Read gen Ezekìɛl 8 Bible Online

Ezekìɛl 8 - gen bible

Ezekìɛl 8

¹Kè wo kplɔ̀ àmèwo yì gàtɔnugbe be èpè àdɛ̃gɔ̃a mè, lè wètri àdɛ̃gɔ̃a be ŋùkèkè àtɔ̃gɔ̃a gbèa, mù nɔ̀ ànyi lè àxue nyèa mè eye Yudà be àmègãxowo nɔ̀ ànyi lè ŋùkɔ̀ na mù. Funu ye Tɔhonɔ̀ Mawu be ŋusɛ̃ ɖiɖi ɖo ji nyè trolo.

²Mù le kpɔ eye kpɔɖa ènu ɖe lè sìgbè àgbètɔ be nɔ̀nɔmè nène. Lè ènu kè ɖì yebe àlìgbɔa be gɔ̃mèa, yebe àmètia lè sìgbè èzò nène. Lè yebe jia, e ɖo kɛ̃klɛ̃ ɖe kè le kɔ̀ sìgbè sìka lè èzò mè nène.

³E vlũ ènu ɖe sìgbè àlɔ̀ nène eye e le mù to àpe èɖàwo ji. Ŋusɛ̃ ɖe kɔ mù yì kaka Yèruzàlɛm lè èdùa be àgbo emètɔ̀ kè lè èvègoa, lè fikè wo sɔ vòdu be legba kè nyi Mawu be èzũa, ɖoa.

⁴Izràɛl be Mawu a be gogoa ze na mù lè funu, sìgbè àlekè mù kpɔ ɛ̀ lè bàlìa mè sãa nène[1].

⁵Mawu gblɔ̃ na mù be: “Àgbètɔ be èvi, ɖèkɔ̀ kpɔ èvègo ɖoɖa.” Mù wɔ̀ ekèa pɛpɛpɛ. Lè vɔsakpe be àgboa be èvègo lɔ̀gea, legba ɖe kè Mawu mu la teŋu xɔ̀ òa lè èmɔ̃a nu lè funu.

⁶E gblɔ̃ kpe è be: “Èwò àgbètɔ be èvi, wò le kpɔ ènu kè le jɔ̀ a? Izràɛlviwo le sumɔ vòduwo sɔ le ɖè mù jo lè tèpe kɔ̀kɔ̀ɛ nyèa. Vɔ̀a wò la gbà kpɔ wɔ̀na bu kè gbà nyrã wua.”

⁷E kɔkɔ mù yì mawuxɔa be xixenu be àgboa nu, eye mù kpɔ èdo ɖe lè èglìa mè.

⁸Mawu gblɔ̃ na mù be: “Àgbètɔ be èvi, ŋɔ èglìa.” Mù ŋɔ èglìa eye mù ɖè èdo ɖe ɖo funua.

⁹E gbà yì eji gblɔ̃ be: “To funu yì emè ne wòa kpɔ èvlodonu ku ètèsisi ɖo àmè ŋuti be ènu kèwo ye àmèwo le wɔ̀ lè fikèa ɖa.”

¹⁰Mù ɖo emè eye mù kpɔ: Trɔ do mù a, mù kpɔ èdãwo kudo èlã jiŋɔwo be tata lè èglìawo ŋuti. Izràɛl be legbaviwo be tata lè funua.

¹¹Izràɛl dùkɔ̃a be àmèsĩsĩ èkà takpo ci èwo (70) nɔ̀tè lè tata kèawo be ŋùkɔ̀. Cafàn be èvi Yàzanìa cã lè wo dòmè. Àmè sia àmè le lififiɔ̃nu ɖo àlɔ̀ mè eye lifia be àzìzɔ le tù yì èji.

¹²Mawu biɔ mù sè be: “Èwò àgbètɔ be èvi, wò le kpɔ ènu kè dùkɔ̃a be àmèsĩsĩwo le wɔ̀ lè wawla mèa? Àmè sia àmè lè yebe tèpe lè yebe legbaa be ŋùkɔ̀. Wo le gblɔ̃ ku kãkãɖoji be: “Tɔhonɔ̀ mu le kpɔ mi ò. E gble ànyigbã a ɖɛ.”

¹³E gblɔ̃ kpe è be: “Wò la gbà kpɔ ènu dakà bu kèwo wo gbà le wɔ̀a.”

¹⁴E kplɔ̀ mù yì mawuxɔa be àgbo kè lè èvègoa. Nyɔ̃nùwo lè ànyi nɔ̀nɔ le fãvi ɖo vòdu Tàmuz[2] be èku ŋuti.

¹⁵E biɔ mù sè be: “Àgbètɔ be èvi, wò le kpɔ ènu kèa? Wò la gbà kpɔ wɔ̀na jiŋɔ buwo cã.”

¹⁶Eye e trɔ kplɔ̀ mù yì mawuxɔa be xixenu àdɔ̀mètɔ̀a. Lè kɔ̀kɔ̀ɛpe be èmɔ̃nu, lè vɔsakpea ku xixeanu be dòmèa, ŋusù sìgbè èwìvɔàtɔ̃ nène lè funu. Wo trɔ ŋùgbe do kɔ̀kɔ̀ɛpe, eye wo jè ŋùkɔ̀ èwèzɛ̃pe. Wo jèklò sɔ ŋùmè cɔ̃ ànyi le sumɔ dɔ̃ŋùkusu.

¹⁷Mawu biɔ mù sè be: “Wò le kpɔ ènu kèa àgbètɔ be èvi? Co gãke Yudàvi kèawo wo mu le wɔ̀ ènu dakà kèawo kpò lè fikèa ò. Wo gbà le wɔ̀ èhlɔ̃dãnuwo lè èdùa mè sɔ le fɔ̃ àdɔ̀mèze nyèa. Kpɔ wo fifìa, wo sɔ àzã le yì woabe ŋɔ̀ti nu.

¹⁸Eŋuã, mù la gbà sɔ àpe àdɔ̀mèze hɛlihɛlia tufɛ̃ na wo. Nyè mu la ku ŋuzĩzĩ na wo kaka la gble èɖe ɖɛ ò. Ne wo le do àpa sɛ̃sɛ̃ɖe sɔ ji àlɔ̀do so gbɔ nyèa, nyè mu la ɖo èto wo ò.”