Read gen Ezekìɛl 6 Bible Online

Ezekìɛl 6 - gen bible

Ezekìɛl 6

¹Tɔhonɔ̀ be ègbè ɖì na mù gblɔ̃ be:

²“Àgbètɔ be èvi, trɔ ŋùku kpɔ Izràɛl be ètowo ne wòa gblɔ̃ ènyà ɖo woa ŋuti.

³Wò la gblɔ̃ be: “Izràɛl be ètowo, mì sè Tɔhonɔ̀ Mawu be ènyà kè be le gblɔ̃ na àmè kèwo lè ètowo, ètokɔ̃ɛwo, bàlìwo kudo àbùwo mèa be: mù la hɛ̃ èwui ɖo mìa ji, ne ma crɔ̃ mìabe vɔsawɔ̀pewo.

⁴Àmèwo la crɔ̃ mìabe vɔsakpewo, la ŋɛ̃ mìabe lififiɔ̃nuwo. Mù la na àmè sùgbɔ la jèanyi ku lè mìabe vòduwo be ŋùkɔ̀.

⁵Mù la sɔ Izràɛl àmèkpòtiwo dà ɖo woabe vòduwo be ŋùkumè eye mù la kãkã woabe èpuwo trɔdo woabe vɔsakpewo.

⁶Àfi sia àfi kè mì sò nɔ̀pe ɖoa, mìabe èdùwo la gbã eye mìabe vɔsawɔ̀pewo la ci gbalo. Mìabe vɔsakpewo la kãkã eye wo mu la gbà ɖo àsìxɔ̀xɔ ɖe ò. Wo la gbã mìabe vòduwo, eye wo la bu ɖiwa. Mìabe lififiɔ̃nuwo cã la gbã eye ènu sia ènu kèwo mì wɔ̀a la bu ɖiwaa.

⁷Àmè sùgbɔ la jèanyi ku lè mìa dòmè. Nène a ye mì la sè emè be mù nyi Tɔhonɔ̀.

⁸Gãkea mù la gble àmè kèwo wo hlùɛ̃ lè èwui nua ɖo èdùawo mè, ne woa kãkã wo hlɛ̃ ɖo àmèjro nyigbãwo ji.

⁹Lè èdù kèwo mè wo la kplɔ̀ mì yì ɖoa, wo la ɖoŋùku ji nyè. Ɖo ènu kè ŋutia, mù la gbã woabe ègbèjimà nɔ be èjì kèwo trɔ lè ŋuti nyèa kudo woabe ŋùkuvi kèwo wo sɔ kpɔna vòduwo sãa. Eŋuã, woa ŋutɔ woabe ènu la wɔ̀ ŋùkpɛ̃ na woa ɖokoewo ɖo ènu gbegble kèwo wo wɔ̀nà ŋuti.

¹⁰Nène a, wo la nya ɛ̀ be ènyè Tɔhonɔ̀a, nyè mu pò nupo gbalo wàlɛbɛ kè mù sɔ gbledo sɔ pò wo ò.”

¹¹Sè ènu kè Tɔhonɔ̀ Mawu gblɔ̃a ɖa: “Pò àsikpe, tù àfɔ̀ ànyi eye wòa gblɔ̃ be: “Miawo ye kè!” Kù ɖo Izràɛlviwo be ènu dakà kèwo wo wɔ̀a ŋuti. Wo la crɔ̃ wo to àhùa, àdɔ̀wùàmè kudo èdɔ̀vuɛ̃ mè.

¹²Àmè kè la nɔ̀ àzɔ̀ge booa, èdɔ̀vuɛ̃ la wù ì. Àmè kèwo la nɔ̀ àxue kɔ̀a, la ci èwui nu eye àmè kèwo la ci àgbèa, la ku àdɔ̀ku. Eye nènea ye mù la yì kaka vɔ̀vɔnu na àdɔ̀mèze nyèa ɖo woa ŋuti.

¹³Woabe àmèkpòtiwo la nɔ̀ ànyigbã lè woabe vòduwo ku vɔsakpewo dòmè, lè woabe èto gãwo ji, lè ètowo kpata ji, lè àti do àmàwo ku àtisuwo gɔ̃mè kudo tèpe kèwo kpata ye wo wɔ̀nà vɔ̀sawo lèa. Eye àmè sia àmè la nya ɛ̀ be mù nyi Tɔhonɔ̀.

¹⁴Mù la ɖè ŋusɛ̃ nyèa ɖo woa ji. Mù la na àmèwo la vɔ̀ lè èdùa mè, wo la vɔ̀ sìgbè Diblà be zògbè nène; lè woabe nɔ̀pewo kpata. Eye wo la nya be ènyè ye nyi Tɔhonɔ̀a.”