Read gen Ezekìɛl 5 Bible Online

Ezekìɛl 5 - gen bible

Ezekìɛl 5

¹Mawu gblɔ̃ na mù be: “Àgbètɔ be èvi, yì sɔ èwui ɖaɖa ne wòa zã ɛ̀ sìgbè ègɛ̃plɔnu nène. Sɔ ɛ̀ plɔ èta kudo àpo ègɛ̃ eye wòa sɔ ènudànu ma ènu kè wò plɔa ɖo àkpa sùgbɔ.

²Wàlɛbɛ kè èdùa ji zĩzĩ be àzãa la sù vɔ̀a, wò la tɔ èzò àkpa ɖèka lè ètɔ̃a ji lè èdùa be dòdòmè. Àkpa èvègɔ̃a ya, wò la pò è kudo èwui wòa trɔdo èdùa. Wò la kãkã àkpa ètɔ̃gɔ̃a ɖo àya mè eye nyè yaa, mù la sɔ èwui nyèa kplɔ̀ ɛ̀ do.

³Co wò la gble èfua be viɖe ɖɛ eye wò la sɔ ɛ̀ wla ɖo àpo àwùa be ègo mè.

⁴Wò la sɔ èfua be viɖe kɔ̀ ɖo èzò mè ne bèa fiɔ̃. Eye èzòa la gbã yì Izràɛl be dùkɔ̃a keŋu mè.

⁵Sè ènu kè Tɔhonɔ̀ Mawu gblɔ̃a be: “Ènu kè la jɔ̀ ɖo Yèruzàlɛm jia ye kè. Èdù kè mù sɔ dà ɖo dùkɔ̃wo dòmè eye mù sɔ àmèjrowo pòxla do è.

⁶E sitè ɖo ɖoɖo nyèwo ŋuti kaɖi kaɖi. Yebe èkunyànyrãa gbà sɛ̃ŋu wu dùkɔ̃wo ku ànyigbã kèwo trɔdo èa tɔ̀, ɖo wo gbe àpe ɖoɖowo eye wo mu kpɔ ègbè do àsi nyèwo ji ò.

⁷Eŋuã, ènyè Tɔhonɔ̀ Mawu a, mù le gblɔ̃ be: Mì wɔ̀ ènu dakà sùgbɔ wu dùkɔ̃ kèwo trɔdo mìa. Mì mu zɔ̃ ɖo ɖoɖo nyèwo ji ò eye mì mu le èse nyèwo ɖo àsi ò. Vɔ̀a, mì mu kpàsà dùkɔ̃ kèwo trɔdo mìa cã be ɖoɖowo do ò.

⁸Eŋuã ŋutia, mù le gblɔ̃ lè tɔ̀nyè gomè be: Nyè cã mù la sitè ɖo mìa Yèruzàlɛm be dùkɔ̃a ŋuti. Mù la na ye jìbi be àdã nyèa, la jè woa ji lè àgũ dòmè.

⁹Kù ɖo àpo wɔ̀wɔ bàɖàwo ŋutia, mù la wɔ̀ kudo wò sìgbè lekè nyè mu wɔ̀ kpɔ gbèɖe ò eye nyè mu la gbà teŋu wɔ̀ gbèɖe cã òa.

¹⁰Ekèa ŋuti ye lè èdùa mèa, àjìtɔwo la ɖù woabe èviwo eye èviwo la ɖù woabe àjìtɔwo. Mù la wɔ̀ ɖo kòjosòso nyèa ji ɖo mìa ŋuti. Mù la kãkã àmè kèwo la ci àgbèa ɖo àya ènèawo mè.

¹¹Kaka kè mù kpɔ̀tɔ̀ lè àgbèa, ènyè Tɔhonɔ̀ Mawu mù le kãɖoji na mì be mì pòɖi mawuxɔ nyèa to mìabe vòdu jiŋɔ ku wɔ̀na dakàwo ji. Ɛ̃ɛ mù la va yì sìgbè ègɛ̃ plɔnu nène eye nyè mu la ku ŋuzĩzĩ na àmè ɖe ò.

¹²Àkpa ɖèka lè tèpe ètɔ̃ ji lè dùkɔ̃ wòa dòmè la crɔ̃ lè èdɔ̀vuɛ̃wo si àlo àdɔ̀toto la wù wo lè èdùa mè. Àkpa èvègɔ̃a la crɔ̃ lè èwui nu lè èdùa be àhàwo ji. Eye mù la kãkã àkpa kpɔ̀tɛa ɖo àya ènèawo mè, eye mù la tĩ woa yomè kudo èwui.

¹³Mù la yì vɔ̀vɔnu na àdɔ̀mèze nyèa, jìbibi nyè mu la sè tɔ̀ wò jɔ̀ ò. Nène a wo la nya be ènyè Tɔhonɔ̀ ye pò nupo na wo lè ŋuhuã mè. Ɖo mù la yì kaka vɔ̀vɔnu na àdɔ̀mèze nyèa.

¹⁴Dùkɔ̃ kèwo trɔdo mìa kudo àmè kèwo la to Yèruzàlɛm va yìa la kpɔ be mù trɔ ɛ̀ wɔ̀ èglìkpo ɖèɖe eye e la ɖɔ ku ŋùkpɛ̃.

¹⁵Mù la wɔ̀ ɖo ènyàsòso nyè ɖo woa ŋutia ji lè àpe àdɔ̀mèze gã ɖe mè eye mù la sɔ ènyà sɛ̃sɛ̃wo sɔ gble wo. Eye dùkɔ̃ kèwo lè woa ŋutia la sɔ èdùa wɔ̀ ènu kòkoe kudo zũgbè lè àmèwo be ŋùmè. Vɔ̀a, e la gbà nyi àmèsìasia ku vɔ̃vɔ̃ be mɔnu na wo. Tɔhonɔ̀ ye gblɔ̃ ɛ̀.

¹⁶Mù la na àdɔ̀wùamè be vevesèse la crɔ̃ mì. Àdɔ̀toto be àŋùti kèawo la crɔ̃ mì. Mù la crɔ̃ mìabe ènuɖùɖu kèwo mì wla dàɖɛa eye mù la na àdɔ̀ la wù mì kaka na èku.

¹⁷Àdɔ̀toto kè mù la sɔ ɖoɖa mìa kudo èlã wɔ̀adã kèwo mù la ɖè èkà na ɖo mìa dòmèa, la crɔ̃ mìabe èviwo. Èdɔ̀vuɛ̃, èhlɔ̃dãnu kudo àhùa la crɔ̃ mì. Tɔhonɔ̀ ye gblɔ̃ ɛ̀.”