Read gen Òzeà 10 Bible Online

Òzeà 10 - gen bible

Òzeà 10

¹Izràɛl nyi vɛ̃-gble kè sɛ̃naku sùgbɔ sãa Wàlɛbɛ kè kusɛ̃sɛ̃awo le sùgbɔa wo li vɔsakpewo cã sùgbɔ. Kè dùkɔ̃a le yì ŋùkɔ̀ kpea, wo le li ŋùkuɖojikpe tɔ̀xɛwo.

²Woabe èjìwo ma ɖo àgɔ̀jèje ŋuti. Wo la kpɔ yebe ètodɔ̃ godoo. E la gbã woabe vɔsakpewo eye e la crɔ̃ woabe ŋùkuɖojikpeawo cã.

³Wo la va gblɔ̃ be: “Ne mi mu gbà ɖo èfìɔ òa, e fiɔ be mi mu le sè ègbè na Tɔhonɔ̀ ò. Vɔ̀ fikè mi ɖo na ɛ̀a, nukɛ èfìɔ la gbà teŋu wɔ̀ na mi ò?”

⁴Wo pònà nupo fuu wo fìãnà àjè be àjɔ̀gbè gbà ɖùnà èzò. Co jɔ̀jɔɛ lè na wo sìgbè ègbe ɖo àɖi kè mìɔ̃ ɖo àgblè kè wo ŋlɔ̀a ji nène.

⁵Sàmarìatɔwo le vɔ̃ ɖo sìka nyìvi kè wo sɛ̃nà lè Bɛt-Avɛ̀n ŋuti. Dùkɔ̃ kudo hũbonɔwo la lòfũ. Wo la teŋu kpɔ jìjɔɛ ɖo yebe gogoa ŋuti, fifìa gogo kèa bu keŋu!

⁶Wo la dro sìka nyìvi kèa cã yì Àsirìa. E la trɔ zũ èfìɔ gãa be ènunana. Wo la ɖìgbɔ Efràyim, eye èŋù la kpɛ̃ Izràɛl ɖo susu kèa ŋuti.

⁷Sàmarìa tɔ̀ ya vɔ̀vɔ̀, yebe èfìɔa lè sìgbè futukpɛ kè èsì kplɔ̀ le yìa nène.

⁸Wo la gbã vòdukpa kèwo nyi ànyi jèje gã na Izràɛlviwo. Ègbe kudo àŋùjawo la mìɔ̃ cɔ̃ vɔsakpeawo. Wàlɛbɛ ŋua ye wo la gblɔ̃ be: “Ètowo ne mù cɔ̃ mia ji”, “Ètokɔ̃ɛ̃wo, mì jè mia ji!”

⁹So kaka Gibea be àzã ŋua ji ke ye Izràɛl wɔ̀ èvuɛ̃ eye mu trɔ kpɔ ò. E jè be àhùa ne kɔ̀ ɖo Gibea be èhlɔ̃dãtɔ ŋuawo ji tututu.

¹⁰Tɔhonɔ̀ gblɔ̃ be: “Mù jro la jrà ɛ̀ ɖo. Dùkɔ̃wo la bɔ̀ ɖodu, sitè ɖo woa ŋuti sɔ dɔ̃to na wo ɖo woabe èhlɔ̃dãdãa ŋuti.

¹¹Efràyim nyi ènyìnɔvi kè wo kpla nyuɛ̃ ɖe, kè lɔ̃nà èlù pòpo be èdɔ wɔ̀wɔa. Eye kè mù kpɔ yebe èkɔ̀ kè mlìa, mù jro la do èkà èkɔ̀ na ɛ̀, ne Yudà bèa sɔ ɛ̀ ŋlɔ̀ àgblè eye Izràɛl bèa nɔ jɔ̀ àgblè ŋlɔ̀nua.

¹²Mì do ènu lè jɔ̀jɔɛ mè, mì la yà nyɔna; Mì gã àgblè yeye na mìa ɖokoewo. Gàmè la sù ye mì la ji ènyè, Tɔhonɔ̀, kaka va na gà kè mè mù la va ɖùɖù hlùɛ̃gã kɔ̀ ɖo mìa jia.

¹³Mì dà èvuɛ̃ kudo èkunyànyrã be àgblè, mì yà èhlɔ̃dãdã eye mì ɖɔ sàkplɛsàsa be kusɛ̃sɛ̃a kpɔ. Izràɛl, wò dojì ɖo ŋusɛ̃ wòa kudo àhùasuka wòa be gbɔsùsu ŋuti kpò.

¹⁴Ekèa ŋuti ye hũnyà-hũnyà gã ɖe la jɔ̀ lè dùkɔ̃ wòa mè, eye àgbògbò be èdùgãwo la gbã keŋu. Wo la trɔ sìgbè Bɛt-Arbɛ̀l, kè èfìɔ Calmàn gbãa nène. Èfìɔa crɔ̃ nyɔ̃nùwo ku woabe èviwo kpata ɖodu.

¹⁵Izràɛlviwo, nènea ye mù la wɔ̀ kudo mì ɖo mì nyrãku ŋutɔ. Ne èŋù kèa, kaka kè àhùa la jè e gɔ̃mèa, Izràɛl be èfìɔa be vɔ̀vɔnu la va trolo.”