Read gen Ezekìɛl 44 Bible Online

Ezekìɛl 44 - gen bible

Ezekìɛl 44

¹Ŋusùa gbà trɔ kplɔ̀ mù gbɔ̀ va èxɔ̀mɔnu kè lè e godo lè tèpe kɔ̀kɔ̀ɛa be èwèzɛ̃pe lɔ̀gea. Hɔ̃tru a lè tutu.

²Tɔhonɔ̀ gblɔ̃ na mù be: “Èxɔ̀mɔnu kèa la nɔ nɔ̀ tutu, àmè ɖekpe mu la hũ ì ò. Àmè ɖekpe mu la to funu ò, ɖo ènyè Tɔhonɔ̀ Izràɛl be Mawu a, mù to funu ɖo èxɔ̀a mè. Ekèa ŋuti e ɖo la nɔ̀ tutu.

³Vɔ̀a, èfìɔvia la teŋu nɔ̀ ànyi ɖo funu, sɔ ɖù ènuɖùɖu kɔ̀kɔ̀ɛa lè ŋùkɔ̀ na mù. Ɖo e ye le kplɔ̀ èdùa. Ne bèa sɔ yì funu kudo yebe totoa, e la to èxɔ̀ kè lè èxɔ̀amɔnu gbɔa mè.”

⁴Eye ŋusùa kplɔ̀ mù to èxɔ̀mɔnu kè lè èvègoa kaka yì mawuxɔa be ŋùkɔ̀. Mù ɖè ŋùku eye mù kpɔ Tɔhonɔ̀ be gogo ɖɔ mawuxɔa. Mù jè èklò eye mù sɔ ŋùkumè cɔ̃ ànyi.

⁵Eye Tɔhonɔ̀ gblɔ̃ na mù be: “Èwò àgbètɔ be èvi, kè èto ne wòa hũ ŋùkuvi ne wòa le ŋùku ɖo e ŋuti. Sè ènyà kè mù la gblɔ̃ na wò so mawuxɔa be èse ku ɖoɖowo ŋutia. Le ŋùku ɖo ekèwo kã tèpe kɔ̀kɔ̀ɛa mè be ɖoɖo kudo totoawo ŋuti nyuɛ̃ ɖe.

⁶Wò la gblɔ̃ ènyà kè ènyè Tɔhonɔ̀ Mawu, mù gblɔ̃a na Izràɛlvi, èkãsĩtɔ ŋuawo be: Mìa Izràɛlviwo be ènu dakà kèwo mì le wɔ̀a, tìkɔ̀ na mù. E sù nènea.

⁷Wàlɛbɛ kè tutu ye mì le sɔ ènuɖùɖu be tèpe kè mù jinaa, àmì kudo èhũ, dà ɖo ŋùkɔ̀ na mù a, ke ye mì le kplɔ̀ àmèjro, èvo mà-sòtɔwo va nɔ̀pe kɔ̀kɔ̀ɛ nyèa. Ekèa nyi èvlodonu.

⁸Mìa ŋutɔ mì mu ji la sumɔ mù lè àpe Nɔ̀pe Kɔ̀kɔ̀ɛ ò, vɔ̀a, mì sɔ èdɔa do àsi na àmèjrovi kèawo.

⁹Ènyè Tɔhonɔ̀ Mawu, mù gblɔ̃ be: àmèjrovi, èvo mà-sòtɔ kè mu le bù mù òa, ɖekpe mu la gɛ̃ ɖo àpe Nɔ̀pe Kɔ̀kɔ̀ɛ, ne e gbà lè Izràɛlviwo dòmè ŋutɔ cã a ò.”

¹⁰“Na Levì kèwo ɖèkɔ̀ lè ŋuti nyè eye wo trɔ ŋùgbe do mù ku Izràɛlviwo va yì le sumɔ vòduwoa, wo la dro woabe àgɔ̀jèjewo be àgbã.

¹¹Lè àpe tèpe kɔ̀kɔ̀ɛa, wo la nɔ sumɔ mù sɔ nɔ ɖia mawuxɔa be èxɔ̀mɔwo nu, gbà sɔ wɔ̀ èdɔ vòvòvòwo. Wo la teŋu nɔ wù èlã kèwo wo la sɔ wɔ̀ vɔ̀sawo ku ènumème vɔ̀sawo. Wo la nɔ wɔ̀ èdɔ na dùkɔ̃a.

¹²Ɖo wo sumɔ lè vòduwo be ŋùkɔ̀ eye wo trɔ àfɔ̀klɛ̃nu na Izràɛl be àxuea. Ekèa ŋuti ènyè Tɔhonɔ̀ Mawu, mù le gblɔ̃ be: Mù la sitè ɖo woa ŋuti, eye wo la dro woabe àgɔ̀jèjewo be àgbã.

¹³Wo mu la dɔ̃ gogo mù kaka la va nyi àpe hũbonɔwo ò. Wo mu la dɔ̃ gogo àpe Nɔ̀pe Kɔ̀kɔ̀ɛ be ènuzãzãwo ò. Nène a ye wo la dro àgɔ̀ kèwo wo jèa, be àgbã.

¹⁴Mù la sɔ mawuxɔa mè be èdɔ viviwo kpò na wo. Funua ye wo la nɔ wɔ̀ èdɔ kè jèa lè.”

¹⁵“Vɔ̀a, Levì, hũbonɔ kèwo so Sadɔk be xòmè mè, kèwo nɔ̀ àpe sɛ̃sɛ̃a gɔ̃mè wàlɛbɛ kè Izràɛlviwo yì boo lè ŋùkɔ̀ na mù a, wo la va ŋùkɔ̀ na mù sɔ sumɔ. Wo la va ŋùkɔ̀ na mù ku vɔsalãwo be àmì kudo èhũ. Ènyè Tɔhonɔ̀ Mawu ye gblɔ̃ ɛ̀.

¹⁶Woawo ɖèka kpò ye la gɛ̃ ɖo àpe Nɔ̀pe Kɔ̀kɔ̀ɛ, la dɔ̃ gogo àpe èkplɔ̃ kè wo ɖè ɖovò na mù a. Eye wo la le ŋùku ɖo ɖoɖo kèwo mù na wo ɖo sɛ̃sɛ̃ nyèa ŋutia tututu.

¹⁷Gbɔ̀xue wo la to xixenu kèwo lè àdɔ̀mèa be èxɔ̀mɔnuwoa, wo la do àlɛ̃ŋudà be àwù. Ègbɔfu be àwù ɖekpe mu la nɔ̀ woa ŋuti gbɔ̀xue wo la yì sumɔ lè mawuxɔa ku xixenu àdɔ̀mètɔ̀a mè ò.

¹⁸Wo la bla èta ku àlɛ̃ŋudà be àvɔ eye wo la nɔ̀ àlɛ̃ŋudà be àtakpoewo mè. Wo mu la bla ègo ji ne woa va nɔ jè àde ò.

¹⁹Ne wo trɔ yì xixenu kè lè àdɔ̀mè, fikè dùkɔ̃a bɔ̀nà lèa, wo la ɖè àlɛ̃ŋudà be àwù kèwo wo do sɔ wɔ̀ sɛ̃sɛ̃a gbɔ̀xue. Wo la sɔ wo dà ɖo tèpe kɔ̀kɔ̀ɛa be èxɔ̀wo mè eye wo la trɔ do àwù buwo. Nène a, dùkɔ̃a mu la kpɔ èmɔ̃ sɔ tɔ àsi woabe èɖɛ̀wuwo ò.

²⁰Hũbonɔwo mu ɖo la plɔ èta ò. Wo mu la tàsi woabe èɖà cã la to sùgbɔ ò, vɔ̀a, wo la nɔ kpà woabe èɖà ɖo àmèhùenu.

²¹Hũbonɔ ɖekpe mu la nù vɛ̃ wàlɛbɛ kè be le yì xixenu kè lè àdɔ̀mèa ò.

²²Hũbonɔwo mu la ɖè nyɔ̃nù àhòsì àlo nyɔ̃nù kè wo gbea ò. Wo la ɖè Izràɛl be nyɔ̃nù tùgbɛ̀jɛvi, àlo hũbonɔ bu be àhòsì.

²³Hũbonɔwo la fiɔ dùkɔ̃a vòvòtoto kè lè ènu ɖè ɖovò ku ènu gbalo dòmè, ènu kè nyi kɔ̀kɔ̀ɛ kudo ekè mu lè kɔ̀kɔ̀ɛ òa.

²⁴Ne màsɔ̀ màsɔ vaa, wo la ɖokòjo zɔ̃ ɖo jɔ̀jɔɛ nyèwo ji. Wo la kpɔ èse ku ɖoɖo nyèwo ji. Eye wo la wɔ̀ jɛ̃gbɔ̃zã nyèa kɔ̀kɔ̀ɛ.

²⁵Hũbonɔ ɖekpe mu la gogo àmèkuku ò, mu nyi nène òa, e la pòɖi ye ɖokoe. Mu la pòɖi ye ɖokoe ɖo ètɔa, ènɔa, èvia ŋusù, èvia nyɔ̃nù, nɔ̀via ŋusù àlo nyɔ̃nù kè mu kpɔ ɖèsrɔ̃ òa ŋuti ò.

²⁶Ne ekèa va e mèa, e la kɔ̀ ye ɖokoe ŋuti eye e la nɔ̀ ànyi ŋùkèkè adrɛ̃ gbɔ̀xue la gbà yì yebe èdɔa ji.

²⁷Gbè kè gbè e la trɔ yì tèpe kɔ̀kɔ̀ɛa be xixenu kè lè àdɔ̀mèa, e la wɔ̀ yebe vɔsa na sɔsɔkè. Ènyè Tɔhonɔ̀ Mawu ye ɖo è ɖɛ.

²⁸Ènyè ŋutɔ ye nyi hũbonɔwo be ècrɔ̃nu. Wo la nɔ sumɔ mù. Wo mu ɖo ècrɔ̃nu ɖekpe lè Izràɛl nyigbã ji tovò lè ŋuti nyè ò.

²⁹Àgblèmè be ènunanawo kudo èlã kèwo wo sɔ wɔ̀ vɔsa na sɔsɔkèa ye nyi woabe ènuɖùɖu. Ènu kèwo kpata wo la ɖè ɖovò na mù lè Izràɛl nyigbã jia, la nyi woabe ènuɖùɖu.

³⁰Hũbonɔwo la xɔ̀ àgblèmè be ènuku cucugbãawo kudo ènu kèwo kpata wo ɖè lè Izràɛlviwo be àdɔ̀kùnuwo mèa. Mì la na wo mìabe èwɔ nyuɛ̃wo ne sìtu nyèa ne nɔ̀ mìa ji.

³¹Vɔ̀a, hũbonɔwo mu la ɖù èxè kudo èlã kè ŋutɔ kua àlo èlã kè ègbemèlã ɖe wùa ò.”