Read gen Ezekìɛl 43 Bible Online

Ezekìɛl 43 - gen bible

Ezekìɛl 43

¹Ŋusùa kplɔ̀ mù le yì èxɔ̀mɔnu kè lè mawuxɔa be èwèzɛ̃pea gbɔ.

²Eye mù kpɔ Izràɛl be Mawu a be gogo. E va so èwèzɛ̃pe. Zĩzĩ kè be le wɔ̀a, ɖì àpù be àdãwɔ̀wɔ. Eye e kɔ̀ ànyigbã a ku yebe kɔ̀kɔ̀ɛa[18].

³Ènu kè mù kpɔa, ɖì ènu kè mù kpɔ va yì sã, wàlɛbɛ kè Tɔhonɔ̀ va crɔ̃ Yèruzàlɛm be èdùa. Nène a, mù jèklò, sɔ ŋùkumè cɔ̃ ànyi.

⁴Tɔhonɔ̀ be gogoa gɛ̃ ɖo mawuxɔa mè to èxɔ̀mɔnu kè lè èwèzɛ̃pea.

⁵Mawu be gbɔ̃gbɔ̃a kɔ mù lè ànyigbã a, eye be kplɔ̀ mù yì xixenu kè lè àdɔ̀mèa. Mù kpɔ be Tɔhonɔ̀ be gogoa, ɖɔ mawuxɔa keŋu.

⁶Mù sè ègbè ɖe ɖì so mawuxɔa mè. Wàlɛbɛ ŋua, ŋusù kè le kplɔ̀ mù a lè àhàdamè na mù.

⁷Ègbèa gblɔ̃ na mù be: “Èwò àgbètɔ be èvi, ɖoto sè! Fikèa nyi àpe fìɔzìkpe be nɔ̀pe, tèpe kè mù ɖona àfɔ̀a. Mù la sò nɔ̀pe ɖo Izràɛlviwo dòmè kaka yì. Izràɛl be dùkɔ̃a kudo yebe èfìɔwo mu la gbà pòɖi àpe nyikɔ kɔ̀kɔ̀ɛa kpɔ, to àhasì wɔ̀wɔ kudo woabe èfìɔwo ɖìɖi ɖo fikèa ò.

⁸Èfìɔawo yì ɖì woabe èxɔ̀mɔnuwo kudo hɔ̃trumètiwo ɖo tɔ̀nyèawo gbɔ tututu. Eye èglì ɖèka kpò ye ma mawuxɔ nyèa kudo woabe àxuea dòmè. Wo pòɖi àpe nyikɔ kɔ̀kɔ̀ɛa. Nyàwoa, wo wɔ̀ ènu dakà sùgbɔ. Ekèa ŋuti ye mù crɔ̃ wo ɖo lè àpe àdɔ̀mèzea mè.

⁹Fifìa, wo la ɖè woabe àhasìwɔ̀wɔa kudo woabe èfìɔwo be àmèkpòtiwo jo boo lè gbɔ nyè. Eye mù la kpɔ̀tɔ̀ sò nɔ̀pe ɖo woa dòmè kaka yì.

¹⁰Na èwò àgbètɔ be èvi yaa, gblɔ̃ mawuxɔa be ènyà na Izràɛlviwo. Èŋù ne kpɛ̃ wo, ɖo woabe àgɔ̀jèjewo ŋuti eye woa le ŋùku ɖo èxɔ̀ kèa be tata ŋuti nyuɛ̃ ɖe!

¹¹Ne wo titɔ ɖo ènu kèwo wo wɔ̀a ŋutia, sɔ mawuxɔa be nɔ̀nɔmè fiɔ wo, yebe ɖoɖowo, yebe èxɔ̀mɔnuwo lè e mè ɖoɖo ku toto, yebe tatawo kpata. Wò la ŋlɔ̀ èseawo ku ɖoɖowo gbà sɔ wo ɖo woabe ŋùkuwo mè, ne woa wɔ̀ ɖo woa ji lè tèpe kèa. Nène a, wo la sɔ wo do èdɔwɔ̀wɔ mè.

¹²Ekèa ye nyi mawuxɔa be èsea. Tèpe kèwo trɔdo mawuxɔa, lè ètoa be ètamèa, nyi tèpe kɔ̀kɔ̀ɛwo.”

¹³Ekèawo ye nyi vɔsakpea be jijewo zɔ̃ ɖo jijenu xoxoa ji. Èdo kè trɔdo vɔsakpea, yì ègũ àbɔglìgo ɖèka, gbà kèkè àbɔglìgo ɖèka. Lè e godoa, èdoa be ètomè yì ji àbɔglìgo mamãmè. Kpɔɖa, vɔsakpea be jiyìyi ye kè:

¹⁴So kaka ànyigbã a, lè yebe dodoea jia, vɔsakpea yì ji àbɔglìgo èvè, yì kɔ̀ ɖo gɔ̃mèɖonu cucugbã kè ji be nɔ̀ lè gɔ̃mèa ji. Gɔ̃mèɖonu kèa be àkpawo kpata hùe àbɔglìgo ɖèka lè gɔ̃mèa gbɔ. Lè gɔ̃mèɖonu cucugbã kèa be ètamèa, gɔ̃mèɖonu bu gbà lè kè dìdì àbɔglìgo ènèa. Yebe àkpawo kpata hùe àbɔglìgo ɖèka lè gɔ̃mèɖonu cucugbãa gbɔ.

¹⁵Lè gɔ̃mèɖonu èvègɔ̃ kèa be ètamèa, àdòkpo lè. Àdòkpo kèa yì ji àbɔglìgo ènè eye wo kɔ yebe ètomè ènèawo yì ji.

¹⁶Àdòkpoa ɖo jijemè ɖèka. Yebe dìdimè ku kèkemè nyi àbɔglìgo woèvè.

¹⁷Gɔ̃mèɖonu èvègɔ̃a cã ɖo dìdimè ku kèkemè ɖèka. Yebe jije nyi àbɔglìgo woènè. Lè e godoa, yebe ètomè yì ji àbɔglìgo mamãmè. Wo kù èdo vi ɖe kè kèkè àbɔglìgo ɖèkaa, trɔdo è gòdò. Gbɔ̀xue wo la yì gɔ̃mèɖonu kèa gbɔa, wo la lia àcrɔkpewo lè èwèzɛ̃pe.

¹⁸Ŋusùa gblɔ̃ na mù be: “Èwò àgbètɔ be èvi, ɖoto sè ègbè kè Tɔhonɔ̀ Mawu le do àsi na wòa: Ekèawo nyi ɖoɖo kèwo wo la wɔ̀ gbè kè gbè wo la tù vɔsakpea eye wo la wɔ̀ ènumème vɔ̀sawo lè e ji, la kɔ̀ èlãwo be èhũ ɖo jia:

¹⁹Wò la na ènyì-su ɖèka Hũbonɔ ku Levì kèwo so Sadɔk be xòmè. Woawo ɖèka kpò ye la teŋu va àpe ŋùkɔ̀ la sumɔ mù. Ènyè Tɔhonɔ̀ Mawu ye gblɔ̃ ɛ̀. Wo la sɔ ɛ̀ wɔ̀ vɔsa na sɔsɔkè.

²⁰Wò la kù lè yebe èhũ mè, sɔ tɔ vɔsakpea be àzò ènèawo ji, gbà wɔ̀ ɛ̀ na kɔ̃nà ènèawo, na gɔ̃mèɖonu èvègɔ̃a kudo ètomè kè trɔdo ɛ̀a cã. Nène a ye wò la kɔ̀ vɔsakpea ŋuti eye wò la ɖè è ɖovò.

²¹E yomè a, wò la na wo la kɔ ènyì-sua jo, eye wo la yì tɔ ɛ̀ èzò lè tèpe kè wo ɖo ɖɛa, tovò na tèpe kɔ̀kɔ̀ɛa.

²²Ŋùkèkè èvègɔ̃a gbèa, wò la sɔ gbɔgbɔɛ ɖèka kè mu ɖo xaxa ɖe òa. Wò la sɔ ɛ̀ cã wɔ̀ vɔsa na sɔsɔkè. Wò la kɔ̀ vɔsakpea ŋuti sìgbè lekè wò wɔ̀ ɛ̀ kudo ènyì-sua ke nène.

²³Wàlɛbɛ kè wò la wu vɔsa kèa nua, wò la sɔ ènyì-su ɖèka ku àgbò ɖèka kèwo mu ɖo xaxa ɖe òa.

²⁴Eye wò la kplɔ̀ wo va ŋùkɔ̀ na Tɔhonɔ̀. Hũbonɔwo la kɔ̀ èjè ɖo woa ji eye wo la sɔ wo wɔ̀ ènumème vɔsa na mù.

²⁵Gbè sia gbè kaka na kuasiɖa ɖèkaa, wo la nɔ wɔ̀ vɔsa ku gbɔgbɔɛ ɖèka na sɔsɔkè, eye wo la nɔ sɔ ènyì-su ɖèka ku àgbò ɖèka kèwo ŋuti kɔ̀a, wɔ̀ vɔsa na mù.

²⁶Nène a ye lè ŋùkèkè adrɛ̃ sɔ̃ŋua, wo la kɔ̀ vɔsakpea ŋuti gbà ɖè è ɖovò na yebe zãzã.

²⁷Ne kuasiɖaa va yì vɔ̀a, ŋùkèkè ènyigɔ̃a mè sɔ yìa, hũbonɔawo la teŋu yì wɔ̀ dùkɔ̃a be ènumème vɔ̀sawo ku ènunana vɔ̀sawo. Nène a, mù la ɖè àdɔ̀mè nyuɛ̃ nyèa fiɔ mì. Ènyà kè Tɔhonɔ̀ Mawu gblɔ̃a yeŋu.”