Read gen Ezekìɛl 45 Bible Online

Ezekìɛl 45 - gen bible

Ezekìɛl 45

¹“Wàlɛbɛ kè wo la ma ècrɔ̃ nyigbãa ɖo kɔ̀tawo nua, mì la ɖè ànyigbã be àkpa ɖe ɖovò na Tɔhonɔ̀. Àkpa kèa la dìdì àbɔglìgo hotu woèvè èkà èwì vɔ àtɔ̃ eye e la kèkè àbɔglìgo hotu èwo. E la nyi tèpe kɔ̀kɔ blibo lè ànyigbã a kpata ji.

²Lè ànyigbã kèa jia, wo la ɖè àkpa ɖe kè la ɖo dìdimè ku kèkemè àbɔglìgo àlɔ̀ àtɔ̃, eye tèpe vi bu kè kèkè àbɔglìgo èkà ci èwo la trɔ do èa, ɖovò.

³Lè ànyigbã ŋua jia, wo la ɖè tèpe ɖe kè la dìdì àbɔglìgo hotu woèvè èkà èwì vɔ àtɔ̃, la kèkè àbɔglìgo hotu àtɔ̃. Funua la nyi tèpe kɔ̀kɔ̀ɛa, kɔ̀kɔ̀ɛpewo be kɔ̀kɔ̀ɛpe.

⁴Ànyigbã a be tèpe kèa la nɔ̀ kɔ̀kɔ̀ɛ. Wo la ɖè è ɖovò na hũbonɔ kèwo le sumɔ Tɔhonɔ̀ lè tèpe kɔ̀kɔ̀ɛa. Wo la tù woabe àxuewo ɖo tèpe kèa, eye e la nyi ènu ɖè ɖovò na tèpe kɔ̀kɔ̀ɛa.

⁵Àkpa bu cã kè dìdì àbɔglìgo hotu woèvè èkà èwì vɔ àtɔ̃, la kèkè àbɔglìgo hotu àtɔ̃, la nyi Levì kèwo lè sumɔ lè mawuxɔa mèa tɔ̀. Funu ye wo la sò nɔ̀pe ɖo, la nɔ̀ wo mè.

⁶Lè ànyigbã kè wo ɖè ɖovò na Tɔhonɔ̀ trɔdoa mèa, wo la gbà ɖè tèpe bu kè ɖo dìdimè àbɔglìgo hotu woèvɛ̀ èkà èwì vɔ àtɔ̃ ku kèkemè àbɔglìgo hotu èvè èkà èwì vɔ àtɔ̃a ɖɛ. Wo la tù nɔ̀pe kè Izràɛlvi ɖekpekpe la teŋu va nɔ̀a, ɖo funu.

⁷Na èfìɔvia, mì la jrà tèpe ɖe ɖo lè ànyigbã be àkpa èvèa, na Tɔhonɔ̀ kudo èdùa. Ànyigbã kè la so lè èwèɖoxɔ̀pe kaka yì àpù gãa gbɔ eye lè èwèzɛ̃pea kaka yì Izràɛl be lipòa gbɔ.

⁸Nène a ye èfìɔviwo la ɖo woa ŋutɔwo be nɔ̀pe lè Izràɛl. Wo mu la gbà sɔ woa ɖokoe tɛ ɖo dùkɔ̃a ji ò, vɔ̀a, wo la tàsi ànyigbã kpɔ̀tɛa na Izràɛl be kɔ̀tawo.”

⁹Nène a ye Tɔhonɔ̀ Mawu gblɔ̃ be: “Izràɛl be èfìɔviwo, e sù na mì! Mì jìjɔ hũnyànyrã ku àmèwo be ènu hàhla! Mì kpɔ èsewo ku jɔ̀jɔɛsòso ji. Mì nɔ̀tè dùkɔ̃ nyèa fìfĩ. Ènyè Tɔhonɔ̀ ye gblɔ̃ ɛ̀.

¹⁰Àmè sia àmè ne nɔ zã ènudànu kudo jijenu jɔ̀jɔɛwo.

¹¹Jijegbã na àgblèmènukuwo eye jijenu na èsì be ènuwo, wo ɖo woabe àsìxɔ̀xɔwo lè jɔ̀jɔ̀ɛ a nu.

¹²Klòsalò ga ɖèka la xɔ̀ biyèvi ènè, eye biyèvi woèvèa la wɔ̀ Mnà ɖèka[19].

¹³Mì la nɔ ɖè mìabe ènunanawo lè nɔ̀nɔmè kèa mè: Mì la na èlù ku èbli be àkpa àdɛ̃ lè èwo mè,

¹⁴kudo àmì àkpa ɖèka lè èkà èvè takpo mè. Mì la jije àmì kudo jijenu àlo lità. E nyi àkpa ɖèka na lità èwo àlo gàlɔ̀n.

¹⁵Kpɔ̀tɛa ye nyi be lè àgblètaa, mì la sɔ èlã ɖèka lè ègbɔ èkà èvè takpo mè. Eye mì la sɔ ènu kè mì cã a, sɔ yì wɔ̀ vɔsa na àgblèmènuku ku ènumème kudo ègbèkplimè be vɔsa sɔ kpɔ èvuɛ̃ be sɔsɔkè. Ènyè Tɔhonɔ̀ Mawu ye gblɔ̃ ɛ̀.

¹⁶Èdùmèviwo kpata ɖo la hɛ̃ woabe ènunana kèa va na Izràɛl be èfìɔvia.

¹⁷Nyàwoa, èfìɔvia ye la nɔ ji ènumème, ènunana kudo àkpedodo be vɔsanuwo na lè àzã vòvòvòwo ji, sìgbè wètri yeye, jɛ̃gbɔ̃zã kudo gòdodo vòvòvòwo be jìjɔɛ kpɔkpɔwo be gàmè. E la nɔ wɔ̀ vɔsa na èvuɛ̃ sɔsɔkè, àgblèmènukuwo be nana, ènumème kudo ŋuti fàfa be vɔ̀sawo na Izràɛl be àxuea be ŋutikɔ̀kɔ.”

¹⁸Nène a ye Tɔhonɔ̀ Mawu gbà gblɔ̃ be: Wètri cucugbãa be ŋùkèkè cucugbãa, mì la wɔ̀ vɔsa kudo ènyì-suvi mà-ɖo xaxa ɖe, sɔ kɔ̀ tèpe kɔ̀kɔ̀ɛa ŋuti.

¹⁹Hũbonɔa la sɔ ènyì-suvia be èhũa eye e la sì ì ɖo mawuxɔa be èxɔ̀mɔnu be àtiawo, vɔsakpea be àzò ènèawo kudo xixenu kè lè àdɔ̀mèa be èxɔ̀mɔnuawo ŋuti.

²⁰Lè wètria be ŋùkèkè adrɛ̃gɔ̃ a gbèa, wò la gbà wɔ̀ vɔsa ŋua ke sɔ kɔ̀ àmè kè wɔ̀ èvuɛ̃ wàlɛbɛ kè mu ji òa, àlo wɔ̀ ɛ̀ lè mànya mèa be ŋuti kɔ̀kɔ. Nène a ye mì la wɔ̀ sɔ kɔ̀ mawuxɔa ŋuti.

²¹“Lè wètria be ŋùkèkè woènègɔ̃a gbèa, mì la tɔ toŋutivayì be àzãa ɖùɖu. Mì la ɖù ì ŋùkèkè adrɛ̃ sɔ̃ŋu kèwo mè mì la ɖù kpɔ̃nɔ àkpiti.

²²Lè ŋùkèkè cucugbã gbèa, èfìɔvia la wɔ̀ vɔsa ku ènyì-su ɖèka na ye ŋutɔ kudo dùkɔ̃a be èvuɛ̃ sɔsɔkè.

²³Wu ekèa, lè ŋùkèkè adrɛ̃awo mèa, wo la wù ènyì-su adrɛ̃ ku àgbò adrɛ̃ gbè sia gbè. Wo la gbà nɔ wɔ̀ vɔsa ku gbɔgbɔɛ ɖèka lè àzãwo ji na sɔsɔkè. Èlã kèawo mu la ɖo xaxa ɖekpe ò.

²⁴Mɛmlɛ̃a, e la sɔ èlù kìlo ègbã ku àmì lità àdɛ̃ bɔ̀ ɖo ènyì-su kudo gbɔgbɔɛ ɖe sia ɖe ŋuti na vɔ̀sawo be wɔ̀wɔ.

²⁵Na Bègloewo be àzã, kè wo ɖùnà so wètri adrɛ̃gɔ̃ a be ŋùkèkè woeàtɔ̃gɔ̃a gbèa, èfìɔvia la wɔ̀ vɔsa ɖèka ŋùkumè sìgbè lekè wo wɔ̀nà lè toŋutivayì be àzãa ji nène: wo la nɔ wɔ̀ vɔsa gbè sia gbè tɔ̀ na sɔsɔkè, ènumème vɔsa kudo èlù ku àmì be ènunanawo, kaka na ŋùkèkè adrɛ̃ sɔ̃ŋu.”