vɔsa na sɔsɔkè be èlãwo.

⁴⁰Èkplɔ̃ ènè lè èxɔ̀a godo. Ne wo le yì èxɔ̀mɔnu kè lè èvègoa, wo la teŋu nɔ kpɔ èkplɔ̃awo èvè-èvè lè àkpa ɖe sia ɖe.

⁴¹Eŋuã èkplɔ̃ ènyi ji ye wo wùnà vɔsa be èlãwo lè. Èkplɔ̃ ènè lè èxɔ̀a mɔnu be àkpa ɖèka eye ènè buwo cã lè àkpa èvègɔ̃a.

⁴²Èkplɔ̃ ènè kèwo wo zãna sɔ jrànà ènumème be vɔ̀sawo ɖoa nyi èkplɔ̃ kèwo wo sɔ èkpe sɔ kpàa. Wo ɖo dìdimè ku kèkemè ɖèka. Wo kèkè àbɔglìgo ɖèka ku mamãmè eye wo kɔkɔ àbɔglìgo ɖèka. Wo sɔna ènu kèwo wo la zã sɔ jrà èlãwo ɖoa, dà ɖo woa ji.

⁴³Wo ɖè èsìmɔvi trɛlɛwo trɔ do èkplɔ̃awo. Èsìmɔvi kèawo xɔ̀ àlɔ̀ be kèkemè. Wo sɔna vɔsa be èlãwo dànà ɖo èkplɔ̃awo ji.

⁴⁴Ŋusùa kplɔ̀ mù yì xixenu kè lè àdɔ̀mèa. Funu ye èhàjìtɔwo be èxɔ̀wo lè: ɖèka lè èxɔ̀mɔnu kè lè èvègoa be àkpa ɖèka, eye e hũ ɖoɖa àpùgo. Èvègɔ̃a lè èxɔ̀mɔnu kè lè àpùgoa eye e hũ ɖoɖa èvègo.

⁴⁵E gblɔ̃ na mù be: “Èxɔ̀ kè hũ ɖoɖa àpùgoa, nyi hũbonɔ kèwo sumɔna lè mawuxɔa mèa tɔ̀.

⁴⁶Èxɔ̀ kè hũ ɖoɖa èvègoa, nyi hũbonɔ kèwo sumɔna lè vɔsakpea ŋutia tɔ̀. Lè Levìviwo dòmèa, Sadɔk be èvi ŋusùwo kpò ye la teŋu yì sumɔ Tɔhonɔ̀ lè tèpe kɔ̀kɔ̀ɛa.”

⁴⁷Ŋusùa jije xixenu kè lè àdɔ̀mèa. E ɖo dìdimè ku kèkemè ɖèka eye e xɔ̀ àbɔglìgo èkà èvè takpo. Vɔsakpea lè mawuxɔa be ŋùkɔ̀;

⁴⁸E kplɔ̀ mù ɖo mawuxɔa be àkpàtaa mè. E jije èmɔ̃ kè yì funua. Yebe èglìawo kèkè àbɔglìgo àtɔ̃ eye yebe èmɔ̃anu kèkè àbɔglìgo woènè. Èglì kè lè àxàdamèa kèkè àbɔglìgo ètɔ̃.

⁴⁹Àkpàta kè lè èxɔ̀a mɔnua dìdì àbɔglìgo èwì gbà kèkè àbɔglìgo woèvè. Àcrɔkpe be àfɔ̀ɖèɖe èwo ye yìnà e mè. Pilà ɖèka lè àkpa ɖe sia ɖe lè èxɔ̀a be èmɔ̃nu.