Read gen Ezekìɛl 48 Bible Online

Ezekìɛl 48 - gen bible

Ezekìɛl 48

¹“Kpɔ kɔ̀tawo kudo àkpa kè la nyi woa tɔ̀a, ye nyi ekèawo. Dàn be àkpaa la nɔ̀ èvègo ɖaa, sɔ zɔ̃ èmɔ̃ to Hɛltɔ̀n, Lebò-Hamàt kudo Hasàr-Enàn, lè Dàmaskò ku Hamàt be fìɔduwo gbɔ. E la so èwèzɛ̃pe be lipòa gbɔ kaka yì kɔ̀ ɖo ànyigbãwo dòmè be àpùa gbɔ lè èwèɖoxɔ̀pe.

²Lè Dàn be àkpaa ŋuti, so èwèzɛ̃pe yì èwèɖoxɔ̀pea, la nyi Àsɛr be àkpaa.

³Lè Àsɛr be àkpaa ŋutia, mi la kpɔ Neftalì be àkpaa.

⁴Lè Neftalì be àkpaa ŋutia, mi la kpɔ Manasè be àkpaa.

⁵Lè Manasè be àkpaa ŋutia, mi la kpɔ Efràyim be àkpaa.

⁶Lè Efràyim be àkpaa ŋutia, mi la kpɔ Rubɛ̀n be àkpaa.

⁷Lè Rubɛ̀n be àkpaa ŋutia, mi la kpɔ Yudà be àkpaa.”

⁸“Lè Yudà be àkpaa ŋuti, so kaka èwèzɛ̃pe be lipòa gbɔ, va yì kɔ̀ ɖo ànyigbãwo dòmè be àpùa gbɔ lè èwèɖoxɔ̀pea, ànyigbã be àkpa ɖe la nɔ̀ gbalo. E la nɔ̀ jije ɖèka ji ku àkpa kpɔ̀tɛawo. E la kèkè àbɔglìgo hotu woèvè èkà èwì vɔ àtɔ̃. Yebe dòdòmè ye tèpe kɔ̀kɔ̀ɛa la nɔ̀.

⁹Àkpa kè wo la ɖè ɖovò na Tɔhonɔ̀a, la dìdì àbɔglìgo hotu woèvè èkà èwì vɔ àtɔ̃ eye e la kèkè àbɔglìgo hotu èwo.

¹⁰Mì la sɔ ànyigbã kèa be àkpa ɖe na hũbonɔwo. E la dìdì àbɔglìgo hotu woèvè èkà èwì vɔ àtɔ̃ so èwèzɛ̃pe yì èwèɖoxɔ̀pe eye e la ɖo àbɔglìgo hotu àtɔ̃ so èvègo yì àpùgo. Tɔhonɔ̀ be tèpe kɔ̀kɔ̀ɛa ya la nɔ̀ dòdòmè tututu.

¹¹Àgo kèa la va na hũbonɔ kèwo wo ɖo àsi èta na a, Sadɔk be jìjimèviwo. Wo wɔ̀ Tɔhonɔ̀ be sumɔ̃vi be èdɔa lè ànùkua mè. Woa ya mu trɔ lè Tɔhonɔ̀ ŋuti wàlɛbɛ kè Levì kpɔ̀tɛawo ku Izràɛlviwo wɔ̀ ɛ̀ va yìa nène ò.

¹²Ekèa ŋuti ye wo la xɔ̀ lè ànyigbã a be àkpa ɖe kè wo sɔ ɖɛ na Tɔhonɔ̀ ŋutɔa mè. E la nɔ̀ àhàdamè na Levìwo tɔ̀a.

¹³Levìwo be àkpaa la nɔ̀ sìgbè hũbonɔwo tɔ̀a ke nène. Woa kpata la ɖo dìdimè àbɔglìgo hotu woèvè èkà èwì vɔ àtɔ̃ ku kèkemè àbɔglìgo hotu àtɔ̃.

¹⁴Wo mu la teŋu ɖɔ̀lì, la sà àlo na àmè ànyigbã kèa be àkpa ɖe kpɔ ò. E nyi ènu tɔ̀xɛ ɖe. Ɖo wo ɖè è ɖovò na Tɔhonɔ̀ ye.”

¹⁵“Lè àkpa ɖè ɖovò ŋua ŋutia, e la kpɔ̀tɔ̀ tèpe ɖe kè kèkè àbɔglìgo hotu èvè èkà èwì vɔ àtɔ̃ eye e dìdì àbɔglìgo hotu woèvè èkà èwì vɔ àtɔ̃. Ànyigbã ɖè ɖovò ye be nyi na dùkɔ̃a, dùkɔ̃mèviwo ku woabe kɔpewo. Èdùa la nɔ̀ dòdòmè.

¹⁶E la ɖo dìdimè ku kèkemè ɖèka. Yebe jijea nyi àbɔglìgo hotu èvè àlɔ̀ àtɔ̃.

¹⁷Lè èdùa be àkpa ènèawo jia, tèpe gbalo ɖe lè kè xɔ̀ àbɔglìgo àlɔ̀ èvè èkà ci èwo.

¹⁸Lè àkpa kpɔ̀tɛ kè wo ɖè ɖovò na Tɔhonɔ̀a, e kpɔ̀tɔ̀ ànyigbã ɖe lè èdùa be èwèzɛ̃pe, ku èbu cã lè èdùa be èwèɖoxɔ̀pe. Woabe jijea nyi metà hotu àtɔ̃. Woabe àgblèmènukuwo ye wo sɔ nyìnà àmè kèwo le wɔ̀ èdɔ na èdùa.

¹⁹Èdùa be èdɔwɔ̀tɔ kèwo la nɔ dè ànyigbã kèawoa, la so Izràɛl be kɔ̀tawo kpata mè.

²⁰Ànyigbã kè wo ɖè ɖovò na Tɔhonɔ̀a kudo kèwo ye èdùa la xɔ̀a, kpata la ɖo dìdimè ku kèkemè ɖèka. Yebe jijemè la nyi àbɔglìgo hotu woèvè èkà èwì vɔ àtɔ̃. Èdùa be ànyigbã a la nyi àkpa ɖèka lè àkpa ènèawo mè.

²¹Ànyigbã kpɔ̀tɛa la nyi èfìɔvia tɔ̀. Yebe ànyigbã a la nɔ̀ àgo ɖe sia ɖe na tèpe kè wo ɖè ɖovò na Tɔhonɔ̀a kudo kè nyi èdùa tɔ̀a. E la tɛ ɖo àkpa kpɔ̀tɛawo ŋuti, la kèkè àbɔglìgo hotu woèvè èkà èwì vɔ àtɔ̃ yì èwèzɛ̃pe lè lipòa gbɔ, gbà yì èwèɖoxɔ̀pe lè ànyigbãwo dòmè be àpùa. Ànyigbã kèwo wo ɖè ɖovò na Tɔhonɔ̀ kudo tèpe kɔ̀kɔ̀ɛa, wo lè àgo kèa be dòdòmè tututu.

²²Levìwo be ànyigbã kudo èdùa be ànyigbãwo la nɔ̀ èfìɔvia be ànyigbã a be dòdòmè. Èfìɔvia be ànyigbãwo la nɔ̀ Yudà be àkpa kè lè èvègoa kudo Bɛnyamìn be àkpa kè lè àpùgoa dòmè.”

²³“Kɔ̀ta kpɔ̀tɛawo be àkpa kèwo nyi woa tɔ̀a yekè: Bɛnyamìn be tèpea la so èwèzɛ̃pe be lipòa ji kaka yì kɔ̀ ɖo ànyigbãwo dòmè be àpùa gbɔ lè èwèɖoxɔ̀pe.

²⁴Lè Bɛnyamìn be àkpaa ŋuti, so èwèzɛ̃pe yì èwèɖoxɔ̀pea, mi la kpɔ Simeɔ̀n be àkpaa.

²⁵Lè Simeɔ̀n be àkpaa ŋutia, mi la kpɔ Isakàr be àkpaa.

²⁶Lè Isakàr be àkpaa ŋutia, mi la kpɔ Zabulɔ̀n be àkpaa.

²⁷Lè Zabulɔ̀n be àkpaa ŋutia, mi la kpɔ Gad be àkpaa.

²⁸Lipò kè lè Gad be àkpaa be àpùgoa, la nyi ànyigbã a be lipò. E la so Tamà, lè èwèzɛ̃pe kaka yì kɔ̀ ɖo Meribà lè Kadɛ̀s be èsìdoa gbɔ. E yomè a, e la zɔ̃ Ejiptè be ètɔ̀a ŋuti kaka yì ànyigbãwo dòmè be àpùa to.

²⁹Nène a ye mì la ma ànyigbã a na Izràɛl be kɔ̀tawo to cãcã wɔ̀wɔ mè. E la nyi woabe ènunɔ̀amèsi. Ènyè Tɔhonɔ̀ Mawu ye gblɔ̃ ɛ̀.”

³⁰Yèruzàlɛm be èdùa be àgbowo ye nyi ekèa: lè èvègo lɔ̀ge kè be jije nyi àbɔglìgo hotu èvè àlɔ̀ àtɔ̃,

³¹Wo ɖo Izràɛl be kɔ̀tawo be nyikɔ na èdùa be àgbowo, àgbo ètɔ̃ lè èvègo: àgbo ɖèka na Rubɛ̀n, àgbo ɖèka na Yudà, àgbo ɖèka na Levì;

³²lè èwèzɛ̃pe kè kèkè àbɔglìgo hotu èvè àlɔ̀ àtɔ̃a, àgbo ètɔ̃: àgbo ɖèka na Yosɛ̀f, àgbo ɖèka na Bɛnyamìn, àgbo ɖèka Dàn;

³³lè àpùgo kè kèkè àbɔglìgo hotu èvè àlɔ̀ àtɔ̃a, àgbo ètɔ̃: àgbo ɖèka na Simeɔ̀n, àgbo ɖèka na Isakàr, àgbo ɖèka na Zabulɔ̀n;

³⁴lè èwèɖoxɔ̀pe kè kèkè àbɔglìgo hotu èvè àlɔ̀ àtɔ̃a, àgbo ètɔ̃: àgbo ɖèka na Gad, àgbo ɖèka na Àsɛr, àgbo ɖèka na Neftalì.

³⁵Èglìkpa kè wo tɔ̃ trɔdo Yèruzàlɛm be èdùa, dìdì àbɔglìgo hotu àsiɖèkɛ. So gà ŋua mèa, wo la yɔ èdùa be: “Tɔhonɔ̀ lè[24].”