Read gen Ezekìɛl 46 Bible Online

Ezekìɛl 46 - gen bible

Ezekìɛl 46

¹Nène a ye Tɔhonɔ̀ Mawu gblɔ̃ be: “Xixenu kè lè àdɔ̀mèa be èxɔ̀mɔnu kè lè èwèzɛ̃pea, la nɔ̀ tutu lè ŋùkèkè àdɛ̃ kèwo mè wo le wɔ̀ èdɔ lèa. Vɔ̀a, wo la hũ ì lè jɛ̃gbɔ̃zãa ku wètri yeye be àzãa gbè.

²Èfìɔvia la so xixenu kè lè e godoa eye e la to èxɔ̀ kè lè mawuxɔa gbɔa mè. Eye e la nɔ̀tè ɖo hũtrutia gbɔ wàlɛbɛ kè hũbonɔwo le wɔ̀ ènumème ku gbèkpli mè nɔ̀nɔ be vɔ̀sawo. E la jèklò sɔ ŋùkumè cɔ̃ ànyi lè èxɔ̀a mɔnu. E yomè a, e la to. Wo mu la tu èhɔ̃a kaka na fìɛ̃si ò.

³Nyàwoa, lè jɛ̃gbɔ̃zã ku wètri yeye be gàmèa, dùkɔ̃a la va bɔ̀ lè èxɔ̀mɔnu ŋua sɔ sumɔ ènyè Tɔhonɔ̀.

⁴“Lè jɛ̃gbɔ̃zã gbèa, èfìɔvia la hɛ̃ àlɛ̃vi àdɛ̃ ku àgbò ɖèka kèwo ŋuti kɔ̀a, va ne woa sɔ wɔ̀ ènumème vɔsa.

⁵Wu ekèa, e la na èlù kìlo ègbã bɔ̀ ɖo àgbò ku ènyì-su ɖe sia ɖe ŋuti. E la gbà na èlù kè jro èa, ne àlɛ̃viawo. E la sɔ àmì lità àdɛ̃ bɔ̀ ɖo èlù kìlo ègbã ŋuti.

⁶Lè wètri yeye gbèa, e la na ènyì-su ɖèka, àlɛ̃vi àdɛ̃ ku àgbò ɖèka. Èlãwo kpata ŋuti la kɔ̀.

⁷E la na èlù kìlo ègbã bɔ̀ ɖo ènyì-su kudo àgbò ɖe sia ɖe ŋuti. Eye e la gbà na èlù kè jro èa, ne àlɛ̃viawo. E la sɔ àmì lità àdɛ̃ bɔ̀ ɖo èlù kìlo ègbã ŋuti.

⁸Èxɔ̀mɔnu ɖèka kè èfìɔvia to vaa ke be la gbà to sɔ jo, eye e la to èxɔ̀ kè lè mawuxɔa be èxɔ̀mɔnu gbɔa mè va yì.

⁹Vɔ̀a, ne dùkɔ̃a la va sumɔ ènyè Tɔhonɔ̀ Mawu, lè àzã gãgãwo be gàmèa, àmè kèwo la to èxɔ̀mɔnu kè lè èvègo vaa, la trɔ to èxɔ̀mɔnu kè lè àpùgoa sɔ jo. Àmè kèwo to àpùgo be èxɔ̀mɔnu vaa, la trɔ to èvègo be èxɔ̀mɔnua jo. Àmè ɖekpe mu la trɔ to èxɔ̀mɔnu kè be to vaa, sɔ trɔ jo ò. Vɔ̀a àmè sia àmè la trɔ to èxɔ̀mɔnu kè kpã ŋùkɔ̀ fikè be to vaa, sɔ trɔ jo.

¹⁰Èfìɔvia cã la ɖo mawuxɔa mè ku dùkɔ̃a, eye e la gbà to kudo è ɖodu.”

¹¹“Lè àzã ɖùɖuwo kudo àzã tɔ̀xɛwo gbèa, wo la na èlù kìlo ègbã bɔ̀ ɖo àgbò ku ènyì-su ɖe sia ɖe ŋuti. E la gbà na èlù kè jro èa, ne àlɛ̃viawo. E la sɔ àmì lità àdɛ̃ bɔ̀ ɖo èlù kìlo ègbã ŋuti.

¹²Ne èfìɔvia jro la wɔ̀ ènunana fàa be vɔsa na Tɔhonɔ̀a, ne e nyi ènumème àlo gbèkpli gbèkpli be vɔsaa, wo ɖo la hũ èxɔ̀mɔnu kè lè àpùgoa na ɛ̀. E la wɔ̀ vɔsaa sìgbè lekè be wɔ̀nà ɛ̀ lè jɛ̃gbɔ̃zã gbèa nène. Kaka kè be la gbe to èxɔ̀mɔnu ŋua kpòa, wo la trɔ tu èhɔ̃a trolo.

¹³Gbè sia gbèa, wo la nɔ wɔ̀ ènumème vɔsa ku àlɛ̃vi mà-ɖo xaxa kè xɔ̀ èpè ɖèkaa, na Tɔhonɔ̀. Wo la nɔ wɔ̀ vɔsa kèa ŋùdekɛ̃nyɛ sia ŋùdekɛ̃nyɛ.

¹⁴Gà ŋua mè ke ye wo la sɔ èwɔ kìlo àtɔ̃ ku àmì lità èvè caka ɛ̀ na Tɔhonɔ̀. Ènu nana kèa be ɖoɖowo la nɔ̀ ànyi tɛ̀gbɛ̀.

¹⁵Ŋùdekɛ̃nyè sia ŋùdekɛ̃nyɛ̃a, wo la nɔ sɔ àlɛ̃vi, èwɔ ku àmì nɔ wɔ̀ ènumème be vɔsa na Tɔhonɔ̀. Ekèa la nɔ̀ ànyi tɛ̀gbɛ̀.”

¹⁶Ènyà kè Tɔhonɔ̀ Mawu gblɔ̃a ye nyi be: “Ne èfìɔvia sɔ yebe ànyigbã be àkpa ɖe na yebe èvi dòmètɔ ɖe a, ekèa la nyi ècrɔ̃nu na ɖèvia. Eye e la gbà nyi ècrɔ̃nu na yebe jìjimèviwo cã. Ècrɔ̃ be ànyigbã ye.

¹⁷Vɔ̀a, ne èfìɔvia sɔ yebe ànyigbã be àkpa ɖe na yebe sumɔ̃viwo dòmètɔ ɖe a, ènunana ŋua la nyi sumɔ̃via tɔ̀ kaka na vòvokpɔkpɔ be èpèa kpò[20]. Eye e yomè a, ènunana kèa la trɔ va na èfìɔvia. Èfìɔvi be èviwo kpò ye la kpɔ gomè lè èfìɔvia be ècrɔ̃nuwo mè.

¹⁸Tovò lè e ŋutia, Èfìɔvia mu la hlà dùkɔ̃mèvi ɖe be ànyigbã ò. Ye ŋutɔ be ènuwo ye la nyi èviawo be ècrɔ̃nu. Nène a, wo mu la nyà dùkɔ̃mèvi ɖe lè ye ŋutɔ be ànyigbã ji ò.”

¹⁹Ekèa yomè a, ŋusùa kplɔ̀ mù to èxɔ̀mɔnu kè lè èxɔ̀mɔnu kè lè èvègoa be àkpa ɖèka. E kplɔ̀ mù yì tèpe kɔ̀kɔ̀ɛa be èxɔ̀ kèwo wo ɖè ɖovò na hũbonɔwoa gbɔ. E sɔ tèpe ɖe fiɔ mù lè e mè ɖaa lè èwèɖoxɔ̀pe.

²⁰Eye e gblɔ̃ na mù be: “Kpɔ tèpe kè ye hũbonɔwo la nɔ ɖà èlã, kèwo wo sɔ wɔ̀ vɔsa na sɔsɔkèa, lè. Wo la gbà ɖà ènunanawo cã lè funu. Nène a, wo mu la ɖè ènu ɖekpekpe to yì xixenu kè lè e godo kaka la va na ye dùkɔ̃a la va tɔ àsi ènu kè lè kɔ̀kɔ̀ɛa ò[21].”

²¹E yomè a, e kplɔ̀ mù yì xixenu kè lè e godoa eye e kplɔ̀ mù to kɔ̃nà ènèawo ji. Eye xixenu vi ɖe lè kɔ̃nà ɖekpekpe mè.

²²Eye xixenu vi kèawo ɖo jijemè ɖèka. Wo ɖo dìdimè àbɔglìgo èkà, gbà kèkè àbɔglìgo ègbã.

²³Wo tɔ̃ èglìkpa trɔdo wo ɖèka-ɖèka eye wo li àdòkpowo ɖo èglìkpaa ŋuti keŋu.

²⁴Ŋusùa gblɔ̃ na mù be: “Àdòkpo kèawo ji ŋusù kèwo wo ɖè ɖovò na sumɔ̃vi be èdɔwo lè mawuxɔa mèa, la nɔ ɖà vɔsa be èlãwo lè.”