Read gen Òzeà 11 Bible Online

Òzeà 11 - gen bible

Òzeà 11

¹Tɔhonɔ̀ gblɔ̃ be: “Wàlɛbɛ kè Izràɛl nyi ɖèkajɛa, mù lɔ̃ yebe ènyàgbɔ. Mù yɔ ɛ̀ be èvi nyè, kplɔ̀ ɛ̀ to lè Ejiptè.

²E yomè a, mù kpɔ̀tɔ̀ le yɔ wo co wo le si boo lè gbɔ nyè. Dùkɔ̃ nyèa le wɔ̀ vɔsa na vòdu Baal wo le tɔzò lifi na vòduwo.

³Co ènyè ye fiɔ àfɔ̀ɖèɖe Efràyim mù kɔ ɛ̀ ɖo àpe àlɔ̀wo mè. Vɔ̀a, mu do è jèsìdo kpɔ be mù le lebè na yè ò.

⁴Mù kplɔ̀ ɛ̀ ɖɔ̀ɖɔ̀ kudo àdòdò kè lè mi kudo è dòmèa. Mù lè na ɛ̀ sìgbè ètɔ kè kɔkɔ èvia gba ɖo ye ɖokoe ŋuti, gbà bɔ̀bɔ̀nà dona ènuɖùɖu na ɛ̀a nène.

⁵Izràɛlviwo mu la gbà trɔ yì Ejiptè ò, vɔ̀ Àsirìa ye la va ɖù e ji. Ɖo wo gbe be yèwo mu la trɔ va gbɔ nyè ò.

⁶Ekèa ŋuti ye èwui le gblenu lè yebe èdùgãwo mè le gbã woabe àgbògbòwo, le crɔ̃ ènu sia ènu. Ɖo Izràɛl wɔ̀ ɖoɖo gbegblewo.

⁷Dùkɔ̃ nyèa gbe mù eye e le sè vivi na ègbèji mà-nɔ. Wo yɔ ɛ̀ ne bèa sitè co mu le ji ò.

⁸Efràyim nukɛ mù la wɔ̀ na wò ò? Ma wɔ̀ kudo wò sìgbè Admà àlo Sèboim be èdùwo nènea? Mù titɔ kaka le hũhũ, so èta va àfɔ̀gɔ̃mè.

⁹Nyè mu la gbà zɔ̃ ɖo àpe àdɔ̀mèze be àdã ji ò. Nyè mu la gbà gbã Efràyim be èdùa ò. Ɖo nyè mu nyi àgbètɔ ò, vɔ̀ Mawu. Efràyim Mawu ɖèka mù nyi na wò, nyè mu la va gbɔ wò ku àdɔ̀mèze ò.”

¹⁰Àmè kèwo sò ci àmèjro nyigbã jia la va jè Tɔhonɔ̀ kè le gbo sìgbè jãŋùta nènea yomè. Gbogbo kèawo mè ye èviawo la trɔ gbɔ̀ so kaka àpùwo godo va kudo èjicici gã ɖe.

¹¹Wo la pu dù so Ejiptè, sìgbè àfixèviwo be zòzro nène, so Àsirìa sìgbè àhɔ̃newo be zòzro nène. “Mù la trɔ kplɔ̀ wo gbɔ̀ va woabe ànyigbã ji.” Tɔhonɔ̀ ye gblɔ̃ ɛ̀.