Read gen Ezekìɛl 47 Bible Online

Ezekìɛl 47 - gen bible

Ezekìɛl 47

¹Ŋusù kè le kplɔ̀ mùa, gbà trɔ kplɔ̀ mù va mawuxɔa be èmɔ̃nu. Mù kpɔ èsì le to lè ànyigbã a mè lè mawuxɔa be èmɔ̃nu gɔ̃mè lè èwèzɛ̃pe. Nyàwo ye e nyi be mawuxɔa be èmɔ̃nu lè èwèzɛ̃pe. Èsìa le srà lè mawuxɔa be àpùgo le yì vɔsakpea be àpùgo.

²Ŋusùa trɔ kplɔ̀ mù to lè mawuxɔa mè to èvègo be èxɔ̀mɔnua eye mi trɔdo xixenu kè lè e godoa kaka yì èxɔ̀mɔnu kè lè èwèzɛ̃pea. Èsìa le srà lè èxɔ̀mɔnu kèa be àpùgo.

³Wàlɛbɛ kè ŋusùa to le yì èwèzɛ̃pe lɔ̀gea, e le jijeka eye e jije àbɔglìgo àkpe ɖèka. E na mù to èsìa mè, eye èsìa va àfɔ̀kɔ̃ nyèwo ji.

⁴E gbà jije àbɔglìgo àkpe ɖèka eye e na mù zɔ̃ to èsìa mè: Èsìa va àpe èklòwo nu. Wàlɛbɛ kè e gbà jije àbɔglìgo àkpe ɖèka buwoa, e na mù zɔ̃ to èsìa mè. Fifìa, èsìa va àlìmè na mù.

⁵E gbà jije àbɔglìgo àkpe ɖèka buwo. Eye nyè mu gbà teŋu zɔ̃ to èsìa mè ò, ɖo e sùgbɔ gbà yì èto kaka be, ɖe kpò wo la pu ì gbɔ̀xue la sò è.

⁶Ŋusùa gblɔ̃ na mù be: “Èwò àgbètɔ be èvi, wò le kpɔa?” E kplɔ̀ mù yì ŋùkɔ̀ boo eye e trɔ kplɔ̀ mù va èsìa gbɔ.

⁷Eye mù kpɔ be àti sùgbɔwo lè èsìa be àgo èvèawo ji.

⁸Ŋusùa gblɔ̃ na mù be: “Èsì kèa le srà yì ànyigbã a be èwèzɛ̃pe, e tùtà Yɔrdàn be bàlìa mè eye e la yì kɔ̀ ɖo èjè be àpùa[22] mè. Ne e yì kɔ̀ ɖo àpùa mèa, e la trɔ yebe èsìa, wɔ̀ èsì nyuɛ̃.

⁹Àpùa be àkpa ɖekpekpe kè èsìa la yì kɔ̀ ɖoa, ènu àgbèagbèwo kpata la nɔ̀ funu eye wo la nɔ jì ɖoji. Èlã sùgbɔ la nɔ̀ e mè. Nyàwoa, èsì kèa va trɔ àpùa eye àgbè la va tèpe kèwo kpata ye èsì kèa va kɔ̀ ɖoa.

¹⁰Nène a, so Ɛ̃n-Gèdi kaka yì Ɛ̃n-Èglàim nyigbãa jia, ètɔ̀dɔwɔ̀tɔwo la nɔ̀ ànyi fuu eye wo la nɔ sia woabe èɖɔwo lè àpùata. Wo la kpɔ àpùmè be èlãwo kpata sìgbè lekè e lè Ànyigbãwo dòmè be àpùa mèa nène.

¹¹Co gãkea, ètãku kudo tɔ̀gba kèwo lè àpùa to yìa, mu la nɔ̀ kɔ̀kɔ̀ɛ ò. Wo la nyi èjè wlapewo.

¹²Lè àgo ɖekpekpea, àtikusɛ̃sɛ̃ be àti vòvòwo mìɔ̃. Woabe àmàkpawo mu la yrɔ̀ kpɔ ò, eye wo la nɔ na èkusɛ̃sɛ̃wo ɖo gàmè. Wètri ɖekpekpea, wo la nɔ na èkusɛ̃sɛ̃ ye yèwo, ɖo èsì kè le wu woa so tèpe kɔ̀kɔ̀ɛa. Wo la ɖù woabe èkusɛ̃sɛ̃wo eye àmàkpawo la nyi èdɔ̀dànuwo.”

¹³Ènyà kè Tɔhonɔ̀ Mawu gblɔ̃a ye kè: “Mù la ɖè ànyigbã a be lipò kèwo mì la ma na Izràɛl be kɔ̀ta woèvèawoa fiɔ mì. Yosɛ̀f be kɔ̀taa, la xɔ̀ àkpa èvè[23].

¹⁴Mì la ma ànyigbã ɖo ɖoɖonu. Nyàwoa, mù fìã ɛ̀ na mìa tɔgbewo. Eye e trɔ zũ mìabe ècrɔ̃nu.

¹⁵Lipò kè lè èvègoa, la so ànyigbãwo dòmè be àpùa gbɔ, la yì to Hɛltɔ̀, Lebò-Hamàt, Sedàd,

¹⁶e yomè a, e la to Bɛ̀rotà kudo Sìvràyim be èdù kèwo lè Dàmaskò kudo Hamàt be fìɔduwo, kudo Hasɛ̀r-Tikɔ̀n kè gogo Horàn be lipòawo gbɔa, mè.

¹⁷Nène a ye lipòa la kèkè so ànyigbãwo dòmè be àpù gbɔ kaka yì kɔ̀ ɖo Hasàr-Enàn lè èwèzɛ̃pe. E la do lipò ku Dàmaskò ku Hamàt be èfìɔduwo ŋuti lè èvègo. Ekèa ye nyi èvègo tɔ̀a.

¹⁸Lè èwèzɛ̃pea, lipòa la so àkpa ɖe kè lè Dàmaskò ku Horàn dòmè. E la zɔ̃ to Yɔrdàn be bàlì mè, lè Gilead ku Izràɛl nyigbã ji. E la yì kaka Tamàr, lè èjè be àpùa gbɔ. Ekèa ye nyi èwèzɛ̃pe tɔ̀a.

¹⁹Lè àpùgoa, lipòa la kèkè so Tamàr lè Meribà lè Kadɛ̀s be èsìdoa gbɔ; e la to Ejiptè be ètɔ̀a ŋuti yì kɔ̀ ɖo kaka ànyigbãwo dòmè be àpùa gbɔ. Ekèa nyi àpùgo tɔ̀a.

²⁰Lè èwèɖoxɔ̀pea, ànyigbãwo dòmè be àpùa, la nyi lipò lè àpùgo kaka yì Lebò-Hamàt lè èvègo. Ekèa ye nyi èwèɖoxɔ̀pe tɔ̀a.

²¹Mì la ma ànyigbã a lè dùkɔ̃a be kɔ̀tawo dòmè.

²²Mì la ma ɛ̀ lè àkɔ̀dàda mè. Mì la ma ɛ̀ kudo àmèjro kèwo lè mìa dòmè eye wo jì èvia cã. Wo la hɛ̃ wo cã sìgbè Izràɛlviwo ke nène lè dùkɔ̃a mè. Nène a ye wo la xɔ̀ woabe tèpe lè Izràɛl be kɔ̀tawo dòmè;

²³Àmè sia àmè la xɔ̀ yebe tèpe lè kɔ̀ta kè mè be sò nɔ̀pe ɖoa. Ènyè Tɔhonɔ̀ Mawu ye gblɔ̃ ɛ̀.”