Read gen Ezekìɛl 7 Bible Online

Ezekìɛl 7 - gen bible

Ezekìɛl 7

¹Tɔhonɔ̀ be ègbèa ɖì na mù gblɔ̃ be:

²“Na èwò àgbètɔ be èvi! Sè ènu kè Tɔhonɔ̀ Mawu le gblɔ̃ ɖo Izràɛl be ànyigbã ŋutia: “E vɔ̀vɔ̀! Vɔ̀vɔnu va sùtè èdùa be koŋù ènèawo.

³Fifìa e vɔ̀vɔ̀ na èwò cã. Àdɔ̀mèze nyèa la blù do wò. Mù la ɖo kòjo na wò sɔ zɔ̃ ɖo àpo wɔ̀na ji. Eye wò la tu ènugbegble wòawo be èfɛ̃.

⁴Nyè mu la ku ŋuzĩzĩ kaka la va kpɔ ɖo emè na wò ò. Wò la tu àfɔ̀ɖèɖe gbegble wòa be èfɛ̃ eye àpo ènukpòtoea la ze peŋu. Eye mì la nya be ènyè ye nyi Tɔhonɔ̀.

⁵Kpɔɖa ènyà kè Tɔhonɔ̀ gblɔ̃a ye kè: Gbledo gbãnà, gbledo kèa hati mu lè ò!

⁶E vɔ̀vɔ̀: Gbledo gãa gbãnà. E la jè e ji wò eye e va ɖo vɔ̀!

⁷Ànyigbã ji nɔ̀tɔwo, mìabe cɔ̃crɔ̃a le gogo, vɔ̀vɔnua gbãnà, kòjoɖoɖo ŋùkèkèa lili. Èzĩtɔ̀tɔ la ɖɔ̀lì jìjɔɛ kpɔkpɔ lè ètowo ji.

⁸Fifìa mù sɔ̀gbè la ɖùɖù jìbibi nyèa ɖo ji wò eye àdɔ̀mèze nyèa mu la ɖo lipò ò. Mù la ɖo kòjo na mì eye mì la tu mìabe ènu kpòtoewo be èfɛ̃.

⁹Nyè mu la ku ŋuzĩzĩ kaka la kpɔ ɖo emè ò. Mù la na àpo wɔ̀nawo be ètodɔ̃ la jè e ji wò. Ènu kèawo la ze glãlã. Eye mì la sè emè be ènyè Tɔhonɔ̀ ye le dɔ̃ èto na mì.

¹⁰Kpɔ kòjoɖoɖo be ŋùkèkè ye kè, e va ɖo! Ènu gbãgbã be ŋusɛ̃a lè àfiwo kpata eye ègòyiyi le dri ɖo e ji.

¹¹Èhlɔ̃dãdã lè sìgbè èba kè wo jràɖo la do na àmè nène. Ènu ɖekpe mu la kpɔ̀tɔ̀ na mì ò, mì la vɔ̀ ɖiwaa kaka jè mìabe jìjɔɛ kpɔkpɔ ku àsìxɔ̀xɔ ji.

¹²Gàmèa sù eye kòjoɖoɖo be ŋùkèkèa lili. Ènuplètɔa mu gbà kpɔ jìjɔɛ ò eye ènusàtɔa cã mu gbà lòfũ ò, ɖo àdɔ̀mèze nyè le blù ɖo dùkɔ̃a kpata ji.

¹³Ènusàtɔa mu la teŋu yì kè ɖo yebe ènusàsawo ŋuti, ne e ci àgbè cã ò. Nyàwoa, àvìmènu kè ɖè dùkɔ̃a be gbãgbã fiɔa, la va emè godo. Àmè sia àmè le nɔ̀ àgbè bàɖà, eye ɖekpe mu teŋu le jrà ye ɖokoe ɖo ò.

¹⁴Wo la teŋu ku èkpɛ̃ sɔ sìa wo co, àmè ɖekpe mu la teŋu jràɖo ne àhùa wɔ̀wɔ ò. Ɖo àdɔ̀mèze nyèa sitè ɖo dùkɔ̃ kpata ŋuti.”

¹⁵Àhùa la nyrã lè èmɔ̃wo ji, èdɔ̀vuɛ̃ kudo àdɔ̀wùàmè la nɔ̀ àxuedowo mè. Lè àgblètaa, ŋusùwo la ku ci àhùagbe ji, lè èdùgã mèa, èdɔ̀ ku àdɔ̀wùàmè la crɔ̃ wo.

¹⁶Àmè ciàgbèwo la si yì ètowo mè eye wo la yì nɔ xànu lè funu ɖo woabe àgɔ̀jèjewo ŋuti, sìgbè àhɔ̃ne kèwo le jèhùɛa nène.

¹⁷Woabe àlɔ̀wo mu la gbà teŋu le ènu ò, woabe èklòwo la kpe.

¹⁸Wo la tà kòtòku, eye wo la nɔ hũhũ lè woa ɖokoe sinu. Woabe ŋùkuwo mè la ɖɔ ku ŋùkpɛ̃, wo la plɔ èta na wo keŋu.

¹⁹Wo la lɔ woabe klòsalò kɔ̀ŋùgbe ɖo èmɔ̃wo ji, wo la kpɔ woabe sìka sìgbè ɖiɖɔɛ nène; ɖo klòsalò ku sìka mu la teŋu hlùɛ̃ wo lè Tɔhonɔ̀ be àdɔ̀mèze be àzãa gbè ò. Wo mu la kpɔ ènu ɖù ɖɔpò kaka la kpɔ ɖoŋuti na woabe jijiwo ò. Ɖo klòsalò ku sìka ye hɛ̃ àgɔ̀jèjeawo va.

²⁰Woabe àdɔ̀kùnuwo na wo trɔ zũ ègòyitɔwo eye wo li legbavi ku bocɔɛ̀vi jiŋɔwo. Ekèa ŋuti mù sɔ ènu kèawo sɔ wɔ̀ ɖiɖɔɛ na wo ɖo.

²¹Mù la na àmèjrowo la va hlà wo eye àmè gbalowo la lɔ wo yì sìgbè àmɔ̀nyɔ̀nu nène, ne wo dovlo ènu kèawo keŋu vɔ̀a.

²²Nyè ya mù la trɔ lè woa ŋuti ne wo le dovlo àdɔ̀kùnɔ̀ nyèa: tamèsɛ̃tɔwo la gɛ̃ ɖo emè eye wo la dovlo è.

²³Wɔ̀ kɔ̀sɔ̀kɔsɔ ɖe ɖɛ ɖo ànyigbã ɖɔ kudo èhlɔ̃dãtɔwo, eye èdùa ɖɔ ku èlãnu wɔ̀wɔ.

²⁴Mù la kplɔ̀ dùkɔ̃ bàɖàwo va la hlà woabe àxuewo lè woa si. Mù la ɖè woabe ŋusɛ̃tɔwo be ègòyinua jo eye wo la dovlo woabe kɔ̀kɔ̀ɛpewo.

²⁵Àkpɔ̃ xɔ̀ ànyi nɔ̀ eŋuã gbalo be gbalo ye wo la ji ŋuti fàfa tèpe.

²⁶Gbledo la jè gbledo ji, eye ènyà vuɛ̃wo la bɔ drì. Wo la ɖèkuku na gblɔ̃ɖɛtɔa be ne kpɔ àvìmènu ɖe, hũbonɔa mu la gbà ɖo ènu ɖe la fiɔ ò eye àmè sĩsĩwo mu la gbà teŋu pòtoɖo ò.

²⁷Èfìɔa la lòfũ eye èfìɔvi la bu ŋùɖo. Dùkɔ̃a kpata la hũhũ ku vɔ̃vɔ̃. Mù la wɔ̀ kudo wo sɔ zɔ̃ ɖo woabe wɔ̀nawo ji eye mù la ɖo kòjo na wo sìgbè lekè e jèa. Nène a wo la nya be ènyè ye nyi Tɔhonɔ̀a.