Read gen Ezekìɛl 9 Bible Online

Ezekìɛl 9 - gen bible

Ezekìɛl 9

¹E yomè a, mù sè Tɔhonɔ̀ do àpa ku ègbè lelele gblɔ̃ be: “Mì va, mì àmè kèwo la va xa èdùa! Àmè sia àmè ne hɛ̃ yebe àhùawɔ̀nua va.”

²Nène a mù kpɔ ŋusù àdɛ̃ to so mawuxɔa be èvègo be àgbo gãa nu kudo woabe àhùawɔ̀nuwo. Lè woabe dòdòmèa, ŋusù ɖe do àlɛ̃ŋudà be àwù eye ènuŋlɔ̀nu lè àlì ji na ɛ̀. Wo zɔ̃ hòo va nɔ̀tè lè gàjɛ̃ be vɔsakpea gbɔ.

³Izràɛl be Mawu be zeze lè gogo mè kè le ze lè Kèrubimwo jia, sitè lè tèpe ŋua tùtà mawuxɔa be èmɔ̃a nu. Tɔhonɔ̀ yɔ àmè kè do àlɛ̃ŋudà be àwù eye ènuŋlɔ̀nu lè ègoji na a,

⁴eye e gblɔ̃ na ɛ̀ be: “Ɖìsà to Yèruzàlɛm be èdùa kpata mè; wɔ̀ jèsìdo ɖe ɖo ŋùgonu na àmè kèwo kpata le làmɔɛ̃ gbà le xànu ɖo bùsunu kèwo wo le wɔ̀a ta.”

⁵E yomè a mù sè e le dogbè àsi na àmè kpɔ̀tɛawo be: “Mì kplɔ̀ àmè kèa do eye mì wù ànyigbã ji nɔ̀tɔwo. Mì mu gbà ku ŋuzĩzĩ kaka la gble àmè ɖe ɖɛ ò.

⁶Mì crɔ̃ àmèsĩsĩwo ku ɖèkajɛviwo kudo tùgbɛ̀jɛviwo, ɖèviwo kudo nyɔ̃nùwo. Vɔ̀ mì mu gbà tɔ àsi àmè kèwo be ŋùgonu jèsìdoa lèa ò.” Wo tɔ eji kudo àmèsĩsĩ kèwo lè mawuxɔa be ŋùkɔ̀a.

⁷Tɔhonɔ̀ ɖè ègbè be: “Mì dovlo mawuxɔa, mì lɔ àmèkpòtiawo kɔ̀ ɖo emè, e yomè a mì gbà yì àzɔ̀ge.” Eye wo yì àmèwo be cɔ̃crɔ̃a ji lè èdùa mè.

⁸Wàlɛbɛ kè wo le àmèwo be cɔ̃crɔ̃a jia, nyè ɖèka pɛɛ ye ci ànyi. Mù lè èklò ji sɔ ŋùmè cɔ̃ ànyi, eye mù do àpa be: “Oò Tɔhonɔ̀ Mawu, kè wò le ɖùɖù àdɔ̀mèze wòa kɔ̀ ɖo Yèruzàlɛm ji lekea ɖe, wò le ji la crɔ̃ Izràɛlvi kpɔ̀tɛawo keŋuã?”

⁹E ɖo e ŋuti na mù be: “Izràɛl ku Yudà be fìɔdumèviwo be àgɔ̀awo sùgbɔ ŋutɔ: tamèsɛ̃sɛ̃ ɖùfìɔ lè tèpewo kpata lè ànyigbã ji eye jɔ̀jɔɛ màsò ɖɔ èdùa. Àmèwo le gblɔ̃ be: “Tɔhonɔ̀ trɔ ŋùgbe do ànyigbã a eye mu gbà le kpɔ mi ò.”

¹⁰Ekèa ŋuti ye nyè cã nyè mu la ku ŋuzĩzĩ kaka la gble àmè ɖɛ ò. Vɔ̀a mù la dɔ̃ ènu kèwo wo wɔ̀a be èto na wo.”

¹¹Lè hùe ŋua nua, ŋusù kè do àlɛ̃ŋudà be àwùa va la ɖo àkɔ̃ŋùta. E gblɔ̃ na Mawu be: “Mù wɔ̀ èdɔ kè wò do àsi na mù a vɔ̀.”