Read gen Òzeà 13 Bible Online

Òzeà 13 - gen bible

Òzeà 13

¹Wàlɛbɛ kè Efràyim le pò nupoa, vɔ̃vɔ̃ gã ɖe nɔ̀ ànyi. E ɖo àlɔ̀ Izràɛl ji. Vɔ̀a e jèagɔ̀, ɖo e sumɔ vòdu Baal eye e kpɔ èku so e mè.

²Egbèa, wo kpɔ̀tɔ̀ le wɔ̀ èvuɛ̃: Wo srè woabe klòsalòwo sɔ wɔ̀ bocɔɛviwo legbaviwo na woa ɖokoe. Àlɔ̀nudɔwo kpò wo nyi, eye wo gblɔ̃nà be: “Wo ɖo la wɔ̀ vɔsa na wo!” Àmèwo le sumɔ ènyìviwo!

³Ekèa ŋuti ye wo la nɔ̀ sìgbè ŋùdekɛ̃nyɛ be lilikpo nène, sìgbè àhũ jàja kè buna lè gàmè viɖe mèa nène, sìgbè fòflo kè àya kplɔ̀ yì lè èlù pòpea nène àlo àzìzɔ kè tù to flɛsɛ̀ mèa nène.

⁴So kaka Ejiptè a, mù nyi Tɔhonɔ̀ àpo Mawu. Tovò lè ŋuti nyèa, wò mu jèsi Mawu bu ò eye xɔ̀namètɔ ɖe cã mu lè na wò ò.

⁵Ènyè ya zògbè ji ye mù nya wò lè lè ànyigbã pu kpakplaa ji.

⁶Kè mù kplɔ̀ wò yì ègbeɖùpea wò ɖùnu ɖɔpò sùsuiɖe; Vɔ̀a, wò ŋlɔ̀be mù ɖo wò ɖɔ kudo ègòyiyi.

⁷Mù la nɔ̀ na wo sìgbè jãŋùta àlo blèkpɔ̃ɛ nène lè èmɔ̃ to sɔ nɔ ji ènu la le.

⁸Mù la jè mìa ji sìgbè sisiblìsi kè si wo xɔ̀ èvia lèa nènea, mù la zɛ̃ àkɔta na mì. Mù la vũvũ mì sìgbè jãŋùtanɔ nène, eye ègbemèlãwo la va flì mìabe ŋutilãkukuawo.

⁹Fifìa wò crɔ̃ Izràɛl, ɖo wò sitè ɖo ènyè àmè kè dona wò àlɔ̀a ŋuti.

¹⁰Fikɛ ye èfìɔ wòa lè ò, àmè kè la hlùɛ̃ wò gãa? Fikɛ èga wòawo lè lè èdùawo kpata mè ò? Èwò ye biɔ mù sãa be: 'Na mù èfìɔ kudo ègawo'

¹¹Nène a, mù na wò èfìɔwo, vɔ̀a, mù do àdɔ̀mèze ɖo ŋuti wò; eye mù trɔ xɔ̀ wo lè àsi, lè àpe jìbibi dãjèjea mè.

¹²Wo pòtɛ Efràyim be àgɔ̀jèjewo ɖɛ eye wo wla yebe èvuɛ̃ cã dàɖɛ.

¹³Vèvesèsewo la va sìgbè èkulele nène. Vɔ̀a, Efràyim nyi ɖèvi kè nunya hùe do a: ɖo kè gàmè sùa, e gbe be yè mu la to lè yè nɔ̀ be àdòmè ò.

¹⁴Mù la xɔ̀ wò plè lè èkuwode be ŋusɛ̃ si. Mù la hlùɛ̃ wò gã lè èku si. Èku! Ŋusɛ̃ wòa ɖe? Èku, ɖè àhùawɔ̀nu wòa fiɔ! Nyè mu la kpɔ ɖomè ò.

¹⁵Wàlɛbɛ kè Efràyim nyi ànyigbã sɛ̃ku ɖe lè nɔ̀viawo dòmèa, zògbè ji be àya sɛ̃sɛ̃ ɖe la so kè Tɔhonɔ̀ la dɔ̃ ɖoɖa a. E la pu èsìdowo ku èsìjɔ̀sopewo. E ye ke la kplɔ̀ àdɔ̀kùnuwo ku ènu xɔ̀asìwo kpata sɔ yì.