Read gen Ezekìɛl 42 Bible Online

Ezekìɛl 42 - gen bible

Ezekìɛl 42

¹E yomè a, ŋusùa gbà kplɔ̀ mù yì xixenu kè lè e godoa, be èvègo. E kplɔ̀ mù yì mawuxɔa be ŋùgbedòmè, tùtà èxɔ̀ kèwo jè ŋùkɔ̀ tèpe gbàjàa kudo èxɔ̀ kè lè funua.

²Èxɔ̀ kèa, kè lè èvègoa dìdì àbɔglìgo èkà èvè takpo eye e kèkè àbɔglìgo èkà ci èwo.

³Lè àkpa ɖèkaa, èxɔ̀a jè ŋùkɔ̀ tèpe gbàjà kè trɔdo mawuxɔa. E kèkè àbɔglìgo èwì. Lè àkpa èvègɔ̃a, e yì kɔ̀ ɖo tèpe dodo kè lè xixea nua. E ɖo èdɔ̃viwo lè àsãŋu ètɔ̃awo ji.

⁴Lè èxɔ̀awo be ŋùkɔ̀, lè xixenu kè lè àdɔ̀mèa, èmɔ̃ ɖe lè kè kèkè àbɔglìgo èwo eye e dìdì àbɔglìgo èkà èvè takpo. Wo tona èvègo yìnà èxɔ̀ kèa mè.

⁵Èxɔ̀ kèwo lè àsãŋu ètɔ̃gɔ̃a jia, hùe sɔ wu àsãŋu kpɔ̀tɛawo tɔ̀. Nyàwoa, èmɔ̃ kèwo to èxɔ̀awo dòmè lè àsãŋu ètɔ̃gɔ̃a jia kèkè wu àsãŋu kpɔ̀tɛawo tɔ̀.

⁶Ɛ̃ɛ, èxɔ̀a lè àgbàkà àlo àsãŋu ètɔ̃, vɔ̀a sɔtì ɖekpekpe mu le wo ɖotè ò. Ekèa ŋuti ye ne wò le yì èjia, èxɔ̀awo le hùe ɖo ji.

⁷Lè xixenu kè lè e godoa, èglìkpa kè zɔ̃ ku èxɔ̀awo èdu èdua, dìdì àbɔglìgo èkà ci èwo.

⁸Èxɔ̀awo ŋutɔ dìdì àbɔglìgo èkà ci èwo. Vɔ̀a, èxɔ̀ kèwo hũ jè mawuxɔa gbɔa, dìdì àbɔglìgo èkà èvè takpo.

⁹Lè èxɔ̀ ŋuawo be gɔ̃mè, lè èwèzɛ̃pe lɔ̀gea, èxɔ̀mɔnu ɖe lè funu na àmè kèwo la so xixenu kè lè e godoa, la va.

¹⁰Èxɔ̀mɔnu ŋua lè fikè xixenu be èglìa jè e gɔ̃mè soa. Lè àpùgoa, èxɔ̀ buwo gbà lè. Wo jè ŋùkɔ̀ tèpe gbàjàa ku èxɔ̀ kè lè mawuxɔa be ŋùgbedòmèa.

¹¹Lè èxɔ̀ kèawo be ŋùkɔ̀a, èmɔ̃ ɖe lè. Èxɔ̀ kèawo dìdì gbà kèkè sìgbè èvègo be èxɔ̀awo ke nène. Woabe toto ku woa mè ɖoɖo kudo ènuawo kpata nyi ɖèka ŋùkumè.

¹²Nène a pɛpɛ be lè na èxɔ̀ kèwo lè àpùgoa be èxɔ̀mɔnuawo cã. Lè èmɔ̃anu be gɔ̃mè jèjea, èmɔ̃nu ɖe lè jè ŋùkɔ̀ èglì kè le nyi àkpoxɔ̀nu na tèpe kɔ̀kɔ̀ɛa. Wo la to èwèzɛ̃pe sɔ yì.

¹³Ŋusùa gblɔ̃ na mù be: “Èxɔ̀ kèwo lè èvègo ku àpùgo eye wo hũ ɖo xixenua, nyi èxɔ̀ ɖè ɖovò na Mawu. Hũbonɔ kèwo la teŋu yì tèpe kɔ̀kɔ̀ɛa, ɖùnà ènu kèwo ye wo sɔ savɔa lè èxɔ̀ ŋuawo mè. Nyàwoa, funu ye wo lɔna vɔsa be ènu kɔ̀kɔ̀ɛ kèwo wo sɔ savɔ na Mawu a ɖo: ènunanawo ku vɔsa be èlã vòvò kèwo wo sɔ va la biɔ Mawu be ŋuzĩzĩkukua, ɖo tèpe kè kɔ̀a.

¹⁴Wu ekèa, hũbonɔ kèwo gɛ̃ ɖo tèpe kɔ̀kɔ̀ɛa, wo mu la teŋu yì xixenu kè lè e godoa trolo lè toto mè ò. Wo ɖo la yì ɖè woabe àwù kèwo wo do sɔ wɔ̀dɔ lè Mawu be ŋùkɔ̀a ɖo funu gbɔ̀xue. Wo la ɖɔ̀lì àwù bu lè funu, gbɔ̀xue la to yì àmèhaa be ègòdope.”

¹⁵Wàlɛbɛ kè ŋusùa ɖo àsi tè na mawuxɔa mè be èxɔ̀awo be jijea, e kplɔ̀ mù to èxɔ̀mɔnu kè lè èwèzɛ̃pea. Eye e tɔ tèpe kè trɔdo mawuxɔa, be jijewo xɔ̀xɔ.

¹⁶Kudo jijekaa, e kpɔ dìdimè àbɔglìgo àlɔ̀ àtɔ̃ lè èwèzɛ̃pe.

¹⁷E jije èvègo, eye e kpɔ dìdimè àbɔglìgo àlɔ̀ àtɔ̃.

¹⁸E jije àkpa kè lè àpùgoa, e kpɔ dìdimè àbɔglìgo àlɔ̀ àtɔ̃.

¹⁹E trɔ ɖoɖa èwèɖoxɔ̀pe, e jije è eye e kpɔ dìdimè àbɔglìgo àlɔ̀ àtɔ̃.

²⁰E jije èglì kè trɔdo mawuxɔa, lè àkpa ènèawo kpata. Èglìa ɖo dìdimè ku kèkemè ɖèka, wo xɔ̀ metà àlɔ̀ àtɔ̃. Èglì kèa ma tèpe kè kɔ̀a lè tèpe kè mu kɔ̀ òa gbɔ.