Read gen Òzeà 14 Bible Online

Òzeà 14 - gen bible

Òzeà 14

¹Wo la dɔ̃ èto na Sàmarìa, ɖo e sitè ɖo yebe Mawu ŋuti. Wo la jè ànyi lè èwui nu. Wo la tùkù woa tɔgbeyɔviwo eye wo la zɛ̃ pòdo na woa srɔ̃ nyɔ̃nù kèwo si èfu lèa.

²Izràɛl, trɔ gbɔ̀ va Tɔhonɔ̀ àpo Mawu a gbɔ, ɖo àgɔ̀jèje wòa na be wò jè ànyi.

³Trɔ va Tɔhonɔ̀ gbɔ ne wòa gblɔ̃ ènyà kèawo na ɛ̀ be: “Sɔ àgɔ̀ kèwo mi jèa kè mi ne wòa lɔ̃ xɔ̀ miabe ènumè nyaawo fàa sɔ wu ènyì-suwo be vɔsa.

⁴Àsirìatɔwo mu la gbà hlùɛ̃ mi gã ò, mi mu la gbà lia èsɔwo ji ò eye mi mu la gbà yɔ miabe àlɔ̀nudɔwo be miabe Mawu ɖe ò. Ɖo gbɔ wò cɔɛvia kpɔ àdɔ̀mè nyuɛ̃ lè.”

⁵Tɔhonɔ̀ gblɔ̃ be: “Mù la dà ànùkua mà-wɔ̀ be èdɔ̀a na Izràɛl, Mù la ɖo lɔ̃lɔ̃ na ɛ̀ veveɖe ɖo àdɔ̀mèze nyèa nu fa.

⁶Mù la nyi ŋùdekɛ̃nyɛ be àhũ na ɛ̀. Eye e la pò èse sìgbè flawà nène, e la ɖo èkè sìgbè Libàn be àtiwo nène.

⁷Yebe àlɔ̀zɛ̃wo la vlũ kpe è sìgbè àmìti nène, eye e gbã yebe huɛ̃huɛ̃ gbigblia sìgbè Libàn tɔ̀a nène.

⁸Izràɛlviwo la trɔ gbɔ̀ va àpe fàfagbè. Wo la dà èlù gble, eye wo la vlũ sìgbè vɛ̃ka nène. Wo la ɖo àsìxɔ̀xɔ sìgbè Libàn be vɛ̃ nène.

⁹Efràyim, nukɛ mù la gbà sɔ àpo legbaviwo sɔ wɔ̀ ò? Mù la sè yebe kuefãwo, mù la kpɔ e ji mù la nɔ̀ na ɛ̀ sìgbè àti do àmà nène. Ènyè ye nana wò àgblèmènukuwo.”

¹⁰Àmè kè nyi ènunyatɔa, ne kpɔ ènu kèawo ji! Àmè kè si susu lèa, ne sè e gɔ̃mè! Ɖo Tɔhonɔ̀ be èmɔ̃wo nyi èmɔ̃ jɔ̀jɔɛ. Àmè jɔ̀jɔɛwo la zɔ̃ to woa ji, vɔ̀a, àmè jèaglawo la ɖiɖi jè ànyi lè wo ji.